मुंबई- खुद्द बाळासाहेब ठाकरे यांच्या शिवसेनेचे नेते आणि खासदार संजय राऊत यांनी भाजप नेते नीतेश राणे यांच्याविरोधात अब्रुनुकसानीचा दावा दाखल केला आहे. संजय राऊतांनी नीतेश राणेंना नोटीस पाठवली आहे. यावर आता 4 जुलैरोजी शिवडी कोर्टात सुनावणी होणार आहे.नीतेश राणेंना कोर्टात आपले म्हणणे मांडावे लागणार आहे. त्यामुळे नीतेश राणे व संजय राऊतांमधील वाद आता न्यायालयात पोहोचला आहे.
संजय राऊत रोज पत्रकार परिषद घेऊन शिंदे गट व भाजपवर हल्लाबोल करतात. त्याला भाजपकडून नीतेश राणेंच्या माध्यमातूनही राऊत यांच्यावर आक्षेपार्ह शब्दातील वाक्ये वापरत हल्ला केला जात आहे. नीतेश राणे संजय राऊतांचे संपूर्ण नाव घेत तसेच, राऊतांचा एकेरी उल्लेख करत सडकून टीका करत असतात. आतापर्यंत नीतेश राणेंनी संजय राऊतांवर अनेक गंभीर आरोप केले आहेत. आतापर्यंत संजय राऊतांनी या आरोपांना प्रत्युत्तर दिलेले नाही. नीतेश राणेंचा उल्लेख करणेही संजय राऊत टाळतात. आता मात्र संजय राऊतांनी नीतेश राणेंविरोधात थेट कायदेशीर कारवाई करण्याचा पवित्रा घेतला आहे. याचे पुढे काय होते?, हे पाहणे महत्त्वाचे ठरणार आहे.दरम्यान, राऊतांनी अब्रुनुकसानीचा दावा दाखल केल्यावर आता भाजप नेते, शिंदे गट देखील तसेच पाऊल उचलण्याची शक्यता आहे. दरम्यान, नीतेश राणेंविरोधात आदित्य ठाकरेंचे निकटवर्तीय राहुल कनाल यांनी देखील दावा दाखल केला होता.
आतापर्यंत नीतेश राणेंनी संजय राऊतांवर अनेकदा वादग्रस्त टीका केली आहे. नीतेश राणेंनी संजय राऊतांची तुलना गौतमी पाटीलशी केली होती. नीतेश राणे म्हणाले होते, संजय राऊत हे महाविकास आघाडीची गौतमी पाटील आहे. गौतमी पाटील ज्याप्रमाणे लोकांची करमणूक करते. त्याचप्रमाणे संजय राऊत रोज सकाळी टीव्हीवर येऊन आपणही लोकांचे करमणूक करत असल्याचा दावा करतात. माझी गौतमी पाटील यांना विनंती आहे की, त्यांनी आपल्याकडील थोडे पावडर व मेकअपचे सामान संजय राऊतांना पाठवून द्यावे. संजय राऊतांना ते कामी येईल. थोडासा चेहरा चांगला होईल. तसेच, ठाकरे गटाचे नेते संजय राऊत यांनी चाटूगिरीमध्ये पीएचडी केली आहे. त्यामुळेच सध्या ते रोज सकाळी टीव्हीवर येऊन काँग्रेसची भूमिका मांडत आहेत, असा हल्लाबोलही नीतेश राणेंनी केला होता.दंगलींचे मास्टरमाईंट हे कलानगर येथे बसलेले असल्याचा आरोप नीतेश राणे यांनी केला होता. तसेच, राऊत हे मुस्लिम लीगचे प्रवक्ते असल्याचा टोलाही राणेंनी लगावला होता. या सर्व आरोपांविरोधात संजय राऊतांनी आता नीतेश राणेंविरोधात कोर्टात धाव घेतली आहे.