‘तारीख पे तारीख’ नको, थेट निलंबन करा! सुधीर मुनगंटीवारांचा भ्रष्ट अधिकाऱ्यांविरुद्ध एल्गार
मुंबई– केंज येथील पंतप्रधान आवास योजनेतील शासकीय अनुदानाच्या सवाचार कोटीच्या घोटाळ्याच्या नमिता मुंदडा यांनी विधानसभेत उपस्थित केलेल्या मुद्द्यावर मंत्री माधुरी मिसाळ यांच्या उत्तराने भाजपचे ज्येष्ठ नेते आमदार सुधीर मुनगुंटीवार आक्रमक झाल्याचे पाहायला मिळाले.
भारत माता माझी आई, पण इथे डोके ठेवायला जागा नाही, अशा शब्दांत आपल्या भावना व्यक्त करत भाजप नेते सुधीर मुनगंटीवार यांनी विधिमंडळात भ्रष्ट अधिकारी आणि संथ न्यायप्रक्रियेवर जोरदार प्रहार केला. केवळ चौकशीच्या नावाखाली भ्रष्टाचाराला पाठीशी घालणाऱ्या यंत्रणेवर त्यांनी तीव्र नाराजी व्यक्त केली. पंतप्रधान मोदी म्हणतात, ‘गरीबों के सम्मान में, मोदीजी मैदान में’. मात्र, जर सरकारी अधिकारी जनतेच्या पैशांची लूट करत असतील, तर त्यांच्यावर तात्काळ आणि कठोर कारवाई व्हायलाच हवी. चौकशी पूर्ण होईपर्यंत किंवा न्यायालयाचा निकाल येईपर्यंत संबंधित दोषी अधिकाऱ्याला पदावरून निलंबित का केले जात नाही? असा रोकडा सवाल त्यांनी विचारला. जोपर्यंत अशी कडक पावले उचलली जात नाहीत, तोपर्यंत भ्रष्ट अधिकाऱ्यांमध्ये धाक निर्माण होणार नाही. हायकोर्टात 56 लाखांहून अधिक केसेस प्रलंबित आहेत. न्यायालयाच्या माध्यमातून निकाल लागायला 50 वर्षे लागतील, अशी जनभावना झाली आहे. त्यामुळे ‘कोर्टाचा निकाल लागेल तेव्हा लागेल, पण तोपर्यंत संबंधित व्यक्तीला घरी बसवा’, अशी आक्रमक भूमिका त्यांनी घेतली.
तुम्ही किमान एवढे तरी उत्तर द्या की, जोपर्यंत कोर्टाचा निकाल लागत नाही, तोपर्यंत संबंधित दोषी व्यक्तीला निलंबित केले जाईल का? निकालाला कितीही वेळ लागला तरी चालेल, पण भ्रष्टाचाऱ्याला पदावर राहण्याचा अधिकार नाही.
