पुणे-ड्युटी संपवून घरी चाललेल्या महिला अमलदाराने प्रसंगावधान दाखवित कोयताधारी हल्लेखोरांचा सामना करीत जखमींचा जीव वाचविला आहे. महिला पोलिस अमलदाराने कोयताधारी हल्लेखोराच्या हल्ल्यातून दोघा तरूणांना वाचवून आरोपींच्या मुसक्या आवळल्या आहेत. प्रसंगावधान राखत तिने वेळ न दडवता आरोपीच्या हातून कोयता हिसकावून घेत जखमी नागरिकांची सुटका केली. तातडीने पोलिसांना बोलावून घेत हल्लेखोरांच्या मुसक्या आवळल्या आहेत. या कामगिरीमुळे महिला अमलदाराचे पुणे पोलिस दलात कौतुक केले जात आहे .
चंदननगर पोलिस ठाण्यातील पोलिस अमलदार सीमा वळवी असे सदर महिला कर्मचारीचे नाव आहे. नागरिकांचा जीव वाचविल्याबद्दल पोलिस आयुक्त रितेश कुमार यांच्या हस्ते त्यांना गौरविण्यात आले. अपर आयुक्त रामनाथ पोकळे, अपर आयुक्त रंजनकुमार शर्मा, उपायुक्त अमोल झेंडे, उपायुक्त शशिकांत बोराटे, उपायुक्त संभाजी कदम, वरिष्ठ पोलिस निरीक्षक राजेंद्र लांडगे, पोलिस निरीक्षक, मनिषा पाटील यावेळी उपस्थित होते.
पोलिस अमलदार सीमा वळवी चंदननगर पोलिस ठाण्यात कार्यरत आहेत. २४ डिसेंबरला रात्री सव्वा अकराच्या सुमारास ड्युटी संपवून त्या घरी जात होत्या. त्यावेळी आनंदपार्क परिसरात काही तरूण आपआपसात वाद घालत होते. त्यावेळी त्यांनी थांबून संबंधितांना भांडण न करण्याचे सांगितले. दगड विटांनी एकमेकांना माराहण करु लागले. त्यावेळी अमलदार सीमा वळवी यांनी प्रसंगावधान राखुन गुन्हेगारांचा प्रतिकार केला. जखमी नागरिकांची सुटका करुन तात्काळ घटनास्थळी इतर पोलिस स्टाफ बोलावुन घेतला. भांडण करणार्या आरोपींचा पाठलाग करुन अवघ्या 20 मिनिटांमध्ये पाच जणांना ताब्यात घेतले. दगड, विटांनी मारहाण करणारे गुंडांना प्रतिकार करुन, जखमी नागरीकांचा जीव वाचविणार्या महिलेचे पुणे पोलिस दलात कौतुक होत आहे.
