पुणे : सामान्य जनतेला कधीही त्रासदायक न वाटलेले, आणि बहुधा सर्व स्तरावरील, क्षेत्रातील, नागरिकांत चांगली प्रतिमा असलेले ,पुण्याला क्वचितच लाभतात अशा अधिकाऱ्यांत गणना होईल असे, पुण्याचे पोलीस आयुक्त अमिताभ गुप्ता यांची सरकारने बदली केली असून त्यांना अपर पोलीस महासंचालकपदी (कायदा व सुव्यवस्था) बढती देण्यात आली आहे. गुप्ता यांच्या जागी आता पुण्याचे नवे पोलीस आयुक्त म्हणून रितेश कुमार पुण्याचे नवीन पोलीस आयुक्त असणार आहेत.दुसरीकडे पिंपरी-चिंचवडचे पोलीस आयुक्त अंकुश शिंदे यांची नाशिक शहर पोलीस आयुक्त म्हणून बदली करण्यात आली आहे. त्यांच्या जागी आता विनयकुमार चौबे हे पिंपरी-चिंचवडचे नवे पोलीस आयुक्त असतील. पुण्यात कुमार आडनावांची सनदी अधिकारी आणण्याच्या प्रकारांची एक गमतीदार हलकी चर्चा यामुळे राजकीय वर्तुळात सुरू झाली आहे, कुणाल कुमार, विक्रम कुमार आणि आता रितेश कुमार…
अमिताभ गुप्ता यांनी मोका चा वापर करत गुन्हेगारावर वचक बसविण्याचा प्रयत्न केला. पुण्यातील वाहतूक समस्येविषयी महापालिकेच्या कारभाराचे त्यांनी कान खेचले, निरर्थक सायकल ट्रॅक, आणि अन्य बाबींनी रस्त्यां च्या दुरावस्था त्यांनी समोर मांडल्या, पोलीस दलातल्या बिनकामी पण खाऊ वृत्तीला चाप बसविण्याचा त्यांनी प्रयत्न केला. यामुळे त्यांची कारकीर्द अनेकांच्या स्मरणात राहील..
राज्यातील पंधरा आयपीएस अधिकाऱ्यांच्या प्रमोशनवर बदल्या करण्यात आल्या आहेत. यामध्ये पुण्याचे पोलीस आयुक्त अमिताभ गुप्ता यांची बदली मुंबई अपर पोलीस महासंचालकपदी (कायदा व सुव्यवस्था) करण्यात आली आहे. त्यांच्या जागी रितेश कुमार यांची नियुक्ती करण्यात आली आहे. रितेश कुमार हे पुणे सीआयडीचे प्रमुख म्हणून अतिरिक्त पोलिस महासंचालक होते. सन १९९२ सालच्या बॅचचे ते आयपीएस अधिकारी आहेत.पुण्याच्या नव्या पोलीस आयुक्तांची कारकीर्द रितेश कुमार यांनी कोल्हापूर, सांगली, नांदेड, लातूर या जिल्ह्यात काम केलं आहे. त्यांनी राज्य राखीव पोलीस दलात देखील काम केलं असून ते मुंबईत काहीकाळ पोलीस उपायुक्त राहिलेले आहेत. ऑगस्ट २०२० मध्ये त्यांना राष्ट्रपती पुरस्कारानं गौरवण्यात आलं होतं. ऑटोमोटेड मल्टिमॉडेल बायोमेट्रिक आयडेंटिफिकेशन सिस्टीम’ (AMBIS) या संगणकीय प्रणालीचा वापर रितेश कुमार यांच्या योगदानामुळं सुरू झाला होता.
