पुणे- येथील संकल्प सैनिक अकॅडमीची सहल देवगड येथे आली होती. देवगड समुद्रात उतरले असताना 5 जण बुडाले आहेत. पाण्याचा अंदाज न आल्याने ही दुर्घटना घडली. यातील 4 जणांचे मृतदेह सापडले. यातील एकाला वाचवण्यात यश आले. अद्याप एकजण बेपत्ता आहे.
दरम्यान देवगड येथील समुद्र किनारा हा खोल नाही. हा पर्यटकांसाठी सुरक्षित किनारा म्हणून ओळख आहे. आतापर्यंत तारकर्ली, देवबाग, शिरोडा, वेळागर येथे अशा घटना घडल्या आहेत. देवगड समुद्रात अशी पहिलीच मोठी घटना आहे.
नेमकी घटना काय?
पुणे येथील खासगी सैनिक अकॅडमीचे विद्यार्थी देवगड समुद्र किनाऱ्यावर पर्यटनासाठी आले होते. यातील 5 पर्यटक बुडाले असून चौघांचे मृतदेह मिळाले तर एक जण बेपत्ता असल्याची माहिती समोर येत आहे. ही घटना दुपारी तीन ते चार वाजण्याच्या सुमारास घडली असल्याची माहिती स्थानिक पोलिसांनी दिली आहे. यात मृत्यू झालेल्यामध्ये 4 मुलींचा समावेश असून तर एक मुलगा बेपत्ता झाल्याची माहिती स्थानिक प्रशासनाने दिली आहे.
दरम्यान सिंधुदूर्ग जिल्ह्यातील देवगड समुद्र किनारी पर्यटनासाठी पिंपरी चिंचवड येथील सैनिक अकॅडमीची 35 जणांची सहल आली होती. समुद्र किनाऱ्यावर पोहचल्या नंतर आघोळ करण्याचा मोह पर्यटकांना आवरला नाही. त्यामूळे या गृपमधील काही जण समुद्रात आघोळीसाठी गेले. यातील पाच जण समुद्रातील पाण्याचा अंदाज न आल्याने बुडाले आहेत. या घटनेची माहिती मिळण्यास पोलिस निरीक्षक निळकंठ बगळे यांच्यासह पोलिस सहकारी , तहसीलदार रमेश पवार नगराध्यक्ष साक्षी प्रभू घटना स्थळी दाखल झाले आहेत. बेपत्ता मुलाचा शोध सुरू करण्यात आला आहे.
या घटनेतील सर्व मृतदेह देवगड ग्रामीण रुग्णालयात हलविण्यात आले आहेत. यात मृतांमध्ये प्रेरणा डोंगरे, अंकिता गालटे, अनिशा पडवळ, पायल बनसोडे यांचा समावेश आहे. तर राम डिचोलकर अजूनही बेपत्ता असून पोलिस स्थानिकांच्या मदतीने शोध घेत आहेत.
