नागरिकांना सुरक्षित व सुलभ दळणवळणाची सुविधा देण्यासाठी महापौरांचा पुढाकार
पुणे
हिंगणे खुर्द सिंहगड रोड ते सहकारनगर सातारा रोड परिसरातील वाढती वाहतूक आणि नागरिकांची होणारी गैरसोय लक्षात घेऊन वाहतुकीसाठी आणखी एक पर्यायी मार्ग उपलब्ध करून देण्याच्या दृष्टीने महापौर मंजुषा नागपुरे यांनी हिंगणे-खोराड वस्ती परिसरात डोंगरातून बोगदा (Tunnel) निर्माण करण्याच्या प्रस्तावाची आज पूर्वपाहणी केली. या प्रस्तावित बोगद्यामुळे हिंगणे ते सहकारनगर तसेच तळजाई परिसरातील दळणवळण अधिक सुलभ होण्यासोबतच नागरिकांचा वेळ व प्रवासाचे अंतर कमी करण्यास मदत होणार आहे. प्रस्तावित मार्गाची प्रत्यक्ष पाहणी करून प्रकल्पाच्या व्यवहार्यता, तांत्रिक बाबी आणि आवश्यक उपाययोजनांबाबत संबंधित अधिकाऱ्यांकडून माहिती घेण्यात आली.
पुणे शहरातील वाहतूक व्यवस्था अधिक सक्षम करण्यासोबतच नागरिकांना पर्यायी मार्ग उपलब्ध करून देणे, हा महापौर मंजुषा नागपुरे यांच्या पुढाकाराचा महत्त्वाचा भाग आहे. याच अनुषंगाने हिंगणे-खोराड वस्ती येथील रस्ता रुंदीकरण तसेच नाल्यावर कल्व्हर्ट बांधून तो बंदिस्त करण्याच्या प्रस्तावित कामांचीही पाहणी करण्यात आली. परिसरातील वाहतूक कोंडी, नागरिकांची सुरक्षितता आणि भविष्यातील वाढती वाहतूक लक्षात घेऊन आवश्यक पायाभूत सुविधा विकसित करण्याबाबत महापौरांनी संबंधित अधिकाऱ्यांना आवश्यक कार्यवाही करण्याच्या सूचना दिल्या.
यावेळी नगरसेवक प्रसन्न जगताप, नगरसेविका ज्योती गोसावी, पुणे महानगरपालिका प्रकल्प अधिकारी गोजारे तसेच महानगरपालिकेचे संबंधित अधिकारी व कर्मचारी उपस्थित होते.
