पुणे-मराठवाडा मुक्तीसंग्राम दिनानिमित्त येत्या 17 सप्टेंबर रोजी पिंपरी-चिंचवड आणि पुणे शहरातील 10 मराठवाडा संघटनांतर्फे संयुक्तपणे विविध कार्यक्रमांचे आयोजन करण्यात येणार आहे. त्यासाठीची विचारमंथन व नियोजन बैठक नुकतीच रहाटणीतील बळीराज मंगल कार्यालय येथे संपन्न झाली. या बैठकीला कला-क्रीडा, साहित्यिक, उद्योजक, व्यापारी , ज्येष्ठ नागरीक, राजकीय, सामाजिक क्षेत्रात कार्यरत असलेले मराठवाडयातील 470 बांधव उपस्थित होते.
शहीद जवानांना श्रद्धांजली वाहून नियोजन समितीची बैठक सुरु करण्यात आली. यामध्ये मराठवाडयातील बांधवांचे आर्थिक, सामाजिक प्रश्न कोणत्या मार्गाने सोडवता येतील, यावर विचारमंथन करण्यात आले. तसेच कार्यक्रम कोणत्या स्वरूपात करावा कसा करावा याविषयी चर्चा झाली. मराठवाडयातील 10 संघटना मिळून 17 सप्टेंबर मराठवाडा मुक्ती संग्राम एकसंघ समितीद्वारे मराठवाडा मुक्तिदिन साजरा करणार आहेत. तसेच अनेक बांधवांच्या सूचनाही यावेळी घेण्यात आल्या. मराठवाडा मुक्तीसंग्राम दिनानंतर मराठवाडा भवन तयार होईपर्यंत प्रत्येक बांधवाने आठवड्यातून किमान एक तास आपल्या भवनासाठी देणार असल्याची शपथही यावेळी घेण्यात आली.
