भाजपचा महानगरपालिकेतील कारभार लोकशाही कडून हुकूमशाहीकडे-दीप्ती चवधरी

            पुणे-भाजपचा महानगरपालिकेतील कारभार लोकशाही कडून हुकूमशाहीकडे जाणारा असल्याची टीका माजी महापौर ,माजी आमदार , पुणे शहर कॉंग्रेसच्या अध्यक्षा दीप्ती चवधरी यांनी केली आहे. त्या म्हणाल्या महानगरपालिकेच्या नुकत्याच झालेल्या सर्वसाधारण सभेमध्ये पाणी प्रश्नांवर चर्चा चालू असताना राष्ट्रवादी काँग्रेस पक्षाचे (श.प.गट) नगरसेवक गफूर पठाण यांनी पाणीविषयाच्या चर्चेनंतर पुणे महानगरपालिकेने बोपोडीतील दर्गा पाडली या विषयावर सभागृहात चर्चा व्‍हावी अशी मागणी केली. त्यावरून सत्ताधारी भाजपाचे नगरसेवक गफूर पठाण यांच्या अंगावर धावून गेले आणि त्यांना मारहाण करण्याचा प्रयत्न केला, यावेळी काँग्रेस पक्षाच्या नगरसेवकांनी त्यांना अडवून अनुचित प्रकार करण्यापासून रोखले.  छत्रपती शिवाजी महाराजांच्या सभागृहात हे कृत्य घडले हे अतिशय निंदनीय आहे. महात्मा ज्योतिबा फुले यांच्या पदस्पर्शाने पावन असलेल्या या सभागृहात व डॉ. बाबासाहेब आंबेडकर यांच्या संविधानानुसार चाललेल्या पुणे महानगरपालिकेत काल झालेल्या या कृत्यामुळे असे वाटते की, जणू काही आपण लोकशाही पासून हुकूमशाहीकडे जात आहोत. या छत्रपती शिवाजी महाराजांच्या सभागृहात कै. एस. एम. जोशी, कै. नानासाहेब गोरे, कै. भाई वैद्यांसारखे विचारवंत या सभागृहाचे सदस्य होते त्यांचे भाषण ऐकायला पुणेकर नागरिक सर्वसाधारण सभेत प्रेक्षक म्हणून उपस्थित राहायचे परंतु सत्ताधारी भाजपच्या नगरसेवकांची वागणूक पुण्याच्या संस्कृतीला काळीमा फासणारी आहे. काँग्रेस पक्ष सत्तेत असताना विरोधी पक्षाच्या नगरसेवकांचे मत ऐकून घेऊन त्याप्रमाणे सभागृहामध्ये निर्णय घेण्यात यायचे. काँग्रेस पक्षाने सर्व जाती जमातींना एकत्र घेऊन लोकशाही पध्दतीने कारभार केला. मी पुण्याची माजी महापौर म्हणून काल पुणे महानगरपालिकेच्या सभागृहात झालेल्या कृत्याचा तीव्र निषेध करत आहे.