गरजू नागरिकांसाठी दंत तपासणी शिबिर; सुमारे ९० जणांनी घेतला लाभ
पुणे : शरीराच्या एकंदर आरोग्यात दातांचे स्थान अत्यंत महत्त्वाचे असून, “दात हे शरीराच्या आरोग्याचे प्रवेशद्वार आहेत”, असे मत काँग्रेस नेते गोपाळदादा तिवारी यांनी व्यक्त केले. नवी पेठ तालीम येथील श्री गणेश मित्र मंडळ सार्वजनिक गणेशोत्सव, पुणे-३० यांच्या वतीने आयोजित करण्यात आलेल्या विनामूल्य दंत तपासणी व उपचार शिबिराच्या समारोपप्रसंगी ते बोलत होते.
एम. ए. रंगुनवाला कॉलेज ऑफ डेंटल सायन्स, पुणे यांच्या सहकार्याने २४ सप्टेंबर रोजी सकाळी १० ते दुपारी २ या वेळेत हे दंत चिकित्सा शिबिर आयोजित करण्यात आले होते. शिबिराचा शुभारंभ मंडळाचे ज्येष्ठ कार्यकर्ते वसंतराव गवारे यांच्या हस्ते करण्यात आला.
समारोपप्रसंगी गोपाळदादा तिवारी म्हणाले की, सार्वजनिक गणेशोत्सवाच्या माध्यमातून परिसरातील गरजू नागरिकांना आरोग्यसेवा उपलब्ध करून देणे हा स्तुत्य आणि सामाजिक बांधिलकी जपणारा उपक्रम आहे. धकाधकीच्या जीवनात दातांची योग्य निगा राखणे ही संपूर्ण आरोग्य जपण्यासाठी आवश्यक सवय असल्याचे त्यांनी सांगितले.
आर्थिक अडचणी किंवा उपचारांवरील खर्चामुळे अनेक नागरिक दंत तपासणी पुढे ढकलतात. अशा परिस्थितीत आबालवृद्धांसाठी विनामूल्य तपासणी व उपचार शिबिरे उपयुक्त ठरतात, असेही तिवारी यांनी नमूद केले.
शिबिरात डॉ. उत्कर्षा देशपांडे, डॉ. उमेर शेख, डॉ. आसिफअली मुलाणी, डॉ. अदनान बागवान, डॉ. मोरेश्वर पवार आणि निलोफर पटेल यांनी नागरिकांची तपासणी केली तसेच गरजेनुसार उपचार केले. या दंत चिकित्सा शिबिराचा सुमारे ९० नागरिकांनी लाभ घेतला.
शिबिराचे निमंत्रक, काँग्रेसचे प्रभाग अध्यक्ष आणि मंडळाचे कार्याध्यक्ष शेखर पवार यांनी आभार मानले. मंडळाचे अध्यक्ष सागर गोळे, तसेच आशिष शिंदे, आयुष गोळे, समर्थ पवार आणि अनिकेत काळे यांनी शिबिराच्या यशस्वी आयोजनासाठी विशेष परिश्रम घेतले.
याशिवाय शहर काँग्रेसचे अविनाश अडसूळ, गणेश ठोंबरे तसेच परिसरातील नागरिक आणि कार्यकर्त्यांचेही शिबिराला सहकार्य लाभले.
गणेशोत्सवाच्या धार्मिक-सांस्कृतिक कार्यक्रमांसोबत आरोग्यविषयक उपक्रम राबवून नागरिकांना प्रत्यक्ष सेवा देण्याचा श्री गणेश मित्र मंडळाचा हा प्रयत्न परिसरातील गरजूंसाठी उपयुक्त ठरला.
