पुणे-
पंतप्रधान नरेंद्र मोदींना जीवे मारण्याची धमकी देण्यात आली आहे. पुण्यातील एका व्यक्तीला याबाबतचा मेल आला आहे. पुणे पोलिसांनी याची गंभीर दखल घेतली असून अलंकार पोलिस स्टेशनमध्ये गुन्हा दाखल करत तपासाला सुरूवात केली आहे.
विदेशातून हा धमकीचा मेल आल्याची माहिती आहे. पोलिसांकडे दाखल गुन्ह्यानुसार या मेलमध्ये म्हटले आहे की, मी भारतामध्ये सिरीयल बॉम्ब ब्लास्ट करण्याचा प्लॅन करत आहे, मी हिंदू धर्म आणि हिंदू धर्मातील महिलांना नष्ट करेन. आय विल किल नरेंद्र मोदी अल्सो
मेलनुसार, भारतात विविध ठिकाणी बॉम्ब ब्लास्ट घडवून आणण्याबरोबरच पंतप्रधान नरेंद्र मोदींना बॉम्बने उडवून देण्याची धमकी देण्यात आली आहे. पुण्यातील एका व्यक्तीला विदेशातून हा ईमेल आला आहे. एम. ए. मोखीम असे धमकी देणाऱ्या आरोपीचे नाव आहे. आरोपीने मेलमध्ये म्हटले आहे की, मी अनेक दहशतवादी संघटनांना फंडिंग करतो. हिंदू महिला आणि हिंदूंना देशातून नष्ट करण्यासाठी प्रयत्न करत आहे. देशात अनेक ठिकाणी अनेकांचे मृत्यू घडवून आणणार आहे.
दरम्यान, ज्यांना हा धमकीचा मेल आला त्यांनी तातडीने पुणे शहर पोलिस दलाच्या नियंत्रण कक्षाला याची माहिती दिली. पोलिसांनी याची तातडीने दखल घेत गुन्हा दाखल केला आहे.
दरम्यान, महाराष्ट्र दहशतवादविरोधी पथकाने पुण्यातून मोहम्मद युसुफ खान आणि मोहम्मद युनूस साकी या संशयित दहशतवाद्यांना अटक करण्यात आली आहे. मात्र, या प्रकरणाचा तपास एटीएसकडून एनआयएकडे सोपवण्यात आला आहे. आजच पुणे सत्र न्यायालयाने हे आदेश दिले. हे दोघेही दहशतवादी एनआयएच्या मोस्ट वॉन्टेड यादीत असल्याची माहिती आहे.