जिल्ह्यात १२० शिबीराचे आयोजन; ७० हजाराहून अधिक एकल महिला सहभागी

पुणे, दि. १५: महिला सक्षमीकरणाच्यादृष्टीकोनातून जिल्हा परिषदेचे मुख्य कार्यकारी अधिकारी गजानन पाटील यांच्या संकल्पनेतून एकल महिलांसाठी ‘माझे अस्तित्व’ महत्वाकांक्षी प्रकल्प राबविण्यात येत आहे, अशी माहिती जिल्हा कार्यक्रम अधिकारी (महिला व बालविकास) आनंद खंडागळे यांनी दिली आहे.

या प्रकल्पाकरिता माहे ऑगस्ट २०२५ मध्ये जिल्हा परिषदेमार्फत ग्रामीण भागातील एकल महिलांचे सर्वेक्षण करण्यात आले. यामध्ये 1 लाख 9 हजार महिलांना सहभाग नोंदविला. एकल महिलासांठी महसूल मंडलनिहाय आयोजित एकूण १२० शिबीरात ७० हजार ५५८ एकल महिला सहभागी झाल्या होत्या. शासकीय योजनासाठी आवश्यक कागदपत्रे मिळवून देणे, शासनाच्या लोककल्याणकारी योजनांची माहिती व लाभ देणे, आरोग्य तपासणी करणे, आवश्यक आरोग्य सुविधा पुरविणे, संदर्भ सेवा देणे आदी सेवा देण्यात आल्या.

बंधन व आयटीसी एनजीओमार्फत शिरुर तालुक्यात एकल महिलांना आर्थिकदृष्ट्या सक्षम करण्याचे यशस्वी कामकाज केले आहे. आजअखेर ६०० एकल महिलांना विविध प्रशिक्षण देण्यात आलेले आहे. एकल महिलांना व्यवसायाच्यादृष्टीने आवश्यक साहित्याचा विनामूल्य पुरवठा करण्यात आला. त्यामध्ये भाजीपाला, फळे विक्री, शिवणकाम यासारख्या व्यवसायाचा समावेश आहे. व्यवसायाकरिता प्रत्येक एकल महिलेला व्यवसायाबाबतचे सहा महिने प्रशिक्षण देऊन देण्यात आले आणि यशस्वी प्रशिक्षण पूर्ण केल्याचबाबतचे प्रमाणपत्र व व्यवसाय सुरु करणेसाठी कच्च्या मालाचा पुरवठा आदी बंधन व आयटीसी कंपनीच्या सीएसआर निधीतून देण्यात येत आहे.

‘माझे अस्तित्व’ योजनाअंतर्गत जिल्ह्यातील आंबेगाव तालुक्यात ३ ,बारामती ६, भोर ९, दौंड १६ , हवेली ९, इंदापूर ६, जुन्नर ७, खेड १५, मावळ २२, मुळशी ११, पुरंदर ८, शिरुर ५, आणि वेल्हे तालुक्यात ३ याप्रमाणे १२० शिबीराचे आयोजन करण्यात आले आहे.

जिल्हा परिषदेचे अध्यक्ष वीरधवल जगदाळे, उपाध्यक्ष विवेक वळसे पाटील तसेच महिला बालकल्याण सभापती अंकिता पाटील यांच्या मार्गदर्शनाखाली एकल महिला उपक्रम जिल्हा परिषदमार्फत आता अधिक प्रभावीपणे राबवण्याचे नियोजन केलेले असून याकरिता जिल्हा पातळीवर एकल महिलांकरता पोर्टल तयार करण्यात येऊन त्याची प्रभावी अंमलबजावणी व पाठपुरावा प्रत्येक लाभार्थ्याचा करण्यात येणार आहे, अशी माहिती श्री. खंडागळे यांनी दिली आहे.

पुणे- महावितरण पुणे परिमंडलाने सरत्या आर्थिक वर्षात २१६५ कोटी रुपये वसुली करुन उत्तम कामगिरी केली आहे. मुख्य अभियंता सुनिल काकडे यांनी विभाग व उपविभागामध्ये वसुलीसाठी लावलेल्या निकोप स्पर्धेमुळेच हे शक्य झाले आहे. यावेळी जे यश मिळाले आहे ते पुढील काळात टिकवून ठेवणे आवश्यक असून, एक चुकीचे वीजबिल सुद्धा आपले मापदंड बिघडवू शकते. त्यामुळे अचूक वीजबिल देणे व ग्राहकाकडून ते वेळेत वसूल करणे हे काम आपल्याला सातत्याने करावे लागेल असे मत महावितरणचे कार्यकारी संचालक डॉ. भूजंग खंदारे यांनी व्यक्त केले आहे.

