विजेच्या हाय टेन्शनच्या तारांना केबलचा स्पर्श अन दोघांना बसला शॉक
पुणे-केबल कामगारांच्या सुरक्षिततेत हलगर्जीपणा बाळगल्याप्रकरणी पुण्यातील एन पी केबल नेटवर्क मालकाविरूद्ध कोथरुड पोलिस ठाण्यात गुन्हा दाखल करण्यात आला आहे. केबल टाकण्यापुर्वी खबरदारी न घेतल्यामुळे विजेच्या हाय टेन्शनला स्पर्श झाल्यामुळे दोघा कर्मचार्यांचा मृत्यू झाल्याची घटना चार मे रोजी कोथरुडमधील सुतारदरा परिसरात घडलेली होती.
याप्रकरणी कागदपत्रांच्या तपासणीसह इतर अहवालानंतर दोषी आढळल्याप्रकरणी एन पी केबल नेटवर्क मालकाविरुद्ध गुन्हा दाखल करण्यात आला आहे. कुंडलिक लक्ष्मण शिंदे आणि स्वप्निल शिवराम बोडके ( दोघेही रा. कोथरुड,पुणे ) अशी मृत्यू झालेल्या कामगारांची नावे आहेत. याप्रकरणी लक्ष्मण शिंदे (रा. कोथरुड,पुणे )यांनी कोथरुड पोलिस ठाण्यात तक्रार दाखल केलेली आहे.
पोलिसांनी दिलेल्या माहितीनुसार, एन पी केबल विनापरवाना व्यवसाय करीत असून त्यांच्याकडे कुंडलिक आणि स्वप्निल कामाला होते. मात्र, संबंधित मालकाने त्यांच्या सुरक्षिततेसाठी कोणतीही उपाययोजना केली नव्हती. तशाही परिस्थितीत तो कामगारांकडून कामे करवून घेत होता. चार मे रोजी दुपारी बाराच्या सुमारास कोथरूडमधील सुतारदार परिसरात कुंडलिक आणि स्वप्निल केबल टाकण्याचे काम करीत होते. त्यावेळी त्यांना सुरक्षिततेच्या दृष्टीकोनातून कोणतीही साधणे पुरविण्यात आली नव्हती.परिसरातील हाय टेन्शनच्या तारांना केबलचा स्पर्श झाल्यामुळे दोघेही गंभीररित्या जखमी झाले. उपचारादरम्यान, त्यांचा मृत्यू झाल्याचे डॉक्टरांनी घोषित केले. दरम्यान, तपासाअंती एन पी केबल नेटवर्क मालकाने कामगारांसाठी सुरक्षितता न बाळगता खबरदारी घेतली नाही. त्यामुळे त्यांचा मृत्यू झाल्याप्रकरणी संबंधिताविरूद्ध गुन्हा दाखल करण्यात आला आहे. याप्रकरणी पोलिस उपनिरीक्षक किसन राठोड पुढील तपास करीत आहेत.