जयपूर-राष्ट्रीय राजपूत करणी सेनेचे अध्यक्ष सुखदेव सिंह गोगामेडी यांची जयपूरमधील घरात घुसून गोळ्या झाडून हत्या करण्यात आली. मंगळवारी, भरदिवसा, 3 आरोपींनी गोगामेडींवर गोळीबार केला, नंतर ते पळून गेले. गोगामेडी यांना मेट्रो मास हॉस्पिटलमध्ये नेले असता डॉक्टरांनी त्यांना तपासून मृत घोषित केले.
गोगामेडी यांच्यासोबत घटनेवेळी उपस्थित असलेले गार्ड अजित सिंग हे गोळी लागल्याने गंभीर जखमी झाले आहेत. त्यांना गोगामेडी यांच्या घरी घेऊन गेलेल्या तरुणाचाही हल्लेखोरांनी केलेल्या गोळीबारात मृत्यू झाला. गँगस्टर रोहित गोदाराने हत्येची जबाबदारी घेत सोशल मीडियावर पोस्ट शेअर केली आहे.
पोलिसांनी दिलेल्या माहितीनुसार, सुखदेव सिंह गोगामेडी यांचे घर श्यामनगर जनपथवर आहे. मंगळवारी दुपारी दीडच्या सुमारास तीन हल्लेखोर त्यांच्या घरी पोहोचले. आधी ते सोफ्यावर बसले आणि गोगामेडींशी बोलू लागले. सुमारे 10 मिनिटांनंतर दोन हल्लेखोर उठले आणि त्यांनी गोळीबार केला. गोळीबार सुरू असताना गोगामेडींच्या गार्डने त्यांना वाचवण्याचा प्रयत्न केला. त्याच्यावरही हल्लेखोरांनी गोळीबार केला.
तेथून निघताना एका आरोपीने गोगामेडी यांच्या डोक्यात गोळी झाडली. हल्लेखोरांनी केलेल्या गोळीबारात नवीनला गोळी लागली आणि त्याचाही मृत्यू झाला.
गोळीबारानंतर दोन हल्लेखोर धावत रस्त्यावर आले आणि त्यांनी कार थांबवून लुटण्याचा प्रयत्न केला. त्यांनी चालकाला पिस्तूल दाखवताच चालकाने गाडी दामटली. यादरम्यान मागून येणाऱ्या स्कूटीस्वाराला हल्लेखोरांनी लक्ष्य केले. स्कूटरस्वाराला गोळ्या घालून जखमी करून स्कूटरसह पळ काढला. माहिती मिळताच श्यामनगर पोलीस घटनास्थळी पोहोचले.
येथे गोगामेडी यांच्या संघटनेशी संबंधित लोकांनी रुग्णालयाबाहेर आंदोलन करण्यास सुरुवात केली.सुखदेव सिंग गोगामेडी यांच्या हत्येनंतर डीजीपी उमेश मिश्रा यांनी राज्यभरातील पोलीस अधिकाऱ्यांना सतर्क राहण्याच्या सूचना दिल्या आहेत. मारेकऱ्यांना पकडण्यासाठी नाकाबंदी करण्याच्या सूचना त्यांनी दिल्या आहेत. विशेष दक्षतेसोबतच संबंधित जिल्ह्यांमध्ये सुरक्षा वाढवण्यासही सांगण्यात आले आहे.
येथे घटनेनंतर गँगस्टर रोहित गोदाराच्या नावाने तयार केलेल्या फेसबुक पेजने या हत्येची जबाबदारी स्वीकारली आहे. पोस्टमध्ये लिहिले- राम राम, सर्व भावांना, मी रोहित गोदारा कपुरीसर, गोल्डी ब्रार आहे. बंधूंनो, आज सुखदेव गोगामेडी यांची हत्या झाली. याची संपूर्ण जबाबदारी आम्ही घेतो. आम्ही ही हत्या घडवून आणली आहे.
सुखदेव सिंह गोगामेडी हे राष्ट्रीय राजपूत करणी सेनेचे राष्ट्रीय अध्यक्ष होते. याआधी ते दीर्घकाळ राष्ट्रीय करणी सेनेशी संबंधित होते. या वादानंतर राष्ट्रीय राजपूत करणी सेना या नावाने वेगळी संघटना स्थापन करण्यात आली.
करणी सेनेपासून वेगळे होऊन या संघटनेची स्थापना
2006 मध्ये पहिल्यांदा करणी सेनेची स्थापना झाली. पुढे लोकेंद्रसिंग कालवी यांनी राजपूत करणी सेना ही वेगळी संघटना स्थापन केली. 2012 मध्ये सुखदेव सिंह गोगामेडी यांना श्री राजपूत करणी सेनेचे प्रदेशाध्यक्ष बनवण्यात आले होते, मात्र नंतर कालवी आणि गोगामेडी यांच्यात वाद झाला. सुखदेव सिंह गोगामेडी यांनी 2017 मध्ये राष्ट्रीय राजपूत करणी सेना या नावाने वेगळी संघटना स्थापन केली होती. श्री राजपूत करणी सेनेचे राष्ट्रीय अध्यक्ष महिपाल सिंह मकराना आहेत. सुखदेव सिंह हे राष्ट्रीय राजपूत करणी सेना नावाची संघटना सांभाळत होते.
कोण आहे रोहित गोदारा
गोगामेडीच्या हत्येची जबाबदारी स्वीकारणारा गँगस्टर रोहित गोदारा हा गँगस्टर लॉरेन्स बिश्नोईच्या टोळीचा हस्तक आहे. त्याच्यावर पोलिसांनी एक लाख रुपयांचे बक्षीस जाहीर केले आहे. गोदारा 2022 मध्ये बनावट नावाने पासपोर्ट बनवून दुबईला पळून गेला होता.