रास्तापेठ येथील महावितरण परिमंडल कार्यालयात २०२५-२६ मध्ये उत्कृष्ट कामगिरी करणाऱ्या मंडल, विभाग व उपविभागीय प्रमुखांचा बुधवारी (दि. १५) मान्यवरांच्या हस्ते गौरव करण्यात आला. याप्रसंगी ते बोलत होते. यावेळी व्यासपीठावर मुख्य अभियंता सुनिल काकडे, अधीक्षक अभियंता ज्ञानदेव पडळकर, सिंहाजीराव गायकवाड व युवराज जरग यांची प्रमुख उपस्थिती होती.

पुढे बोलताना डॉ. खंदारे म्हणाले, वीजबिल वसूल करणे कंपनीचे नाही तर माझे काम आहे, ही जाणीव प्रत्येक कर्मचाऱ्याला असली पाहिजे. ज्या पद्धतीने आपण मार्चअखेरीस काम करतो, तसेच काम संपूर्ण वर्षात केले तर मार्च मध्ये दमछाक होणार नाही. तर मुख्य अभियंता सुनिल काकडे म्हणाले, पुणे परिमंडलात एकूण ३ मंडल आणि १२ विभाग आहेत. यात पहिल्या येणाऱ्या आणि शेवटी राहणाऱ्या विभागात केवळ दीड टक्क्यांचा फरक आहे. हा फरक कमी करण्यासाठी आपल्याला वीजबिल वसुलीसह, अचूक बिलींगवर शंभर टक्के काम करावे लागणार आहे.

सूत्रसंचालन उपव्यवस्थापक (विवले) संतोष भोसले यांनी तर प्रभारी सहा. महाव्यवस्थापक (विवले) प्रवीण गुंडेली यांनी प्रास्ताविक केले. वरिष्ठ व्यवस्थापक (मासं) शितल निकम यांनी आभार मानले. कार्यक्रमाच्या यशस्वीतेसाठी कार्यकारी अभियंता सतीश सरोदे, सहा. अभियंता राहूल फाये, पवन देशपांडे यांनी परिश्रम घेतले. कार्यक्रमास परिमंडलातील सर्व कार्यकारी अभियंते, उपविभागीय अभियंते व अधिकारी यांची मोठ्या संख्येने उपसिथती होती.

वर्ष २०२५-२६ च्या कामगिरीत उत्कृष्ट ठरलेली कार्यालये

महावितरण पुणे परिमंडलाच्या वार्षिक पुरस्कार २०२५-२०२६ मध्ये गणेशखिंड शहर मंडळाने प्रथम क्रमांक पटकावून उत्कृष्ट मंडळाचा मान मिळवला आहे, अधीक्षक अभियंता सिंहाजीराव गायकवाड यांनी तो स्विकारला. तर उत्कृष्ट विभागाच्या श्रेणीत कार्यकारी अभियंता नितीन थिटे यांच्या मार्गदर्शनाखाली शिवाजीनगर विभाग प्रथम आला असून, नगररोड विभाग- दिपक पाटील दुसऱ्या आणि पर्वती विभाग- निलेश फलके तिसऱ्या स्थानावर राहिला आहे.

उपविभागांमध्ये रास्तापेठ शहर मंडलात पेशवे पार्क व मंडई उपविभाग (उमेश कवडे व सुनिल कुरील) प्रथम, हडपसर (विष्णू पवार) द्वितीय आणि वाडिया (प्रमोदकुमार गायकवाड) तृतीय क्रमांकाचे मानकरी ठरले. गणेशखिंड शहर मंडलात शिवाजीनगर उपविभागाने (अमित भरते) प्रथम, औंध उपविभागाने (अविनाश लोखंडे व श्री. उमेश करपे) द्वितीय आणि सांगवी व हिंजवडी उपविभागाने (कल्याण गिरी व सचिन पाटील) तृतीय क्रमांक मिळवला आहे. तसेच पुणे ग्रामीण मंडलात नसरापूर उपविभाग (सिध्दार्थ सोनसळे) प्रथम, तळेगाव (जयप्रकाश सागरे) द्वितीय आणि चाकण एमआयडीसी (प्रकाश शेळके) उपविभागाने तृतीय क्रमांक मिळवला.

