नवी दिल्ली – संसदेच्या हिवाळी अधिवेशनाला सुरूवात झाली असून, संसदेच्या पहिल्याच दिवशी अनेक राज्यसभा खासदारांवर कारवाई करण्यात आली आहे. त्यात शिवसेनेच्या खासदार प्रियंका चतुर्वेदी आणि तृणमूल काँग्रेसचे खासदार डोला सेन यांच्यासह अन्य 12 खासदारांना निलंबित करण्यात आले आहे. पावसाळी अधिवेशनात (11 ऑगस्ट) अनुशासनहीनता पसरवल्याप्रकरणी त्यांच्यावर ही कारवाई करण्यात आली आहे.
प्रियंका चतुर्वेदी आणि डोना सेनसह आणखी 12 खासदारांना आज निलंबित करण्यात आले. त्यात एलाराम करीम (सीपीएम), काँग्रेसच्या फूलो देवी नेताम, छाया वर्मा, आर बोरा, राजमणी पटेल, सय्यद नासिर हुसेन, अखिलेश प्रसाद सिंह, सीपीआयचे बिनॉय विश्वम, टीएमसीच्या शांता छेत्री आणि शिवसेनेचे अनिल देसाई यांचा समावेश आहे.
या खासदारांना निलंबित करण्यात आले असून, निलंबन नोटीसात म्हटले आहे की, 11 ऑगस्ट रोजी पावसाळी अधिवेशनाच्या शेवटच्या दिवशी खासदारांनी त्यांच्या हिंसक वर्तनाने आणि सुरक्षा कर्मचाऱ्यांवर जाणीवपूर्वक हल्ले करून सभागृहाच्या प्रतिष्ठेला हानी पोहोचवली आहे. त्यामुळे या सर्व खासदारांना सुरू असलेल्या अधिवेशनाच्या शेवटच्या भागापर्यंत निलंबित करण्यात आले आहे.