पुणे-ताम्हिणी घाटात शनिवारी सकाळी भीषण अपघात झाला आहे. माणगाव ते पुणे दरम्यानच्या ताम्हीणी घाटात एक खासगी बस उलटल्याने मोठा अपघात झाला आहे. यामध्ये दोन महिलांचा मृत्यू झाला आहे. तर 55 प्रवासी जखमी झाले आहेत. पुण्याहून कोकणात जात असताना हा अपघात झाल्याची माहिती समोर आली आहे. 57 प्रवाशांना घेऊन ही बस सहलीला निघाली होती.
सकाळी साडेसातच्या सुमारास हा अपघात झाला आहे. तर जखमी प्रवाशांवर जवळच्या रुग्णालयात उपचार सुरू आहेत. अपघातानंतर तातडीने महाड, माणगाव इथून रुग्णवाहिका घटना स्थळाकडे रवाना झाल्या होत्या. दरम्यान, अपघातामुळे काही काळ विस्कळीत झालेली या मार्गावरची वाहतूक आता सुरळीत सुरू असल्याची माहिती पोलिसांनी दिली आहे.
ताम्हिणी घाटात अवघड वळणावर बस उलटली आहे. बसचालकाचे नियंत्रण सुटल्यामुळे बस रस्त्याच्या कडेला गेल्याने कोसळली. अपघातानंतर काही प्रवासी जखमी आहेत. तर काही प्रवासी बसमध्येच अडकले आहेत. ही बस पुण्याहून हरीहरेश्वरला सहलीला ही बस जात असताना कोंडेघर गावाजवळ अवघड वळणावर उलटली.
