करीष्मा चौक ते पौड फाटा मद्यधुंद टेम्पो चालकाने अनेकांना उडविले: महिलेचा मृत्यू, पती गंभीर

पुणे-मद्यधुंद टेम्पो चालकाने बेदरकारपणे वाहन चालवून 6 वाहनांना धडक दिली. एवढेच नाही तर दुचाकीवर वळण घेत असलेल्या एका दाम्पत्यालाही टेम्पो चालकाने जोरदार भीषण धडक दिली. या घटनेत गंभीर जखमी झालेल्या सहप्रवाशी महिलेचा मृत्यू झाला आहे.
गीतांजली श्रीकांत अमराळे (वय ३५, रा. शास्त्रीनगर) असे मृत महिलेचे नाव आहे. या घटनेत त्यांचे पती श्रीकांत अमराळे हे गंभीर जखमी झाले आहेत. याप्रकरणी पोलिसांनी टेम्पोचालक आशिष अनंत पवार (वय २६, रा. गणपती माथा, वारजे) याला अटक करण्यात आली आहे.
पोलिसांनी दिलेल्या माहितीनुसार, कर्वे रोडवरील करिश्मा चौकाकडून पौड फाट्याकडे टेम्पो भरधाव वेगाने जात होता. त्याने करिश्मा चौकाजवळ एका वाहनाला धडक दिली. त्यावेळी तेथील बाल तरुण मंडळाची आरती सुरु होती. तेथे जमलेल्या लोकांंच्या शेजारुन तो टेम्पो तसाच भरधाव वेगाने पुढे निघून गेला. पुढे त्याने सिग्नलला रिक्षा, चारचाकी, दोन ते तीन दुचाकी वाहनांना धडक दिल्यामुळे काही जण जखमी झाले. त्याचवेळी पौड फाटा चौकात दुचाकीस्वार श्रीकांत अमराळे हे पौड रोड वरुन कर्वेरोडला वळत होते. त्यावेळी टेम्पो चालक आशिषने त्यांच्या गाडीला जोरात धडक दिली. त्यामुळे श्रीकांत यांची पत्नी गीतांजली अमराळे गंभीर जखमी झाल्या.
अपघाताचा आवाज ऐकताच परिसरातील एरंडवणा मित्र मंडळ, बाल तरुण मंडळ, अचानक मित्र मंडळाचे कार्यकर्ते धावून आले. त्यांनी जखमींना तातडीने रुग्णालयात नेले. मात्र, उपचारापूर्वी गीतांजली अमराळे यांचा मृत्यु झाल्याचे डॉक्टरांनी घोषित केले. श्रीकांत अमराळे हे मनसेचे कार्यकर्ते असून शास्त्रीनगरमधील संगम मित्र मंडळाचे ते पदाधिकारीही आहेत. गौरीसाठी लागणारे साहित्य आणण्यासाठी ते पत्नीबरोबर जात असताना अपघात झाला. त्यामुळे गीतांजली अमराळे यांचा मृत्यू झाला. याप्रकरणी अलंकार पोलीस अधिक तपास करीत आहेत.