पुणे-बीड जिल्ह्यातील मस्साजोग येथील सरपंच संतोष देशमुख हत्या प्रकरणात फरार आरोपींपैकी दोन आरोपींना बेड्या ठोकण्यात पोलिसांना यश आले आहे. सुदर्शन घुले, सुधीर सांगळेला पुण्यातून पोलिसांनी ताब्यात घेतले आहे,
दरम्यान फरार तिसरा आरोपी कृष्णा आंधळे अजून पोलिसांना सापडलेला नाही. प्रयत्न करून सुद्धा तिसरा आरोपीला पोलिसांना ताब्यात घेता आले नाही.
केज तालुक्यातील मस्साजोगचे सरपंच संतोष देशमुख यांच्या अपहरण करून निर्घृणपणे हत्या केल्याची घटना 9 डिसेंबर रोजी घडली होती. याप्रकरणी केज पोलिस ठाण्यात सुदर्शन चंद्रभान घुले, कृष्णा शामराव आंधळे, सुधीर ज्ञानोबा सांगळे, महेश सखाराम केदार, जयराम माणिक चाटे, प्रतिक भीमराव घुले, विष्णू महादेव चाटे या सात जणांविरुद्ध गुन्हा दाखल करण्यात आला आहे.
सरपंच संतोष देशमुख हत्याकांडातील गुन्हेगारांना न्यायालयातून फाशीची शिक्षा होईपर्यंत वाट पाहण्यात थांबण्यापेक्षा अशा या फाळकुट दादांना भर चौकात गोळ्या घालून त्यांचे एन्काऊंटर करायला हवे. म्हणजे राज्यांमध्ये अशा प्रकारचे गुन्हेगारी डोके वर काढणार नाही. अशी मागणी शेतकरी नेते आमदार सदाभाऊ खोत यांनी केज तालुक्यातील मस्साजोग येथे केली.
मस्साजोग येथील सरपंच संतोष देशमुख हत्या प्रकरणातील आरोपी वाल्मीक कराड याने न्यायालयात आपल्याला 24 तास मदतनीस मिळावा यासाठी अर्ज दाखल केला होता. यामध्ये आपल्याला स्लीप ॲप्निया या नावाचा आजार असल्याचे त्याने म्हटले होते. या आजारात रुग्णाला रोज रात्री ऑक्सिजन सारखी एक मशीन लावली जाते. मात्र ही मशीन ऑक्सिजन नसून रुग्णाला झोप येण्यासाठी लावली जाते. ही मशीन लावण्यासाठी आणि इतर कामासाठी आपल्याला 24 तास मदतनीस मिळावा, अशी मागणी वाल्मीक कराडने न्यायालयाकडे केली होती. मात्र, त्याची ही मागणी न्यायालयाने फेटाळली आहे.
मस्साजोगचे संतोष देशमुख हत्याकांडातील फरार तीन आरोपींची माहिती देणाऱ्या व्यक्तीचे नाव गोपनीय ठेवून योग्य बक्षीस देण्याचे पोलिस विभागाने दोन दिवसांपूर्वी प्रसिद्धीपत्रकाद्वारे जाहीर केले होते .
सरपंच संतोष देशमुख हत्या प्रकरणानंतर कुटूंबीयांच्या मदतीसाठी मुख्यमंत्री देवेंद्र फडणवीस यांनी मुख्यमंत्री सहायता निधीतून विशेष बाब म्हणून 10 लाख रुपयांची आर्थिक मदत जाहीर केली होती. शुक्रवारी 10 लाख रुपयांच्या आर्थिक मदतीचा धनादेश केजचे तहसीलदार राकेश गिड्डे यांनी संतोष देशमुख यांच्या पत्नी अश्विनी देशमुख यांच्याकडे सुपूर्द केला.
