गदिमा,पुलं आणि बाबुजींची जन्मशताब्दी एकाच वर्षात येणे हा ईश्वरी संकेत-आ मेधा कुलकर्णी
सुनिल महाजन यांचे सांस्कृतिक क्षेत्रातील कार्य स्पृहणीय –
कोथरूड नवरात्र उत्सवातील विविधरंगी कार्यक्रम ही रसिकांसाठी मेजवानी – आ मेधा कुलकर्णी.
पुणे–मराठी मनावर अधिराज्य गाजविणारे गदिमा,पुलं आणि बाबुजींची जन्मशताब्दी एकाच वर्षात येणे हा ईश्वरी संकेत असून ह्या तिघांमुळे महाराष्ट्राचे साहित्य आणि सांस्कृतिक विश्व समृद्ध झाले असे गौरवोद्गार आमदार मेधा कुलकर्णी यांनी काढले.क्रिएटिव्ह फौंडेशन आणि कै विश्वनाथ भेलके प्रतिष्ठानच्या वतीने आयोजित कोथरूड नवरात्र उत्सवाच्या उदघाटन प्रसंगी त्या बोलत होत्या.यावेळी नवरात्र महोत्सवाचे संयोजक संदीप खर्डेकर,नगरसेविका मंजुश्री खर्डेकर,उत्सव प्रमुख विशाल भेलके,उमेश भेलके यांच्यासह नगरसेवक व शहर सुधारणा समिती अध्यक्ष सुशील मेंगडे,वारजे कर्वेनगर प्रभाग समितीचे अध्यक्ष दीपक पोटे,विधी समितीच्या अध्यक्ष माधुरीताई सहस्त्रबुद्धे,नगरसेविका वृषाली चौधरी इ मान्यवर उपस्थित होते.
कोथरूड नवरात्र महोत्सवातील विविधरंगी कार्यक्रमाद्वारे संदीपजी गेली अनेक वर्ष कोथरूडकरांची सांस्कृतिक भूक भागवत असून याद्वारे उत्तम कार्यक्रमांची मेजवानी रसिकांना मिळते हे कौतुकास्पद असल्याचे ही त्या म्हणाल्या.आज पहिलाच कार्यक्रम ” लेणे प्रतिभेचे “हा ह्या अजरामर त्रयींच्या गीतांवर आधारित कार्यक्रम असल्याने ह्या विलक्षण प्रतिभावान गीतकार,संगीतकार,गायक,साहित्यिक अश्या विविध रुपातील पुलं,गदिमा आणि बाबुजीना ही समर्पक आदरांजली असल्याचे ही त्या म्हणाल्या.यावेळी आ मेधा कुलकर्णी यांच्या हस्ते संवाद चे सुनिल महाजन व पायलवृंद च्या निकिता मोघे यांचा सत्कार करण्यात आला.
मी सुनिल महाजन यांचे सांस्कृतिक क्षेत्रातील कार्य गत पंचवीस वर्षे जवळुन अनुभवत असून पुण्यातील अनेक सांस्कृतिक कार्यक्रमांचे ते जनक असल्याने त्यांच्या कार्याचा सन्मान व्हावा म्हणून हा सत्कार आयोजित केल्याचे क्रिएटिव्ह फौंडेशन चे अध्यक्ष संदीप खर्डेकर यांनी सांगितले.बाल चित्रपट महोत्सव,संभाजी बागेतील बाल वाचनालय,किल्ले स्पर्धा,कलावंतांची गुढी,पुस्तक हंडी,दिवाळी पहाट यासह विविध कार्यक्रमाचे सातत्याने नियोजन करणारे सुनील महाजन आणि निकिता मोघे पुणेकरांच्या कौतुकास पात्र असल्याचे ही संदीप खर्डेकर म्हणाले.
लेणे प्रतिभेचे ह्या कार्यक्रमात संजीव,मेहेंदळे,योगिता गोडबोले आणि प्रतिभा थोरात यांनी लावणी,भक्तीगीत,बाल गीत,भाव गीत,गीत रामायणातील गाणे इ विविधढंगी गाण्यांच्या मुक्त उधळणीत रसिकांना शब्दशः न्हाऊ घातले.
कार्यक्रमाचे प्रास्ताविक संदीप खर्डेकर यांनी,स्वागत व सत्कार उमेश भेलके विशाल भेलके यांनी केले तर नगरसेविका मंजुश्री खर्डेकर यांनी आभार प्रदर्शन केले.