अखिल म्हसोबा उत्सव मंडई ट्रस्टतर्फे तृतीयपंथीयांना ५१ हजार रुपयांची आर्थिक मदत
पुणे : विविध संस्थांकडून होणा-या उत्सवांतून पुणे शहराची उंची वाढते. केवळ धार्मिक व सांस्कृतिक कार्यक्रमांचा अंतर्भाव न ठेवता उत्सवांमध्ये मोठया प्रमाणात सामाजिक उपक्रम राबविले जातात. उपेक्षित समाजाकडे बघणा-या या संस्था व व्यक्ती हेच खरे सामाजिक कार्यकर्ते आहेत. त्यामुळे पुण्यातील ही परंपरा अशीच यापुढेही सुरु रहावी, असे मत आमदार रवींद्र धंगेकर यांनी व्यक्त केले.
शुक्रवार पेठेतील अखिल म्हसोबा उत्सव मंडई ट्रस्टचा म्हसोबा उत्सव महात्मा फुले मंडई, बुरुड आळी येथे आयोजित करण्यात आला आहे. त्यामध्ये शुक्रवार पेठेतील यल्लमा देवदासी संस्था आणि मंगल मुखी किन्नर चॅरिटेबल संस्थेतील तृतीयपंथीयांच्या हस्ते म्हसोबारायाची आरती करण्यात आली. तसेच तृतीयपंथीयांना ५१ हजार रुपयांची मदत देखील देण्यात आली.
कार्यक्रमाला कर्वे रस्ता रांका ज्वेलर्सचे संचालक ओमप्रकाश रांका, माजी नगरसेवक योगेश समेळ, सुशिला नेटके, तुषार रायकर, सौरभ अमराळे, यल्लमा देवदासी संस्थेचे अध्यक्ष रावसाहेब कुंभार, मंगल मुखी किन्नर चॅरिटेबल संस्थेच्या अध्यक्ष रंजीता नायक, म्हसोबा ट्रस्टचे विश्वस्त अध्यक्ष राहुल सूर्यवंशी, विश्वस्त उपाध्यक्ष निवृत्ती जाधव यांसह विविध क्षेत्रातील मान्यवर उपस्थित होते.
ओमप्रकाश रांका म्हणाले, म्हसोबारायाचे दर्शन घेऊन पुढील १२ महिने जोमाने काम करण्याची शक्ती मिळते. ट्रस्टने राबविलेला सामाजिक उपक्रम कौतुकास्पद असून आमच्याकडून देखील २१ हजार रुपयांची मदत तृतीयपंथीयांना देत असल्याची घोषणा त्यांनी केली. अखिल म्हसोबा उत्सव मंडई ट्रस्ट पुणे या ट्रस्टच्या फेसबुक पेजवरुन हा उत्सव भाविकांना आॅनलाईन देखील पाहता येणार असल्याचे ट्रस्टतर्फे सांगण्यात आले. निवृत्ती जाधव यांनी प्रास्ताविक केले. अबोली सुपेकर यांनी सूत्रसंचालन केले.