पुणे-राष्ट्रवादी कॉंग्रेस अजित पवार गटाच्या प्रवक्तेपदावरून रूपाली ठोंबरे यांची हकालपट्टी करण्यात आली आहे. त्यांची हकालपट्टी झाल्यानंतर शिवसेना ठाकरे गटाकडून थेट ऑफर आली आहे. रुपाली ठोंबरे यांनी शिवसेनेत यावे, आम्ही त्यांचे स्वागत करू, अशी ऑफर सुषमा अंधारे यांनी दिली आहे.सुषमा अंधारे म्हणाल्या, रूपाली ठोंबरे ही माझी चांगली मैत्रीण आहे आणि ती राहील. तिला कोणतीही भीती नाही, ईडी किंवा सीबीआयचा तिला बॅरेज नाही. सर्वार्थाने ती अतिशय क्लीन इमेज असलेली व्यक्ती आहे. अशी महिला कोणत्याही पक्षात येणे कोणालाही आवडेलच. त्यांनी शिवसेनेत येण्याची इच्छा व्यक्त करावी, आम्ही त्याचे स्वागत करू. पण माझ्या पक्षात ती यावी म्हणून तिच्या त्या पक्षात नुकसान व्हावे असा विचार करणारी मी नाही. जर तिच्या पक्षात तिला स्कोप मिळत असेल तर तिने तिथे काम करावे, असा सल्ला देखील अंधारे यांनी दिला आहे.
दरम्यान, अजित पवारांच्या राष्ट्रवादीच्या प्रवक्तेपदाची यादी जाहीर करण्यात आली आहे. त्यात अमोल मिटकरी आणि रूपाली ठोंबरे यांना वगळण्यात आले आहे. गेल्या काही दिवसांपासून राष्ट्रवादी पक्षात अंतर्गत वाद सुरू होते. रूपाली चाकणकर आणि रूपाली ठोंबरे पाटील यांच्यात देखील वाद सुरू आहेत. याचाच फटका रूपाली ठोंबरे यांना बसला असल्याचे बोलले जात आहे. तसेच भाजपवर सतत टीका करणाऱ्या अमोल मिटकरी यांना देखील प्रवक्ते पदावरून वगळण्यात आले आहे. विशेष म्हणजे मारहाण प्रकरणातील सुरज चव्हाण यांना प्रवक्तेपद पुन्हा देण्यात आले आहे.
