पुणे-नॅशनल इंटेलिजन्स एजन्सीने (NIA) शनिवारी सकाळी महाराष्ट्र व कर्नाटक या दोन राज्यांत एकूण 44 ठिकाणी छापेमारी केली. त्यात जवळपास 13 जणांना अटक करण्यात आल्याची माहिती ‘एएनआय’ या वृत्तसंस्थेने दिली आहे. अटक करण्यात आलेले संशयित ISIS या दहशतवादी संघटनेशी संबंधित असल्याचा दावा केला जात आहे.
तपास संस्थेने महाराष्ट्रात 43 आणि कर्नाटकात एका ठिकाणी शोधमोहीम राबवली. संस्थेने ठाणे ग्रामीणमध्ये सर्वाधिक 31 ठिकाणी, पुण्यात दोन, ठाणे शहरात 9, भाईंदरमध्ये एक आणि कर्नाटकातील एका ठिकाणी छापे टाकले.
तपास यंत्रणेतील सूत्रांनी दिलेल्या माहितीनुसार, एनआयएने ISIS शी संबंधित नेटवर्क शोधून काढले आहे, जे भारतात ISIS ची विचारधारा पसरवण्याचा प्रयत्न करत होते. यामध्ये परदेशात बसलेल्या इसिसच्या हस्तकांची मदत घेतली जात होती.
भारतात दहशतवादी कारवाया करणे हा त्यांचा उद्देश होता. हे लोक भारतातील ISIS विचारसरणीने प्रभावित तरुणांना आपल्या संघटनेत सामील करायचे. त्यांना आयईडी बनवण्याचे प्रशिक्षण देण्यात येत होते.
ISIS मॉड्यूल प्रकरणात पुण्यातून 7 आरोपींना पकडण्यात आले
एनआयएने यापूर्वी ISIS मॉड्यूल प्रकरणी पुण्यातही कारवाई केली होती. येथून सात जणांना अटक करण्यात आली. 6 नोव्हेंबर रोजी या 7 आरोपींविरुद्ध आरोपपत्र दाखल करण्यात आले. सातही आरोपी उच्चशिक्षित असल्याचे 12 नोव्हेंबर रोजी उघड झाले.
हे लोक नामांकित कंपन्यांमध्ये काम करायचे आणि इम्प्रोव्हाईज्ड एक्सप्लोझिव्ह डिव्हाईस (आयईडी) बनवण्यासाठी कोडवर्डमध्ये बोलायचे. एनआयएने कोर्टात 4 हजार पानांचे आरोपपत्र दाखल केले आहे.
याशिवाय आरोपींनी वॉशिंग मशिन टायमर, थर्मामीटर, स्पीकर वायर, 12 वॉटचा बल्ब, 9 वॅटची बॅटरी, फिल्टर पेपर, माचिस आणि बेकिंग सोडा यासारख्या सहज उपलब्ध वस्तूंचा आयईडी बनवण्यासाठी वापर करत होते.
आरोपींनी महाराष्ट्र, गोवा, केरळ आणि कर्नाटकात दहशतवादी हल्ले घडवून आणण्यासाठी रेकी केली होती. त्यासाठी फोटोग्राफी आणि व्हिडीओग्राफीसाठीही त्यांनी ड्रोनचा वापर केला होता, तो ड्रोनही एजन्सीने जप्त केला आहे.
पुणे ISIS मॉड्यूल प्रकरण काय आहे?
या वर्षी 18 जुलै रोजी पुणे पोलिसांनी शाहनवाज आणि मध्य प्रदेशातील दोन लोकांना – मोहम्मद इम्रान खान आणि मोहम्मद साकी यांना पुण्यातील दुचाकी चोरीप्रकरणी अटक केली होती. पोलिस त्याला त्याच्या लपून बसलेल्या ठिकाणी चौकशीसाठी घेऊन जात असताना शाहनवाजने पोलिसांच्या गाडीतून उडी मारून पलायन केले.
मोहम्मद इम्रान खान आणि मोहम्मद साकी यांच्या चौकशीदरम्यान हे दोघेही सुफा दहशतवादी टोळीचे सदस्य असल्याची माहिती पोलिसांना मिळाली. एप्रिल 2022 मध्ये राजस्थानमध्ये एका कारमध्ये स्फोटके सापडल्याप्रकरणी तेथील पोलिस त्याचा शोध घेत आहेत.
