पुणे.: महाराष्ट्र लोकसेवा आयोगाच्या (MPSC) गट-क (२०२३) स्पर्धा परीक्षा भरती प्रक्रियेत खुल्या प्रवर्गातील रिक्त पदे तातडीने भरावीत तसेच प्रतीक्षा यादी (वेटिंग लिस्ट) जाहीर करावी, या मागणीसाठी, सौदागर शेळके, किरण जगताप, राहुल पवार, राहुल सूर्यवंशी, निखिल घाटगे, आकाश काळे व शेखर भोसले या स्पर्धा परीक्षेच्या विद्यार्थ्यांनी शिवसेना नेत्या व आमदार डॉ. नीलम गोऱ्हे यांची भेट घेऊन निवेदन सादर केले.
विद्यार्थ्यांनी दिलेल्या निवेदनात सन २०२३ मधीलगट-क लिपिक-टंकलेखक पदांच्या ७,००६ जागांसाठी भरती प्रक्रिया राबविण्यात आली होती. मात्र, अंतिम निवड प्रक्रियेनंतर खुल्या प्रवर्गातील अनेक पदे रिक्त राहिल्याचा दावा करण्यात आला. तसेच काही उमेदवारांनी नियुक्ती स्वीकारली नसल्याने मोठ्या प्रमाणावर जागा रिक्त असून, पात्र उमेदवार उपलब्ध असतानाही प्रतीक्षा यादी प्रसिद्ध करण्यात आलेली नाही. त्यामुळे अनेक पात्र उमेदवारांवर अन्याय होत असल्याचे विद्यार्थ्यांनी निवेदनात नमूद केले.
याबाबत अनेक उमेदवारांनी न्यायालयातही धाव घेतली असून, आयोगाकडून उत्तर दाखल होण्यास विलंब होत असल्याने भरती प्रक्रिया रखडत असल्याचेही विद्यार्थ्यांनी निदर्शनास आणून दिले. रिक्त पदे तातडीने भरावीत आणि रुजू न झालेल्या उमेदवारांच्या जागांसाठी प्रतीक्षा यादी जाहीर करून पात्र उमेदवारांना संधी द्यावी, अशी मागणी त्यांनी केली.
यावेळी डॉ. नीलम गोऱ्हे यांनी विद्यार्थ्यांच्या समस्या ऐकून घेतल्या. या संदर्भात महाराष्ट्र लोकसेवा आयोगाशी आवश्यक पाठपुरावा करून भरती प्रक्रियेबाबत लवकरात लवकर सकारात्मक निर्णय व्हावा, यासाठी प्रयत्न केले जातील, असे आश्वासन डॉ.गोऱ्हे यांनी विद्यार्थ्यांना दिले.
