ध्येयपूर्तीसाठी सातत्य, परिश्रम आवश्यक- शिक्षण आयुक्त विशाल सोळंकी
पुणे : “आयुष्यात ध्येय गाठण्यासाठी कठोर परिश्रम, सातत्य आणि प्रामाणिकपणे काम करणे महत्त्वाचे असते. यशाच्या मार्गावर चालताना माणुसकी विसरु नये. शैक्षणिक प्रगतीबरोबरच स्वत:ला चांगला नागरिक घडविण्याचा प्रयत्न प्रत्येकाने केला पाहिजे. आपल्या जडणघडणीत शाळा, शिक्षक व पालकांनी दिलेले योगदान विसरता कामा नये,” असा सल्ला राज्याचे शिक्षण आयुक्त विशाल सोळंकी यांनी व्यक्त केले.
अॅमनोरा स्कूलच्या वतीने आयोजित दहावीतील विद्यार्थ्यांच्या अभ्यासक्रम समारोपावेळी विशाल सोळंकी बोलत होते. प्रसंगी अॅमनोरा पार्क टाऊनचे चीफ ऑपरेटिंग ऑफिसर जे. के. भोसले, पीअर्सन इंडियाच्या उपसरव्यवस्थापिका निधी थापर, शाळेच्या प्राचार्या मीरा नायर, उपप्राचार्या मधुलिका शर्मा यांच्यासह इतर मान्यवर उपस्थित होते. यावेळी प्रमुख पाहुण्यांच्या हस्ते शैक्षणिक, क्रीडा आणि कौशल्याधारित उपक्रमांत उल्लेखनीय कामगिरी केलेल्या विद्यार्थ्यांचा गौरव करण्यात आला.
मीरा नायर म्हणाल्या, “भविष्यात विद्यार्थ्यांसमोर संधी आणि आव्हाने आहेत. धैर्याने या आव्हानांना सामोरे जात उपलब्ध संधीचा लाभ घेत स्वत:ला घडविण्यासाठी विद्यार्थ्यांनी प्रयत्न करावेत. अॅमनोरा स्कूल विद्यार्थ्यांच्या सर्वांगीण विकासासाठी नियमित प्रयत्न करते. विविध संस्थांकडून शाळेचा गौरव झालेला आहे. 2016-17 यावर्षी अॅमनोरा स्कूलमध्ये दहावीत असलेल्या राज आर्यन अग्रवाल या विद्यार्थ्याने 2019 च्या जेईई परिक्षेत 100 टक्के गुण मिळवत देशात दुसरा येण्याचा मान मिळवला आहे.”
यावेळी नववी-दहावीच्या विद्यार्थ्यांनी विविध सांस्कृतिक कार्यक्रमांचे सादरीकरण केले. कॅप्टन श्रेया संदुरकर हिने अॅमनोरा स्कूलमध्ये झालेल्या तिच्या प्रगतीबद्दल सांगितले. तनिषा जैन हिने स्वागत केले. पालकांच्या वतीने नंदन शानबाग यांनी मनोगत व्यक्त केले. मधुलिका शर्मा यांनी आभार मानले.