पुणे, दि. २७ जुलै, २०२६ : ‘प्रधानमंत्री सूर्यघर मोफत वीज योजने’ची माहिती घराघरांत पोहोचविण्यासाठी तयार करण्यात आलेल्या ‘सूर्यरथ’ केंद्रीय राज्यमंत्री तथा खासदार मुरलीधर मोहोळ यांच्या हस्ते हिरवा झेंडा दाखवून रविवारी मार्गस्थ करण्यात आला.
‘नॅशनल सोलर एनर्जी फेडरेशन ऑफ इंडिया’ (NSEFI), पीडब्ल्यूसी (PwC) आणि एनर्जिवा व्हेंचर्स यांच्या सहकार्याने हा सूर्यरथ साकारण्यात आला आहे. पुण्यातील चिखली येथे रविवारी (दि. २६) खासदार जनसंपर्क सेवा अभियाना दरम्यान केंद्रीय राज्यमंत्री तथा खासदार मुरलीधर मोहोळ यांच्या हस्ते ‘प्रधानमंत्री सूर्यघर मोफत वीज योजने’च्या सूर्यरथाचा औपचारिक शुभारंभ करण्यात आला. यावेळी महावितरणचे अधीक्षक अभियंता ज्ञानदेव पडळकर व सिंहाजीराव गायकवाड यांच्या प्रमुख उपस्थितीसह विविध अधिकारी व नागरिकांची मोठ्या संख्येने उपस्थिती होती.
पुणे जिल्ह्यात जवळपास ५० हजार घरांवर सौर प्रकल्प उभारण्यात आले असून, राज्यात पुणे जिल्हा दुसऱ्या क्रमांकावर आहे. या योजनेला आणखी प्रोत्साहन देण्यासाठी या सूर्यरथ शहरांत फिरणार आहे. पुणे शहर आणि पिंपरी-चिंचवड परिसरातील विविध गृहनिर्माण सोसायट्या, मुख्य चौक आणि निवासी भागांत फिरणार आहे. या रथासोबत तज्ज्ञांचे एक पथक असेल, जे नागरिकांना सौरऊर्जा प्रणालीचे फायदे प्रत्यक्ष समजावून सांगेल. तसेच, छतावर सोलर पॅनेल बसवण्यासाठी मिळणारे शासकीय अनुदान, बँक कर्जाची सुविधा आणि ऑनलाईन नोंदणी प्रक्रिया याबद्दल जागेवरच सविस्तर मार्गदर्शन केले जात आहे.
