पुणे-पूर्ववैमनस्य वादातून टोळक्याने सार्वजनिक रस्त्यावर पार्क करण्यात आलेल्या नऊ वाहनांची तोडफोड करत नुकसान केल्याची घटना हडपसर भागातील काळेपडळ परिसरात घडली आहे. याप्रकरणी वानवडी पोलिसांनी पाच आराेपी विरुद्ध गुन्हा दाखल केला आहे.
याप्रकरणी साहिल कांबळे याच्यासह पाच आराेपी विरुद्ध भान्यास 324 (4), 189(2), 191 (2), 190,म.पाे.अ.37 (1), (3) सह 135 नुसार गुन्हा दाखल करण्यात आला आहे. अभिषेक उद्धव झगडे (वय 24, रा.स्वराज पार्क, म्हसोबा मंदिराजवळ, काळेपडळ, हडपसर ) याने वानवडी पोलीस ठाण्यात फिर्याद दिली आहे. आराेपी कांबळे आणि तक्रारदार झगडे यांच्यात काही दिवसांपूर्वी वाद झाले होते. झगडे रागाने बघत असल्याने कांबळे आणि साथीदार काळेपडळ भागात आल्यावर त्यांना शिवीगाळ करून परिसरात दहशत माजविली. तसेच लाकडी दांडके उगारून धमकावले. त्यानंतर दांडक्याने दोन कारसह टेम्पो, रिक्षांच्या काचा फोडल्या.तसेच दगडफेक करून कांबळे आणि साथीदार पसार झाले. या घटनेची माहिती मिळताच वरिष्ठ पोलीस निरीक्षक संजय पतंगे यांनी घटनास्थळी धाव घेतली.
पोलिसांनी आराेपी साहिल कांबळेला अटक केली. त्याच्याबरोबर असलेल्या साथीदारांचा शोध घेण्यात येत आहे. सहायक फौजदार एस साबळे पुढील तपास करत आहेत.पुणे शहरात मागील काही दिवसांपासून दहशत माजविण्याचे प्रकार वाढीस लागले आहेत. किरकोळ वादातून सामान्यांची वाहनांची तोडफोड केली जाते. उपनगरात अशा प्रकारच्या घटना सातत्याने घडतात. नागरिकांच्या वाहनांची तोडफोड करणाऱ्या टोळक्यांविरुद्ध कडक कारवाई करण्यात यावी, अशी मागणी नागरिकांनी केली आहे.
