पुणे: वीजबिल किंवा पावतीच्या कागदाचा वापर बंद करून पर्यावरणस्नेही बनण्याची संधी महावितरणने वीजग्राहकांना उपलब्ध करून दिली असून पुणे परिमंडलातील 24 हजार 364 ग्राहकांनी सहभाग नोंदवून राज्यात आघाडी घेतली आहे.
महावितरणने पर्यावरणपुरक योजना म्हणून छापील कागदाऐवजी ‘ई-मेल’चा पर्याय निवडल्यास वीजग्राहकांना प्रतिबिलात 10 रुपये सवलत जाहीर देण्यात येत आहे. या योजनेमुळे वीजग्राहकांचे देखील वार्षिक 120 रुपयांची बचत होणार आहे. याशिवाय वीजबिल दरमहा ‘ई-मेल’ तसेच ‘एसएमएस’द्वारे मिळणार असल्याने ते लगेचच ऑनलाईनद्वारे भरण्याची सोय उपलब्ध होत आहे. ज्या वीजग्राहकांना छापील वीजबिलांची गरज भासल्यास त्यांना ईमेलद्वारे प्राप्त बिल किंवा महावितरणच्या www.mahadiscom.in या अधिकृत संकेतस्थळावर असलेले वीजबिल डाऊनलोड व प्रिंट करण्याची सोय आहे. विशेष म्हणजे ही वीजबिले मूळ स्वरुपात उपलब्ध आहेत व ते रंगीत स्वरुपात देखील प्रिंट केले जाऊ शकते.
पुणे परिमंडल अंतर्गत गणेशखिंड मंडलमधील शिवाजीनगर, कोथरूड, पिंपरी व भोसरी विभागांत 10,855, रास्तापेठ मंडल अंतर्गत नगररोड, पद्मावती, पर्वती, बंडगार्डन व रास्तापेठ विभागांत 9861 आणि पुणे ग्रामीण मंडलमधील मुळशी, मंचर व राजगुरुनगर विभागांमध्ये 3648 अशा एकूण 24 हजार 364 वीजग्राहकांनी ‘गो-ग्रीन’मधून वीजबिलासाठी छापील कागदाऐवजी ‘ई-मेल’ व ‘एसएमएस’ला पसंती दिली आहे.
वीजबिलासाठी ग्राहकांनी छापील कागदाऐवजी ईमेलचा पर्याय निवडल्यास त्यांचा पर्यावरण रक्षणासाठी हातभार लागणार आहे व वीजबिलात दरवर्षी 120 रुपयांची बचत होणार आहे. याशिवाय महावितरणने ‘ऑनलाईन’ बिल भरण्यासाठी 500 रुपयांच्या मर्यादेत 0.25 टक्के सुट दिली असून क्रेडीटकार्ड वगळता नेटबॅकिंग, डेबीटकार्ड, कॅशकार्ड, यूपीआय, डिजिटल वॉलेटच्या माध्यमातून ‘ऑनलाईन’द्वारे होणारा वीज बिल भरणा निःशुल्क करण्यात आलेला आहे. त्यामुळे छापीलऐवजी वीजबिलांचे व पावत्यांचे सॉफ्ट कॉपीमध्ये जतन करणे सोयीचे होणार आहे. तसेच मोबाईल क्रमांकाची नोंदणी केलेल्या पुणे परिमंडलातील सुमारे 27 लाख 69 हजार वीजग्राहकांना ‘एसएमएस’ द्वारे बिलाची रक्कम, देय दिनांक आदींचा तपशील, दरमहा वीजबिलाचा व वीजबिल भरण्याच्या मुदतीचा तपशील, मीटर रिडींग घेण्याची तारीख व कालावधी, मीटर रिडींग घेतल्याची तारीख व एकूण युनिटचा वापर आदींसह विविध स्वरुपाची माहिती निशुल्क दिली जात आहे.
‘गो-ग्रीन’चा पर्याय निवडण्यासाठी वीजग्राहकांनी वीजबिलावरील गो-ग्रीन क्रमांकाची नोंदणी महावितरणच्या मोबाईल अॅपद्वारे किंवा महावितरणच्या संकेतस्थळाच्या https://billing.mahadiscom.in/gogreen.php लिंकवर उपलब्ध आहे. वीजग्राहकांनी महावितरणच्या गो-ग्रीन योजनेचा जास्तीत जास्त लाभ घ्यावा, असे आवाहन महावितरणकडून करण्यात आले आहे.
