अभिनेत्री प्रणाली घोगरे ही हिंदी, साउथ, मराठी अशा वेगवेगळ्या भाषांतील चित्रपट मालिका आणि अल्बम सॉंग्स मध्ये दिसली आहे. मेरे रंग में रंगने वाली, चंद्रगुप्त मौर्य, राजा बेटा यांसारख्या हिंदी मालिकांमधून ती घरोघरी पोहोचली, यानंतर तिने रणांगण (मराठी), मंचूकुरुसेविलालो (तेलुगु), फस्ते फसाते (हिंदी), अरियावान (तमिळ), द केरला स्टोरीज (हिंदी) अशा विविध चित्रपटांमधून भूमिका केल्या असून हनुमान या वेब सिरीज मधील तिने साकारलेल्या मीना या भूमिकेसाठी तिला फिल्मफेअर तर्फे उत्कृष्ट अभिनेत्री साठी नामांकन मिळाले होते. नुकताच तिचा रांझा तेरा हिरीये हा हिंदी अल्बम प्रदर्शित झाला त्याला अल्पावधीतच एक मिलियन पेक्षा जास्त लोकांनी पाहिले, यानंतर तिचे चाहते तिला छोट्या पडद्यावर पाहण्यासाठी उत्सुक आहेत.
लवकरच ती झी मराठीवरील चल भावा सिटीत या शोमध्ये सहभागी होणार असून या शोचे सूत्रसंचालन सुप्रसिद्ध अभिनेता श्रेयस तळपदे करणार आहे, या शोमध्ये ग्रामीण आणि शहरी पार्श्वभूमी असणाऱ्या स्पर्धकांना एकत्र आणून प्रेक्षकांना ग्रामीण महाराष्ट्राची समृद्धी आणि संस्कृती दाखवली जाईल.
