पुणे-.. घराबाहेर पडलेला माणूस किती सुरक्षित ? असा प्रश्न उपस्थित होईल अशा शहराकडे वाटचाल करू पाहणाऱ्या या शहरात आज अधिकाऱ्यांच्या अक्षम्य हलगर्जीपणामुळे जुना बाजार चौकातील जाहिरात फलकाचा लोखंडी सांगाडा चौकात सिग्नलच्या प्रतीक्षेत असलेल्या वाहनांवर आणि वाहनचालकांवर कोसळला आणि क्षणार्धात आपल्या आणि आपल्या व्यक्तींच्या पु ढील आयुष्याची स्वप्ने पाहणारी,त्यासाठी जीवनाशी झगडा देत असलेली काही निष्पाप जीव हकनाक अगदी निघृण रित्या बळी पडले. तर काही जखमी अवस्थेत आणखी आपल्या आयुष्यातील खडतर जीवनातल्या जीवघेण्या वळणावर पोहोचले .
जुना बाजार येथील शाहीर अमर शेख चौकातील एक मोठे होर्डिंग दुपारी पावणेदोन च्या सुमारास कोसळले असून यात संध्याकाळ पर्यंत असे समजले कि तीन जणांचा मृत्यू झाला आहे. तर नऊजण जखमी झाले आहेत. या घटनेत रस्त्यावरील वाहनांचेही मोठ्या प्रमाणात नुकसान झाले आहे.
शाहीर अमर शेख चौकात ,रेल्वे च्या जागेत रस्त्याकडे तोंड करून अनेक मोठेजाहिरात फलक बेकायदेशीरपणे कित्येक वर्षांपासून बिनदिक्कत लावण्यात आले. यापोटी पैसा किंवा महसूल मिळतो म्हणून रेल्वे आणि महापालिका अधिकाऱ्यांनी यावर किरकोळ कातडीबचाउ ,दिखाऊ कारवाई सुरु ठेवली .आज रेल्वेशी करार संपल्याने येथील जाहिरात फलक खालून कापून काढण्यात येत होते ते हि भर दिवसा … आणि कोणाचीही परवानगी न घेता ..दक्षतेच्या उपाय योजना न करता .. यातील एक मोठे लोखंडी होर्डिंग दुपारी कोसळले. दुपारी लोखंडी होर्डिंगचे कटिंग सुरु असताना ही घटना घडली. या होर्डिंगखाली एकूण ११ जण सापडले होते. यातील तिघांचा मृत्यू झाल्याचे वृत्त आहे . तर नऊ जण जखमी झाल्याचे समजले जखमींना तातडीने रुग्णालयात दाखल करण्यात आले आहे. अग्निशमन दल आणि पोलिसांचे पथक घटनास्थळी पोहोचले आणि पुढील सोपस्कार सुरु झाले .
मृतांची नावे..समजल्यानुसार ..
शाम धोत्रे (वय ४८)
शामराव राव कासार (वय ७०)
शिवाजी देविदास परदेशी (वय ४०)
गंभीर जखमी
किरण ठोसर (वय २२)
यशवंत खोबरे (वय ४0)
महेश येशवेकर (वय ५०)
रुक्मिणी परदेशी (वय ५५)
देवांश परदेशी (वय ४)
समृद्धी परदेशी (वय 16)
जावेद खान (वय ४५ )
उमेश मोरे (वय ५५
कैलास गायकवाड (वय ३५ )
होर्डिंग कोसळल्यामुळे शाहीर अमर शेख चौकातील वाहतूक खोळंबली होती. चौकाकडे जाणाऱ्या मार्गांवर वाहतूक कोंडी झाल्याने या मार्गावरील वाहतूक वळवण्यात आली आहे. कोसळलेले लोखंडी होर्डिंग हे रेल्वे प्रशासनाच्या मालकीचे असून या प्रकरणी चौकशीचे आदेश दिल्याचे रेल्वेच्या अधिकाऱ्यांनी सांगितले. महापालिकेने हे होर्डिंग काढण्यासंदर्भात रेल्वे प्रशासनाला पत्र पाठवले होते. होर्डिंग लावताना नियमांचे उल्लंघन केल्याचा आक्षेप होता. मात्र, रेल्वे प्रशासनाने महापालिकेच्या पत्रांची दखलच घेतली नाही, असा आरोप महापालिका अधिकारी करत आहेत.
दरम्यान बंडगार्डन पोलिसांनी याप्रकरणी किरण जाधव(वय ३६ रा. मुंढवा रोड )यांची फिर्याद दाखल करून घेतली असून पोलीस निरीक्षक मुजावर अधिक तपास करीत आहेत.
