पुणे : पंतप्रधान नरेंद्र मोदी यांनी 15 ऑगस्ट रोजी केलेल्या आवाहनाला प्रतिसाद देत प्लास्टिकचा वापर न करण्याचा आणि पाकिस्तानची बाजू घेणाऱ्या चीनला धडा शिकविण्यासाठी चिनी उत्पादनांवर बहिष्कार घालण्याचा निर्णय रिटेल व्यापाऱ्यांची राष्ट्रीय स्तरावरील शिखर संघटना कैट च्या बैठकीत घेण्यात आला आहे. संपूर्ण देशभरात याची अंमलबजावणी केली जाईल आणि त्यासंदर्भात संलग्न व्यापारी संघटनांच्या माध्यमातून व्यापाऱ्यांमध्ये जनजागृती केली जाणार आहे. कैट च्या दिल्लीमध्ये झालेल्या राष्ट्रीय बैठकीत हा निर्णय घेण्यात आल्याची माहिती कैटचे महाराष्ट्र प्रदेश सचिव सचिन निवंगुणे यांनी दिली.
कैट ही रिटेल व्यापाऱ्यांची राष्ट्रीय संघटना आहे. दिल्लीत झालेल्या बैठकीसाठी पुण्यातून सचिन निवंगुणे, दिलीप कुंभोजकर व विजय नरेला उपस्थित होते. देशभरात ऑनलाइन व्यापारातून 22 हजार मेट्रिक टन प्लास्टिक चा कचरा निर्माण होतो. जगभर प्लास्टिकवर कुठेही बंदी नाही. परंतु, प्लास्टिकवरील प्रक्रिया तिकडे होते. आपल्याकडे ही यंत्रणा अपुरी असल्याने पंतप्रधान नरेंद्र मोदी यांनी प्लास्टिक हटाव चा दिलेला नारा अंमलात आणण्यासाठी रिटेल व्यापारी सर्वतोपरी प्रयत्न करतील. त्याची अंमलबजावणी करण्याच्या दृष्टीनेच देशभरातील कैट चे पदाधिकारी दिल्लीत एकत्र आले होते.
काश्मीर प्रश्नांवर चीन पाकिस्तानला पाठिंबा देत आहे. त्यामुळे चीनला धडा शिकविण्यासाठी चिनी मालाच्या विक्रीवर व्यापाऱ्यांनी बहिष्कार घालावा म्हणूनही या बैठकीत निर्णय झाला. पुण्यात या दोन्ही निर्णयाची अंमलबजावणी करण्यासाठी पुणे जिल्हा रिटेल व्यापारी संघातर्फे प्रयत्न करण्यात येतील. तशी जनजागृती व्यापारी वर्गात केली जाईल, असेही निवंगुणे यांनी सांगितले.