त्यानंतर पोलिसांनी या प्रकरणाला पुणे ISIS मॉड्यूल केस असे नाव दिले. या प्रकरणात पोलिसांनी आणखी तीन दहशतवाद्यांना मोस्ट वाँटेड यादीत ठेवले होते. पुण्याचा तल्हा लियाकत खान आणि दिल्लीचा रिझवान अब्दुल हाजी अली आणि अब्दुल्ला फैयाज शेख अशी त्यांची नावे आहेत.
या प्रकरणाचा मास्टरमाइंड आणि फायनान्सर हा आयटी इंजिनीअर
एनआयएने सांगितले की, इम्रान, युनूस आणि शाहनवाज यांचे पुण्यातील एका आयटी फर्ममध्ये काम करणाऱ्या अभियंता जुल्फिकार अली बोरदवाला यांच्याशी संबंध आहेत. इसिसशी संबंधित एका प्रकरणात जुल्फिकारला 3 जुलै रोजी अटक करण्यात आली होती. तो मुंबईच्या आर्थर रोड कारागृहात बंद आहे.
एनआयएच्या अधिकाऱ्याने दिव्य मराठी नेटवर्कला सांगितले की, झुल्फिकार हा या प्रकरणाचा मास्टरमाईंड आणि फायनान्सर आहे. त्याने इम्रान, युनूस आणि शाहनवाज यांना प्रशिक्षण देऊन पैसे पाठवले. इम्रानला पैसे पोहोचवणाऱ्या कादिर दस्तगीर पठाणलाही पोलिसांनी अटक केली आहे.
डॉक्टर अदनान गरीब तरुणांना ISIS मध्ये सामील होण्यासाठी प्रवृत्त करत
चौघांच्या चौकशीदरम्यान एनआयएला डॉ.अदनानचे नाव मिळाले. एनआयएने त्याच्या फ्लॅटवर छापा टाकला तेव्हा ISIS शी संबंधित कागदपत्रे सापडली. एनआयएने अदनानचे सर्व इलेक्ट्रॉनिक गॅझेट जप्त केले. केंद्रीय तपास संस्थेशी संबंधित एका अधिकाऱ्याने सांगितले की, अदनानकडे सापडलेल्या कागदपत्रांवरून त्याचे इसिसशी संबंध असल्याचे समोर आले आहे. त्यात गरीब तरुणांना दहशतवादी संघटनांशी जोडल्याचा तपशीलही आहे.
याशिवाय 4 आरोपींकडून ज्यू कम्युनिटी सेंटरची छायाचित्रे जप्त करण्यात आली आहेत. यामुळे केवळ भारतच नाही तर इस्रायलमधील लोकही इसिसचे लक्ष्य असल्याचे स्पष्ट झाले. यानंतर मुंबई पोलिसांनी कुलाब्यातील चाबड हाऊसची सुरक्षा वाढवली. 26 नोव्हेंबर 2008 रोजी मुंबईवर झालेल्या दहशतवादी हल्ल्यादरम्यान चाबड हाऊसवरही हल्ला झाला होता.
अदनानसह पाच आरोपींची चौकशी केल्यानंतर एनआयए अकिफ अतिक नाचनपर्यंत पोहोचली. तो आयईडी चाचणी करण्यात तज्ञ आहे. त्यानेच इम्रान आणि मोहम्मद युनूस यांना लपवले होते. मुंबईतील बोरिवली, ठाणे आणि भिवंडी येथे छापे टाकून अकिफला अटक करण्यात आली.
दहशतवाद्यांना ड्रोनद्वारे हवाई स्फोट घडवायचा होता…
महाराष्ट्र एटीएसच्या अधिकाऱ्याने सांगितले की, पकडलेल्या दहशतवाद्यांकडून 500 जीबी मेमरी असलेला पेन ड्राइव्ह जप्त करण्यात आला आहे. त्यांचा डिलिट केलेला डेटा रिकव्हर करत आहे. चौकशीत त्याला हल्ल्याचे वेगवेगळ्या पद्धतीचे प्रशिक्षण दिल्याचे उघड झाले. पुणे, कोल्हापूर आणि सातारा येथील जंगलात बॉम्बस्फोटाची चाचणी घेण्यात आली. ते जंगलात तंबूत राहत होते. ते ड्रोनच्या माध्यमातून हवाई स्फोटाचे तंत्र शिकत होते.
