सर्पदंश झालेल्या ६० वर्षीय महिलेला ‘१०८’ रुग्णवाहिकेमुळे जीवदान
रुग्णवाहिकेतच उपचार सुरू; डॉ. पंजाबराव चव्हाण यांच्या तत्परतेमुळे नर्मदा महाले यांचे प्राण वाचले
मोखाडा : शेतात गवत कापताना विषारी सापाने दंश झालेल्या ६० वर्षीय नर्मदा महादू महाले यांना ‘१०८’ रुग्णवाहिकेच्या वेळेवर मिळालेल्या सेवेमुळे जीवदान मिळाले. मोखाडा तालुक्यातील बेरिस्ते ग्रामपंचायतीच्या हद्दीतील पासोडीपाडा येथे ९ सप्टेंबर रोजी ही घटना घडली.
नर्मदा महाले या शेतात गवत कापत असताना त्यांना विषारी सापाने दंश केला. घटनेनंतर कुटुंबीयांनी त्यांना तातडीने आसे येथील प्राथमिक आरोग्य केंद्रात दाखल केले. मात्र उपचार सुरू असतानाच त्यांची प्रकृती गंभीर झाली. त्यामुळे डॉक्टरांनी त्यांना पुढील उपचारांसाठी मोठ्या रुग्णालयात हलविण्याचा सल्ला दिला.
याच वेळी आसे येथील ‘१०८’ रुग्णवाहिका दुसऱ्या एका गंभीर रुग्णाला घेऊन गेल्यामुळे उपलब्ध नव्हती. त्यामुळे मोखाडा येथील ‘१०८’ रुग्णवाहिकेला तातडीने पाचारण करण्यात आले. परिस्थितीचे गांभीर्य लक्षात घेत डॉ. पंजाबराव चव्हाण यांनी आसे प्राथमिक आरोग्य केंद्र गाठले.
नर्मदा महाले यांची प्रकृती पाहून त्यांना तातडीने रुग्णवाहिकेत हलविण्यात आले. रुग्णालयाकडे नेत असतानाच डॉ. चव्हाण यांनी रुग्णवाहिकेत आवश्यक उपचार सुरू ठेवले. त्यामुळे महाले यांची प्रकृती नियंत्रणात आणण्यास मदत झाली.
यानंतर त्यांना मोखाडा उपजिल्हा रुग्णालयात दाखल करण्यात आले. तेथे डॉ. निरंजन सापटे यांनी पुढील उपचार केले. दोन दिवसांच्या उपचारानंतर त्यांना नाशिक येथील सिव्हिल हॉस्पिटलमध्ये हलविण्यात आले. तेथे तीन दिवस उपचार घेतल्यानंतर त्यांची प्रकृती स्थिर झाली आणि त्यांना घरी सोडण्यात आले.
वेळेत रुग्णवाहिका उपलब्ध होणे आणि प्रवासादरम्यानच उपचार सुरू राहणे, हे नर्मदा महाले यांच्यासाठी महत्त्वाचे ठरले. त्यांच्या कुटुंबीयांनी ‘१०८’ रुग्णवाहिका सेवा आणि वैद्यकीय पथकाचे आभार मानले. नर्मदा महाले यांचा मुलगा मधुकर महाले यांनीही पथकाच्या तत्पर सेवेबद्दल कृतज्ञता व्यक्त केली.
