कदमवाकवस्तीतील १९ वर्षीय तरुणी बेपत्ता; लोणी काळभोर पोलिसांकडून शोध सुरू

आकांक्षा विकास शर्मा १६ सप्टेंबरपासून बेपत्ता; अज्ञात व्यक्तीने पळवून नेल्याची कुटुंबीयांची तक्रार

पुणे : पुण्यातील कदमवाकवस्ती परिसरातून १९ वर्षीय आकांक्षा विकास शर्मा ही तरुणी बेपत्ता झाल्याची घटना समोर आली आहे. याप्रकरणी तिच्या आईने लोणी काळभोर पोलीस ठाण्यात तक्रार दिली असून, अज्ञात व्यक्तीने अज्ञात कारणासाठी तिला पळवून नेल्याचा संशय तक्रारीत व्यक्त करण्यात आला आहे. पोलिसांनी प्रकरणाची नोंद करून तरुणीचा शोध सुरू केला आहे.

पोलिसांनी दिलेल्या माहितीनुसार, आकांक्षा ही १६ सप्टेंबर २०२६ रोजी सकाळी सुमारे ८.४५ वाजण्याच्या सुमारास कदमवाकवस्ती येथील राहत्या घरातून बाहेर पडली. त्यानंतर ती घरी परतली नाही. कुटुंबीयांनी तिचा शोध घेतला; मात्र ती मिळून न आल्याने लोणी काळभोर पोलिसांकडे तक्रार करण्यात आली.

तक्रारीनंतर पोलिसांनी पुणे शहरासह पुणे ग्रामीण आणि पिंपरी-चिंचवड पोलीस आयुक्तालयाच्या हद्दीतही तिचा शोध घेण्यासाठी माहिती प्रसारित केली आहे.

अशी आहे आकांक्षाची ओळख

आकांक्षा विकास शर्मा हिचे वय १९ वर्षे असून उंची सुमारे १५६ सेंटीमीटर आहे. तिचा बांधा सडपातळ, वर्ण गोरा, चेहरा गोल असून केस छोटे व काळसर-तपकिरी आहेत. तिच्या उजव्या गालावर तीळ असल्याचे पोलिसांनी नमूद केले आहे.

बेपत्ता झाली तेव्हा तिच्या अंगात काळ्या रंगाचा गोल गळ्याचा टी-शर्ट, त्यावर पांढऱ्या रंगाच्या रेषा, फिकट निळ्या रंगाची जीन्स आणि काळ्या रंगाचे क्रॉक्स होते. उजव्या हाताच्या बोटात साधी अंगठी होती.

तिच्याकडे काळ्या रंगाची रेक्झीनची बॅग असून त्यामध्ये पुस्तके होती. तसेच तिच्याकडे Samsung Galaxy M35 मोबाईल असल्याचेही पोलीस पत्रकात नमूद करण्यात आले आहे.

पांढऱ्या रंगाची TVS Jupiterही सोबत

आकांक्षा घरातून निघताना कुटुंबीयांच्या मालकीची पांढऱ्या रंगाची TVS Jupiter स्कूटर घेऊन गेल्याचे तक्रारीत नमूद करण्यात आले आहे. त्यामुळे तरुणीबरोबरच संबंधित स्कूटरचाही पोलीस शोध घेत आहेत.

आकांक्षाबाबत कोणतीही माहिती मिळाल्यास लोणी काळभोर पोलीस ठाण्याशी संपर्क साधावा, असे आवाहन पोलिसांनी केले आहे.