पुणे : भक्तीला सामाजिक बांधिलकीची जोड, परंपरेला आधुनिक विचारांची साथ आणि महिलांच्या संघटनशक्तीला कर्तृत्वाची दिशा देत बावधन येथील ‘सिद्धीचा गणपती महिला मंडळ’ने गणेशोत्सवाची एक वेगळी ओळख निर्माण केली आहे. संपूर्णपणे महिलांकडून संचालित असलेले हे मंडळ आपल्या विविध सामाजिक उपक्रमांमुळे राज्यभरात चर्चेत आहे.
संस्थापक अध्यक्षा पीयूषा किरण दगडे पाटील यांच्या मार्गदर्शनाखाली मंडळाची वाटचाल सुरू असून, गणेशोत्सवाला केवळ धार्मिक उत्सव न ठेवता त्याला सामाजिक आणि व्यावसायिक व्यासपीठाचे स्वरूप देण्यात आले आहे. विविध क्षेत्रांत कार्यरत असलेल्या डॉक्टर, वकील, इंजिनिअर, सीए यांच्यासह विविध क्षेत्रांतील महिला एकत्र येत हा उत्सव साजरा करतात.
महिलांना आर्थिकदृष्ट्या सक्षम करण्यासाठी मंडळाने महिला उद्योजकांचा स्वतंत्र ग्रुप उभारला असून, त्यात सुमारे ६०० ते ७०० महिला सहभागी आहेत. परस्परांच्या व्यवसायांना व्यासपीठ देत नव्या महिला उद्योजकांना प्रोत्साहन देण्याचे काम या माध्यमातून केले जाते. यासोबतच आरोग्य शिबिरे आणि रक्तदान शिबिरांचे आयोजन करून सामाजिक बांधिलकीही जपली जाते.
सिद्धीच्या गणपतीची आणखी एक विशेष ओळख म्हणजे पारंपरिक वादनातून होणारा गणेशोत्सव. डीजेचा वापर न करता पारंपरिक ढोल-ताशांच्या गजरात उत्सव साजरा केला जातो. गणपतीची प्रतिष्ठापना करताना मिरवणूक काढली जात नाही आणि विसर्जनाच्या वेळीही मिरवणुकीचा आग्रह धरला जात नाही. पर्यावरणपूरक भूमिकेतून गणेशमूर्तीचे विसर्जन न करता तिचे दान केले जाते.
या वेगळ्या कार्यपद्धतीची दखल घेत सलग तीन वर्षे पिंपरी-चिंचवड पोलीस आयुक्तालयाच्या ‘मोरया पुरस्काराने’ मंडळाचा गौरव झाला आहे. मंडळाच्या उपक्रमांची आणि संकल्पनांची दखल घेत दरवर्षी विविध क्षेत्रांतील मान्यवर मंडळाला भेट देतात. अमृता फडणवीस, महसूल मंत्री चंद्रशेखर बावनकुळे, मंत्री चंद्रकांतदादा पाटील, विधान परिषद सभापती राम शिंदे, खासदार मेधा कुलकर्णी, माजी केंद्रीय मंत्री रावसाहेबदादा पाटील दानवे, लेफ्टनंट जनरल डॉ. माधुरी कानिटकर, सिंबायोसिस च्या कुलपती डॉ. स्वाती मुजुमदार, अभिनेते प्रविण तरडे, स्नेहल तरडे यांच्यासह अनेक मान्यवरांनी सिद्धीच्या गणपतीला भेट देत मंडळाच्या कार्याचे कौतुक केले आहे.
भक्ती, महिला सक्षमीकरण, सामाजिक बांधिलकी आणि पर्यावरणपूरक विचार यांचा सुंदर मेळ घालत ‘सिद्धीचा गणपती महिला मंडळ’ने गणेशोत्सवाला नवी दिशा देण्याचा प्रयत्न केला आहे. त्यामुळेच सिद्धीचा गणपती हा केवळ उत्सव न राहता महिलांच्या सामूहिक कर्तृत्वाची आणि सामाजिक सहभागाची ओळख बनत आहे.