अधिकाऱ्याने दिलेल्या माहितीनुसार, अटक करण्यात आलेल्या आरोपींपैकी एक मोहम्मद इम्रान हा ग्राफिक्स डिझायनर आहे. एनआयएने त्याच्यावर 5 लाखांचे बक्षीस ठेवले होते. राजस्थानच्या चित्तोडगडमध्ये त्याच्यावर गुन्हा दाखल आहे. इम्रान आणि त्याच्या दोन साथीदारांविरुद्ध कोथरूड पोलिस ठाण्यात चोरी, बनावट कागदपत्रे, भारतीय शस्त्र कायदा आणि महाराष्ट्र पोलिस अधिनियम या कलमांखाली गुन्हा दाखल करण्यात आला. नंतर सर्वांविरुद्ध UAPA अंतर्गत गुन्हा दाखल करण्यात आला.
अधिकाऱ्याने सांगितले की, आरोपींकडून जप्त केलेल्या वस्तू आणि त्यांचे प्रशिक्षण हे सूचित करते की ते लवकरच मोठा हल्ला करण्याची योजना आखत होते.
कोंडव्याच्या फ्लॅटमध्ये आयईडी बनवण्याचे प्रशिक्षण
न्यायालयात दिलेल्या रिमांड अर्जात एनआयएने म्हटले आहे की, आरोपींनी इसिसच्या दहशतवादी कारवाया पुढे नेण्याचा कट रचला होता. ते देशात इसिसचे महाराष्ट्र मॉड्यूल तयार करत होते. एनआयएच्या एका अधिकाऱ्याने सांगितले की, अकिफ अतिक नाचनने आयईडी बनवण्यासाठी वापरलेली सामग्री खरेदी केली होती. तो अनेक दिवस इम्रान आणि युनूसच्या कोंडवा फ्लॅटमध्ये राहून त्यांना प्रशिक्षण देत असे. त्याने 2022 मध्ये बॉम्ब बनवण्याचे प्रशिक्षण दिले होते. यामध्ये आयईडीचा डेमोही बनवून दाखवण्यात आला.
अधिकाऱ्याने सांगितले की, अटक करण्यात आलेल्या आरोपींव्यतिरिक्त या प्रशिक्षणात आणखी काही लोक सहभागी झाले होते का. त्यांचा शोध सुरू आहे. हे सर्वजण इसिसच्या सूचनेनुसार काम करत होते.
नाचनच्या घरातून जप्त झालेल्या कागदपत्रांमध्ये सापडले प्रशिक्षणाचे पुरावे
एनआयएच्या अधिकाऱ्याने सांगितले की, अकिफ अतिक नाचनचे घर पडगा, ठाण्यात आहे. घरातून अनेक मोबाईल फोन, काही हार्डडिस्क आणि हस्तलिखित कागदपत्रे सापडली आहेत. सर्वांची चौकशी केली जात आहे. यामध्ये आयईडी प्रशिक्षणाची काही कागदपत्रेही आहेत.
ISIS भारतात आपले अस्तित्व वाढविण्याचा प्रयत्न करत असल्याचे या आरोपींच्या अटकेवरून स्पष्ट झाले आहे. सर्व आरोपी कोंडवा भागातील आहेत. 5 लाख लोकसंख्या असलेला कोंडवा 2008 पूर्वी बंदी घातलेल्या सिमी आणि इंडियन मुजाहिदीन या दहशतवादी संघटनांचा बालेकिल्ला होता. येथे 300 हून अधिक दहशतवादी सक्रिय असल्याची माहिती मिळाली होती.
2010 मध्ये पाकिस्तानी दहशतवादी संघटना लष्कर-ए-तैयबाच्या दोन दहशतवाद्यांना कोंडवा येथून अटक करण्यात आली होती. बेंगळुरू येथील भारतीय विज्ञान संस्थेवर हल्ला करण्याचा त्यांचा कट होता. 2014 मध्ये एनआयएने एका व्यक्तीला अटक केली होती. 2022 मध्ये, NIA ने ISIS मॉड्यूलशी संबंधित असलेल्या 5 लोकांना अटक केली.
