पिंपरी चिंचवड दि.३: म्हाळुंगे येथे तीन वर्षीय बालकावर लैंगिक अत्याचार करून खून करण्यात आल्याच्या घटनेच्या पार्श्वभूमीवर, विधानपरिषद उपसभापती व शिवसेना नेत्या डॉ. नीलम गोऱ्हे यांनी आज पोलीस उपायुक्त कार्यालय, झोन-४, नियोजन नगर, तळेगाव दाभाडे येथे भेट देऊन पोलिस अधिकाऱ्यांसोबत सविस्तर आढावा घेतला.
या प्रसंगी पिंपरी चिंचवड पोलीस उपायुक्त श्वेता खेडकर, सहायक पोलीस आयुक्त सचिन कदम, वरिष्ठ पोलीस निरीक्षक विजय ढमाल आदी अधिकारी उपस्थित होते.
डॉ. गोऱ्हे यांनी सांगितले की, म्हाळुंगे येथील घटना अत्यंत धक्कादायक आहे. पोलिसांकडून या प्रकरणाची सविस्तर माहिती घेण्यात आली. आरोपीविरोधात लवकरात लवकर दोषारोपपत्र दाखल करणे आवश्यक आहे. चाकण परिसरातही मुलीच्या अत्याचाराची घटना घडली आहे. त्यामुळे पोलिसांनी अशा समाजकंटकांवर सातत्याने लक्ष ठेवणे गरजेचे आहे.
पीडितांना तात्काळ समुपदेशनाची मागणी
पीडितांना तात्काळ समुपदेशन मिळणे आवश्यक असल्याचे डॉ. गोऱ्हे यांनी सांगितले. “पोलिसांना हे काम करावे लागते, पण ही जबाबदारी मुख्यतः महिला आणि बाल कल्याण विभागाची आहे. त्यांनी पुढाकार घ्यावा,” असे त्यांनी स्पष्ट केले.
लोकप्रतिनिधींनीही नवीन कायद्यांची माहिती घेऊन जागृती उपक्रम राबवावेत, असे आवाहन डॉ. गोऱ्हे यांनी केले.
कायद्याची अंमलबजावणी, पोलिस बळकटीकरणावर भर
डॉ. गोऱ्हे यांनी सांगितले की, सातत्याने कायदा व सुव्यवस्था विषय विधिमंडळात मांडला जात आहे. गुन्हेगारी पार्श्वभूमी असलेल्या व्यक्तींवर सातत्याने नजर ठेवणे, पोलिस दलातील कर्मचारी संख्या वाढवणे आणि आवश्यक साधनसामग्री पुरवणे गरजेचे आहे.
शक्ती कायद्याच्या अनेक तरतुदी बीएनएस कायद्यात समाविष्ट करण्यात आल्या आहेत. सात वर्षांच्या आत शिक्षा होण्यास अडचण येत असल्याने नोटीस देण्याच्या तरतुदीत बदल करून आरोपींना तात्काळ अटक व्हावी, अशी मागणी त्यांनी केली. परप्रांतीय कामगारांची नोंदणी व निगरानी ठेवणेही आवश्यक असल्याचे त्यांनी नमूद केले.
सोशल मीडियावरील बेजबाबदारपणा
समाज माध्यमांवर वाढता बेजबाबदारपणा, अश्लीलता आणि व्यंग्य शोषण याकडेही डॉ. गोऱ्हे यांनी लक्ष वेधले. “समाज माध्यमांचा वापर योग्य प्रकारे व्हावा,” असे आवाहन त्यांनी केले. दोषसिद्धीचे प्रमाण वाढत असले तरी ते ९० टक्क्यांपर्यंत नेणे गरजेचे असल्याचेही त्यांनी सांगितले.या बैठकीत पोलिस अधिकाऱ्यांनी डॉ. गोऱ्हे यांना प्रकरणाच्या तपासाबाबत सविस्तरपणे माहिती सादर केली.
