२७ आणि २८ ऑगस्टला प्रवास करणाऱ्या प्रवाशांसाठी मर्यादित आवृत्तीतील राख्या; सलग चौथ्या वर्षी विशेष उपक्रम
नवी दिल्ली : रक्षाबंधनाचा सण यंदा विमान प्रवासातही अनुभवता येणार आहे. एअर इंडिया एक्सप्रेसने आपल्या देशांतर्गत आणि आंतरराष्ट्रीय विमानांमधून प्रवास करणाऱ्या प्रवाशांसाठी विशेष रक्षाबंधन उपक्रम आयोजित केला असून, २७ आणि २८ ऑगस्ट रोजी प्रवाशांना केबिन क्रूच्या हस्ते मर्यादित आवृत्तीतील खास राख्या भेट म्हणून देण्यात येणार आहेत.
एअर इंडिया एक्सप्रेसकडून अशा पद्धतीने रक्षाबंधन साजरे करण्याचे हे सलग चौथे वर्ष आहे. प्रवाशांना स्नेह, आपुलकी आणि नात्यांच्या बंधाची आठवण करून देण्याच्या उद्देशाने हा उपक्रम राबविण्यात येत असल्याचे एअरलाइनकडून सांगण्यात आले आहे.
नोकरी, शिक्षण किंवा अन्य कारणांमुळे अनेक भावंडे वेगवेगळ्या शहरांमध्ये आणि देशांमध्ये वास्तव्यास असतात. त्यामुळे प्रवासादरम्यान मिळणारी ही राखी त्यांच्यासाठी रक्षाबंधनाची आठवण ठरेल आणि नेहमीचा विमानप्रवास अधिक भावनिक व संस्मरणीय बनेल, असा एअरलाइनचा विश्वास आहे.
गेल्या काही वर्षांमध्ये या उपक्रमाला प्रवाशांकडून उत्स्फूर्त प्रतिसाद मिळाला असून, राखी मिळाल्यानंतर अनेक प्रवाशांनी आपल्या भावंडांशी संपर्क साधत रक्षाबंधनाचा आनंद साजरा केल्याचेही एअरलाइनने म्हटले आहे.
एअर इंडिया एक्सप्रेस सध्या ४८ देशांतर्गत आणि १६ आंतरराष्ट्रीय ठिकाणांना सेवा देते. भारतासह आग्नेय आशिया आणि पश्चिम आशियातील विविध मार्गांवर कंपनीकडून दर आठवड्याला ३ हजारांहून अधिक उड्डाणे चालवली जातात.
