पुणे – शहरातील व्यावसायिक व काही निवासी मिळकतींना पूर्वीपासून मिटरद्वारे पाणीपट्टीचे बिल पाठविले जात आहेत. पण अनेक वर्षापासून पाणीपट्टी भरण्याकडे नागरिक दुर्लक्ष करत असल्याने आता थकबाकीवर प्रति महिना एक टक्का व्याज लावून दंड वसूल केला जाणार आहे. त्यामुळे नागरिकांनी पाणीपट्टीची थकबाकी भरावी असे आवाहन महापालिकेने केले आहे.
यासंदर्भात पाणीपुरवठा प्रमुख नंदकिशोर जगताप यांनी सांगितले कि,’पुणे महानगरपालिका हद्दीतील सर्व व्यावसायिक व काही बिगर निवासी ग्राहकांना यापूर्वीपासून मीटरद्वारे बिलाची आकारणी होत आहे तसेच खडकी कॅन्टोन्मेंट बोर्ड व पुणे कॅन्टोन्मेंट बोर्ड क्षेत्रामधील सर्व ग्राहकांना पाण्याच्या वापरानुसार मीटरद्वारे चिल आकारणी करून पाणीपुरवठा करण्यात येत आहे. पाण्याच्या थकित बिलावर कोणतीही व्याजाची आकारणी करण्यात येत नसल्याने मोठ्या प्रमाणावर बिलाच्या रकमेची थकबाकी वाढत असल्याचे पुणे महानगरपालिकेच्या निदर्शनास आले आहे.
यास्तव मीटर बिलाच्या दिनांकापासून ६० दिवसात बिल न भरल्यास महाराष्ट्र महानगरपालिका अधिनियम, १९४९ चे प्रकरण आठ, कराधान नियम यातील नियम ४१ नुसार थकबाकी रकमेवर प्रतिमहा १% दराने दंडात्मक व्याज आकारण्याचा पुणे महानगरपालिकेने निर्णय घेतला आहे. सदरचा निर्णय हा नव्याने घेण्यात आला असल्याने दिनांक ३१/०१/२०२४ रोजीची थकबाकी भरणेस दिनांक ३१/०३/२०२४ अखेर ६० दिवसांची मुदत देण्यात येत आहे. दिनांक ०१/०४/२०२४ पासून थकबाकी रकमेवर व त्यानंतरच्या कोणत्याही थकित रकमेवर १% प्रतिमहा दंडात्मक व्याज आकारण्यात येणार आहे याची सर्व ग्राहकांनी नोंद घ्यावी.
मीटरद्वारे पाणीपुरवठा होणाऱ्या सर्व ग्राहकांना बिले पुणे मनपाकडून देण्याची व्यवस्था केली आहे. तथापि, ग्राहकांना बिले न मिळाल्यास त्यांचे दिनांक ३१/०१/२०२४ पर्यंतचे पाण्याचे मीटर बिल PMC Toll Free 18001030222 येथून प्राप्त करुन घ्यावे व दिनांक ३१/०३/२०२४ पूर्वी थकबाकी रकमेचा भरणा करावा.
