वेगळ्या रुपात व अनोख्या पद्धतीने विचारांची शिवजयंती
पुणे- वेगळ्या अनुख्या रुपात साजरी करूयात विचारांची शिवजयंती… जीवनामध्ये घडवूयात चांगल्या परिवर्तनाची क्रांती या ओळींच्या माध्यमातून सामाजिक भान राखत ध्वनीवर्धक डिजे, वाहतुकीस अडथळा व अनेक निरुपयोगी बाबींना डावलून एकता मित्र मंडळाच्या वतीने तळजाई टेकडी येथे मॉर्निंग वॉकला येणाऱ्या नागरिकांना विचारांच्या शिवजयंतीची पत्रके वाटप करत अनोख्या पद्धतीने शिवजयंती साजरी करण्यात आली. एक दिवस शिवराय आपल्यासोबत आहेत या अनुभूतीने, आनंदाने आणि शिवविचारांनी प्रेरित होऊन कमीत कमी आजच्या दिवशी वेळ आली तरी खोटे बोलणार नाही, आजच्या दिवशी जरी एखादे व्यसन मला असेल, तरी ते मी करणार नाही, प्रत्येक माता-भगिनींचा सन्मान करेल, कोणाच्याही प्रती कटुता आणि द्वेषाची भावना बाळगणार नाही, शर्मेने स्वतःची आणि कुटुंबाची मान खाली जाईल असे कोणतेही गैरवर्तन करणार नाही, मी जेथे कुठे नोकरी – व्यवसाय करत असेल तेथे रोजच्या हून अधिक १००% टक्के योगदान देईल, भ्रष्टाचाराचा एक रुपयाही आज तरी घरी नेणार नाही, स्वधर्माचा अभिमान बाळगून परधर्माचा सन्मान राखील. असे अनेक क्षण आजच्या दिवशी शिवरायांना जगून दाखवूयात याप्रमाणे सुरुवात एक दिवसाची, शिव छत्रपतींच्या छत्रछायेखाली स्वयंशासित जीवन जगण्याची असा संदेश सर्वत्र पोहचविण्यासाठी अशा वेगळ्या रूपात शिवजन्मोत्सव सोहळा पार पडला. या आगळ्या वेगळ्या विचारांच्या शिवजयंतीचे सर्व नागरिकांकडून आणि अनेक स्तरावरून कौतुकाची थाप मिळाली.
या विचारांच्या शिवजयंती सोहळ्यामध्ये एकता मित्र मंडळाचे ज्येष्ठ कार्यकर्ते व संकल्पना मांडणारे संतोष वाडघरे, अविनाश खंडागळे, अध्यक्ष सुधीर ढमाले व तसेच बाल युवा कार्यकर्ते आदर्श चावट, देवांग करकंडे, प्रथमेश शिंदे, हर्षद खंडागळे, सोफिया शेख, साहिल बोबडे, चैतन्य बोबडे, संचित शिंदे, ओवी ढमाले यांनी सहभागी घेतला.