मुंबई-उपमुख्यमंत्री देवेंद्र फडणवीस यांनी मला राज्यपाल करण्याचे आश्वासन दिले होते, असा मोठा दावा आमदार एकनाथ खडसे यांनी केला आहे. खडसे व फडणवीस यांच्यातील राजकीय मतभेद सर्वश्रूत आहे. त्यातच खडसेंनी हा दावा करून फडणवीस यांना एकप्रकारे आरोपीच्या पिंजऱ्यात उभे केले आहे.
एकनाथ खडसे एका मराठी वृत्तवाहिनीशी बोलताना म्हणाले, देवेंद्र फडणवीस यांनी मला एके दिवशी बोलावले होते. तेव्हा आम्ही दोघेच होतो. तेव्हा देवेंद्र फडणवीस म्हणाले, नाथाभाऊ तुमची मी राज्यपालपदासाठी शिफारस करतो. त्यावर मी त्यांना म्हणालो, देवेंद्रजी माझा यावर विश्वास बसत नाही. राज्यपाल केले तर आनंदाचीच गोष्ट आहे, पण माझा विश्वास बसत नाही. यावर देवेंद्र फडणवीस म्हणाले, मी माझ्या एकुलत्या एक मुलीची शपथ घेऊन सांगतो हा देवेंद्र फडणवीसचा शब्द आहे. पुढे काय झाले मला माहिती नाही. पण त्यांनी मला आश्वासन दिले होते. ही गोष्ट साधारण 2019 मधली आहे.
एकनाथ खडसे हे लोकसभा निवडणुकीपासूनच भाजप पक्षात प्रवेश करणार असल्याच्या चर्चा राजकीय वर्तुळात सुरू होत्या. तसेच त्यांनी दिल्लीत भाजपच्या ज्येष्ठ नेत्यांच्या भेटीही घेतल्या होत्या, मात्र अद्याप पक्ष प्रवेश झालेला नाही. यावर बोलताना एकनाथ खडसे म्हणाले, ज्यावेळी मी भाजपमध्ये जाण्याचा निर्णय घेतला तेव्हा माझी भाजपमध्ये जाण्याची इच्छा नव्हती. दिल्लीतील एका अतिज्येष्ठ नेत्यांनी मला फोन केला होता. दिल्लीत असताना भाजप पक्षाचे राष्ट्रीय अध्यक्ष जे. पी. नड्डा आणि विनोद तावडे यांच्या उपस्थितीत भाजप प्रवेश झाला होता. त्यावेळी रक्षा खडसेही उपस्थित होत्या. त्यांनीच माझ्या गळ्यात भाजपचा मफलर घातला होता. या घटनेला 5 ते 6 महीने झाले, मात्र अजूनही भाजपने माझा प्रवेश झाल्याचे घोषित केले नाही. त्यामुळे आता भाजपमध्ये जाण्याच्या मार्गावर मी फुली मारली आहे, असे त्यांनी स्पष्ट केले आहे.
एकनाथ खडसे पुढे म्हणाले, मी प्रवेश घेतो असे कधी म्हणालो नाही, मला प्रवेश घ्या असे सांगण्यात आले होते. त्यानंतरच मी शरद पवार आणि जयंत पाटील यांच्याशी यावर चर्चा करून गेलो होतो. मी 40 वर्ष भाजपमध्ये काम केले आहे. महाराष्ट्र पिंजून काढला आहे. सायकलवर फिरलो. इतके सगळे काम करून भाजपमध्ये मला प्रवेश द्या ही विनंती करणे माझ्यासाठी अतिशय अपमानास्पद आहे.
