सेवा पूर्णपणे मोफत; पैसे मागणाऱ्या अनधिकृत पोर्टलवर माहिती न देण्याचे आवाहन
मुंबई, : ‘एअर सुविधा 2.0’च्या नावाने सुरू असलेल्या बनावट संकेतस्थळांपासून नागरिकांनी आणि विमान प्रवाशांनी सावध राहावे, असा इशारा नागरी हवाई वाहतूक मंत्रालयाने दिला आहे. काही बनावट संकेतस्थळे आणि पोर्टल्स अधिकृत ‘एअर सुविधा 2.0’ची नक्कल करून प्रवाशांची दिशाभूल करत असल्याचे मंत्रालयाच्या निदर्शनास आले आहे.
या बनावट संकेतस्थळांवर प्रवाशांकडून वैयक्तिक आणि प्रवासाशी संबंधित माहिती घेतली जात असून, त्यानंतर त्यांना बनावट पेमेंट पृष्ठावर पाठवून आर्थिक फसवणुकीचा प्रयत्न केला जात असल्याचे मंत्रालयाने स्पष्ट केले आहे.
‘एअर सुविधा 2.0’ अंतर्गत उपलब्ध करून देण्यात येणाऱ्या सर्व सेवा पूर्णपणे मोफत आहेत. स्वघोषणापत्र सादर करण्यासाठी कोणतेही शुल्क आकारले जात नाही. त्यामुळे या सेवेच्या नावाखाली पैसे मागणारे संकेतस्थळ अधिकृत नसल्याचे प्रवाशांनी लक्षात घ्यावे.
‘एअर सुविधा 2.0’चे एकमेव अधिकृत पोर्टल airsuvidha.civilaviation.gov.in हे आहे. कोणतीही वैयक्तिक किंवा प्रवासाची माहिती भरण्यापूर्वी संकेतस्थळाचा यूआरएल काळजीपूर्वक तपासावा, असे आवाहन करण्यात आले आहे.
‘एअर सुविधा 2.0’ची सेवा देण्याचा दावा करणाऱ्या कोणत्याही अनधिकृत संकेतस्थळावर पैसे भरू नयेत. प्रवाशांनी केवळ अधिकृत सरकारी पोर्टलचा वापर करावा आणि माहितीसाठी केंद्र सरकारच्या अधिकृत निवेदनांवरच विश्वास ठेवावा, असे नागरी हवाई वाहतूक मंत्रालयाने म्हटले आहे.
