नाशिक -शरद पवार हे गतवेळी त्यांचा काही संबंध कारण नसताना मेट्रोतून फिरून आले होते. मी किती चांगलं काम करतो हा त्यांचा प्रयत्न आहे. पण त्या मेट्रोचा आणि त्यांचा काडीचा संबंध नाही. पण ते मेट्रोमधून का फिरले. मला वाटतं हे सगळे राजकीय आरोप-प्रत्यारोप आहेत.” असं म्हणत शरद पवार यांना प्रत्युत्तर दिलं.
पंतप्रधान नरेंद्र मोदी हे उद्या पुणे दौऱ्यावर येत आहेत. त्यांच्या हस्ते मेट्रोचे उद्घाटन होईल. या पार्श्वभुमीवर शरद पवार यांनी एक दिवस आधी शनिवारी पुणे येथे एका कार्यक्रमात माध्यमाशी संवाद साधला. मेट्रोचं काम पूर्ण झालं नाही तरी उद्घाटन होतय, असं पवारांनी वक्तव्य केलं. शरद पवारांच्या या विधानाचा खरपूस समाचार भाजप नेते गिरीश महाजन यांनी घेत त्यांना प्रत्युत्तर दिलं.
नाशिक येथे भाजप नेते आमदार गिरीश महाजन म्हणाले “शरद पवार यांच्या वक्तव्याला कुठेही काही अर्थ नाही. शरद पवार हे गतवेळी त्यांचा काही संबंध नसताना, काही कारण नसताना मेट्रोतून फिरून आले होते. मी किती चांगलं काम करतो हा त्यांचा प्रयत्न आहे. पण त्या मेट्रोचा आणि त्यांचा काडीचा संबंध नाही. पण ते मेट्रोमधून का फिरले. मला वाटतं हे सगळे राजकीय आरोप-प्रत्यारोप आहेत
त्यांचा प्रयत्न हाच आहे की, पंतप्रधान येत आहेत. पुणे भाजपमय, मोदीमय झालं. त्यामुळे त्यांना साहाजिकच वाईट वाटतंय. म्हणून त्यांना असं विधान करावं लागतंय.”
काय म्हणाले होते शरद पवार
मेट्रो प्रकल्पाच्या व अन्य विकासकामाच्या उद्घाटनासाठी पंतप्रधान मोदी उद्या पुण्यात येत आहेत. त्या पार्श्वभूमीवर पुण्यात झालेल्या पत्रकार परिषदेत पवार बोलले.
‘पंतप्रधान नरेंद्र मोदी हे रविवारी पुण्यात मेट्रोच्या उद्घाटनासाठी येत आहेत. पण ते अर्धवट कामाचे उद्घाटन करतील. अजूनही मेट्रोचे काम पूर्ण झालेले नाही. याचा विचार पंतप्रधानांनी केला असावा’, असा उपरोधिक टोला राष्ट्रवादी काँग्रसचे अध्यक्ष शरद पवार यांनी लगावला. प्रकल्पांची उद्घाटने करण्यापेक्षा युक्रेनमधील मुलांना सोडवून आणणे अधिक गरजेचे आहे.
‘रशिया व युक्रेनमधील युद्धाचा फटका भारतीय विद्यार्थ्यांना बसला आहे. भारतातील अनेक विद्यार्थी आजही युद्धग्रस्तयुक्रेनमध्ये अडकले आहेत. कोणी काय केले, काय केले नाही यावर चर्चा करण्याची ही वेळ नाही. आपल्या विद्यार्थ्यांना कसे युक्रेनमधून वाचवता येईल याकडे लक्ष दिले पाहिजे.
विद्यार्थ्यांना परत आणण्यासाठी सर्व प्रयत्न सुरू आहेत, पण ते अधिक जोमाने प्रयत्न करण्याची गरज आहे. पुण्यात सध्या काही महत्त्वाचे प्रकल्प येत आहेत. मेट्रो प्रकल्प पूर्ण व्हायला अनेक वर्षे लागणार आहेत. त्याचे आपण उद्घाटन करत आहोत. नदी सुधार प्रकल्पाचेही उद्घाटन होत आहे. ही कामे महत्त्वाची आहेत, पण आता भारतीय विद्यार्थ्यांना सोडवून आणण्याकडे सत्ताधाऱ्यांनी लक्ष द्यायला हवे.
