विश्रामबाग पोलिसांची कारवाई; टिळेकरनगर येथून ३४ वर्षीय आरोपी ताब्यात
पुणे : शहरातील घरफोडीच्या गुन्ह्यांचा तपास करताना विश्रामबाग पोलिसांनी पाच गुन्ह्यांचा छडा लावत एका आरोपीला अटक केली आहे. आरोपीकडून सुमारे १६ लाख रुपये किमतीचे सोन्याचे दागिने हस्तगत करण्यात आले आहेत.
पोलिसांनी दिलेल्या माहितीनुसार, विश्रामबाग पोलीस ठाण्यात दाखल असलेल्या एका घरफोडीच्या गुन्ह्यात फिर्यादी घरी नसताना अज्ञात आरोपीने घराचा दरवाजा तोडून चोरी केली होती. या प्रकरणाचा तपास वरिष्ठ पोलीस निरीक्षक नवनाथ जगताप यांच्या मार्गदर्शनाखाली सुरू होता.
तपासादरम्यान पोलीस हवालदार नितीन मुंढे आणि पोलीस अंमलदार अनिस शेख यांना गोपनीय बातमीदारामार्फत संशयित आरोपी टिळेकरनगर-येवलेवाडी परिसरात राहत असल्याची माहिती मिळाली. त्यानुसार सहायक पोलीस निरीक्षक उमेश कारके व त्यांच्या पथकाने संबंधित ठिकाणी छापा टाकून संशयिताला ताब्यात घेतले.
पोलिसांच्या माहितीनुसार, ताब्यात घेतलेल्या आरोपीचे नाव जगदीशसिंग नमनसिंग कलानी (वय ३४, रा. टिळेकरनगर, कोंढवा, पुणे) असे आहे. चौकशीदरम्यान त्याने संबंधित गुन्ह्याची कबुली दिल्याचे पोलिसांनी म्हटले आहे. पुढील तपासात त्याच्याकडून पुणे शहरातील एकूण पाच घरफोडीचे गुन्हे उघडकीस आल्याची माहिती पोलिसांनी दिली.
या प्रकरणांमध्ये विश्रामबाग पोलीस ठाण्यातील तीन, भारती पोलीस ठाण्यातील एक आणि विश्रांतवाडी पोलीस ठाण्यातील एका गुन्ह्याचा समावेश आहे. आरोपीकडून या गुन्ह्यांशी संबंधित १६ लाख रुपयांचा मुद्देमाल जप्त करण्यात आला आहे.
ही कारवाई अपर पोलीस आयुक्त राजेश बनसोडे, पोलीस उपायुक्त ऋषिकेश रावळे, सहायक पोलीस आयुक्त अनुजा देशमाने यांच्या मार्गदर्शनाखाली वरिष्ठ पोलीस निरीक्षक नवनाथ जगताप यांच्यासह विश्रामबाग पोलीस ठाण्याच्या तपास पथकाने केली.
