पुणे : हडपसरमधील संत ज्ञानेश्वर आणि संत तुकाराम उड्डाणपूलामुळे नागरिकांना येणाऱ्या समस्या सोडविण्यासाठी शिवसेनेच्या शिंदे गटाचे पुणे शहराध्यक्ष नाना भानगिरे यांनी नितीन गडकरी यांना निवेदन दिले.
या निवेदनात नाना भानगिरे यांनी असे म्हटले आहे कि,’आपल्या नेतृत्वात रस्ते वाहतूक आणि महामार्ग मंत्रालय देशभरात विविध ठिकणी रस्ते आणि महामार्गाची कामे अत्यंत वेगाने सुरु आहेत. अनेक वर्षे रेंगाळलेल्या रस्त्यांची कामे आपल्या नेतृत्वात मोठ्या कमी कालावधीत पूर्णत्वास येत आहेत, त्याबद्दल आपले सर्वप्रथम मनःपूर्वक आभार.गेल्या कित्येक वर्षापासून पुणेकरांना वाहतूक कोंडीला सामोरे जावे लागत असलेल्या चांदणी चौकातील उड्डाणपुलाचा प्रश्न आपण विक्रमी वेळेत सोडवला. चांदणी चौकासारखाच वाहतुकीचा प्रश्न पुणे महानगरातील हडपसर उपनगरात असलेल्या संत ज्ञानेशवर आणि संत तुकाराम उड्डाणपूलामुळे नागरिकांना सतावतोय. सदर उड्डाणलापासून राष्ट्रीय महामार्ग क्रमांक ६५ (जुना क्रमांक ९) पुणे ते मच्छलीपट्टणम सुरु होतो या महामार्गामुळे महाराष्ट्र, कर्नाटक, तेलंगणा आणि आंध्र प्रदेश ही राज्ये जोडली गेली आहेत त्यामुळे सदर उड्डाणपुलावरून मोठया प्रमाणात सातत्याने वाहतूक असते. . मुळात एकच असलेल्या या पूलाला पुढे सासवड रस्त्यावर जाण्यासाठी वेगळा मार्ग बांधण्यात आला. या जोडकामामुळे मुळातील पूल अत्यंत कमकुवत झाला आहे. परिणामी आठवड्यातील चार ते पाच दिवस उड्डाणपूल वाहतुकीसाठी बंद ठेवावा लागत आहे.