पुणे- राष्ट्रवादी काँग्रेसचे अध्यक्ष शरद पवार आणि उपमुख्यमंत्री अजित पवार यांची पुण्यात उद्योगपती अतुल चोरडिया यांच्या निवासस्थानी एक गुप्त बैठक झाल्याची माहिती येथे मिळतेआहे. पुण्यातील कोरेगाव पार्क भागातील घरी हे दोघे एकमेकांना भेटले. यावेळी या दोन्ही नेत्यांत जवळपास अर्धा तास चर्चा झाली. या चर्चेचा तपशील अद्याप बाहेर आला नाही. पण ही चर्चा राष्ट्रवादीच्या अंतर्गत राजकारणावर होती, असा दावा केला जात आहे.यासंबंधीच्या वृत्तानुसार,बैठकीनंतर प्रथम शरद पवार हे चोरडियांच्या निवासस्थानातून बाहेर पडले. त्यानंतर काही वेळाने अजित पवार यांच्या वाहनांचा ताफा बाहेर पडला. या घटनाक्रमामुळे राज्याच्या राजकारणात मोठी खळबळ माजली आहे.शरद व अजित पवार यांच्या शनिवारच्या गुप्त भेटीमुळे राष्ट्रवादी काँग्रेसचे दोन्ही गट पुन्हा एकत्र येणार काय? अशी चर्चाही सुरू झाली आहे.
अजित पवार यांच्या राष्ट्रवादी काँग्रेसमधील बंडखोरीमुळे राज्याच्या राजकारणात मोठा भूकंप झाला. त्यांच्यासोबत राष्ट्रवादीतील छगन भुजबळ, हसन मुश्रीफ, दिलीप वळसे पाटील, धनंजय मुंडे आदी मोठ्या नेत्यांनीही शरद पवारांची साथ सोडली. हा गट थेट शिंदे – फडणवीस सरकारमध्ये सहभागी झाला. त्यात अजित पवारांनी उपमुख्यमंत्रिपदाची शपथ घेतली. तर इतर मंत्री कॅबिनेट मंत्री झाले.
या शपथविधीनंतर अजित पवार व त्यांच्या समर्थकांनी शरद पवारांची वाय बी सेंटरवर जाऊन भेट घेतली. या बैठकीत त्यांनी शरद पवारांची समजूत काढून त्यांना आपल्यासोबत घेण्याचा प्रयत्न केला. पण पवारांनी भाजपसोबत जाण्यास ठाम नकार दिला. त्यानंतर आता पुन्हा अजित पवार व शरद पवारांत गुप्त भेट झाल्यामुळे राज्याच्या वर्तुळात चर्चेला उधाण आले.