राष्ट्रवादीच्या अजित पवार गटाचे नेते प्रफुल्ल पटेल यांच्याविरोधात सुरू असलेल्या कथित घोटाळा प्रकरणाचा तपास सीबीआयने आता बंद केल्याची माहिती समोर येत आहे. प्रफुल्ल पटेल यांच्यावर यूपीए सरकारमध्ये नागरी विमान वाहतूक मंत्री असताना एअर इंडियासाठी विमान खरेदी व्यवहारात अनियमितता असल्याचा आरोप करण्यात आला होता.
आरोपांनुसार प्रफुल्ल पटेल यांच्यावर सरकारचे ८४० कोटी रुपयांचे नुकसान झाल्याचा ठपका ठेवण्यात आला होता. प्रफुल्ल पटेल यांच्याशी संबंधित प्रकरण हे सीबीआयकडे प्रलंबित होते. मागील सात ते आठ वर्षांपासून सीबीआयकडून याबाबत तपास केला जात होता. मात्र, आता सीबीआयने क्लोजर रिपार्ट दिल्याने पटेल यांना दिलासा मिळाला आहे. दरम्यान, विराेधकांनी यावर टीका केली असून भाजपसोबत हातमिळवणी केली की अनेकांची मागची चौकशी बंद होते, असे म्हटले आहे.प्रफुल्ल पटेल यांच्याविरोधात कोणताही पुरावा सापडला नसल्याचे सीबीआयने क्लाेजर रिपोर्टमध्ये म्हटले आहे. २०१७ मध्ये पटेलांवर सीबीआयने गुन्हा दाखल केला होता. मंत्रिपदावर असताना प्रफुल्ल पटेल यांनी भ्रष्टाचार करून कोट्यवधी रुपयांचा घोटाळा केल्याचा हा कथित आरोप होता. तेव्हापासून सीबीआयची चौकशी आणि याप्रकरणी तपास सुरू होता.