मुक्ता बर्वे – अभिनेत्री
एक माणूस म्हणून तिला देखील स्वच्छंदी जगू द्या !
आपल्या पुरुषप्रधान संस्कृतीत स्त्रीला देवीचा दर्जा दिला जातो. आई, माता, जननी अशी अनेक विशेषण तिला लावली जातात, पण त्यामुळे तिच्या अडचणी, गरजा तसेच तिच्या इच्छा सगळ्याच पूर्ण होतात असे नाही. आजची स्त्री आधुनिक विचारांची असून, तिला स्वतःचे अस्तित्व निर्माण करायला धडपडावे लागत आहे. एवढेच नव्हे तर, घराघरातील सामान्य गृहिणीला देखील तिच्या हक्कासाठी लढाव लागत आहे. त्यामुळे या सर्व महिलांना आपल्या अडचणी निसंकोचपणे व्यक्त करून देणारे मुक्त व्यासपीठ उपलब्ध व्हायला हवे. ज्यात महिलांच्या अडचणींचा, त्यांच्या आवडीनिवडीचा विचार होऊ शकेल. मी सुद्धा एक महिला असल्याकारणांमुळे, स्त्रीची मानसिकता जाणू शकते. त्यामुळेच तर माझ्यापरीने मी सामान्य महिलांच्या हृदयात आपुलकीची साद घालण्याचा प्रयत्न माझ्या ‘द मुक्त बर्वे शो’ या माय एफ.एम. रेडियो वाहिनी द्वारे करीत आहे. मुळात, अशाप्रकारे स्त्रीविषयांवर आधारित अनेक कार्यक्रम बनायला हवेत. जेणेकरून ‘स्त्री’ या व्यक्तिमत्वाला चांगल्या प्रकारे ओळखता येऊ शकेल. आजच्या जागतिक महिला दिनाच्या निमित्ताने मी हे सांगू इच्छिते कि, स्त्रीला व्यक्त होऊ द्या, तिच्या मनात दडलेल्या अनेक गोष्टींना वाट करून द्या, आपले छंद झोपासण्याचा तिला देखील अधिकार असून, एक माणूस म्हणून तिलादेखील स्वच्छंदी जगू द्या !