पुणे- बुधवार पेठेतील अजय लॉज वर दारूच्या नशेत पत्रकाराने अश्लील चित्रीकरण केल्याच्या प्रकरणात एकच पत्रकार आरोपी असून अन्य कोणत्याही पत्रकाराचा यात समावेश असल्याचे पुरावे मिळालेले नाहीत असे सांगत पोलीस आयुक्तांनी अन्य पत्रकारांच्या नावांना क्लीन चीट दिली.तर या प्रकरणी गुन्हा दाखल करू नये म्हणून कोणत्याही मंत्र्याने वा अण्णा ने आपल्यावर दबाव आणलेला नाही अगर फोन केलेला नाही असे पोलीस आयुक्त अमितेश कुमार यांनी स्पष्ट केले आहे.
या संदर्भात महिला नेत्या रुपाली पाटील यांनी चार पत्रकारांच्या नावानिशी पोलिसांकडे तक्रार केलेली आहे .मात्र तिथे एकच होता अन्य पत्रकार तिथे होते याबाबत कोणतेही पुरावे मिळाले नाहीत असे आयुक्त म्हणाले.यातील आरोपी असलेला पत्रकार रोहन कदम हा फरार असल्याचे आयुक्तांनी म्हटले आहे.

नेमके रुपाली पाटील यांनी दिलेल्या तक्रार अर्जात काय म्हटले,वाचा जसेच्या तसे…

प्रति, श्री. कृषीकेश रावले साो. मा. पोलीस उपायुक्त साहेब, झोन १. पुणे शहर
अर्जदार – अॅड, रुपाली चंद्रशेखर पाटील रा. १३४/२, शुक्रवार पेठ, पुणे ४११००२
मोक्र. ९३७१३०२३०२
विषय – जाणीवपूर्वक बदनामी करण्याच्या हेतूने पत्रकाराला हाताशी धरून महिलेचे अश्लील चित्रीकरण केलेबाबत.
महोदय,
मी वर नमूद पत्यावर राहण्यास असून मी राष्ट्रवादी काँग्रेस पक्षामध्ये अनेक वर्षापासून काम करत आहे. सध्या महाराष्ट्रामध्ये अशोक खरात हे प्रकरण गाजत असताना अनेक महिलांचे लैंगिक शोषण केलेले असल्याने मी वेळोवेळी त्याबाबत आवाज उठवलेला आहे व योग्य ती कारवाई करून दोषीविरुद्ध कडक कारवाई करण्याची मागणी मी केली आहे. परंतु काही समाजकंटक महिला या माझ्याविषयी आकस धरत असून ज्या महिलांचा अशोक खरात प्रकरणांमध्ये संबंध आहे त्या महिला माझा आवाज दाबण्यासाठी हेतू-परस्पर खोट्या नाट्या तक्रारी करून माझी प्रतिमा मलिन करण्याचा प्रयत्न करीत आहेत. त्याचेच उदाहरण म्हणजे पत्रकार रोहन कदम याने माझे नातेवाईक यांच्या लॉजिंग व बोर्डिंग या ठिकाणी जाऊन महिलांचे अश्लील चित्रीकरण केल्याचे माझ्या निदर्शनास आले आहे. त्याबाबत अनेक ठिकाणी पुणे शहरात सध्या चर्चा असून पोलिसांनी देखोल सदर लॉजवर काम करत असलेल्या मॅनेजर व त्याचा सहकारी तसेच संबंधित महिलेचा जबाब देखील नोंदवल्याचे मला समजले आहे. परंतु सदरचे प्रकरण हे वाटते तेवढे वरवरचे नसून त्यामध्ये एक षड्यंत्र रचले असून त्याच्यामध्ये कटकारस्थान करून केवळ माझी बदनामी करून रूपाली पाटील देखील महिलांच्या शोषणामध्ये सामील आहे असा खोटा मेसेज समाजाला देणेकामी हे सगळं षड्यंत्र रचले गेलेले आहे. या कटामध्ये खूप मोठ्या आर्थिक देवाण-घेवाणीचा विषय झालेला आहे. दुर्दैवाने मला सांगावेसे वाटते की यामध्ये पत्रकार देखील सामील आहेत. पत्रकार रोहन कदम -अश्लील चित्रीकरण करणारा, वैभव सोनवणे सिनियर पत्रकार (चित्रीकरण मुख्य सूत्रधार), अमोल धर्माधिकारी, अभिजीत पोटे, अक्षय बडवे व इतर दोघे पत्रकार आहेत.
सदर प्रकारामुळे पुणे पत्रकार संघातील माझ्या पत्रकार बांधवांना खूप दुःखद वेदना झालेल्या आहेत. परंतु ह्या ठराविक गुन्हेगारी प्रवृत्तीच्या पत्रकार बांधवांनी माझ्याविरुद्ध विरोधी महिलांशी संगनम्न करून माझे करिचर संपवण्याचे काम पत्रकार रोहन कदम याला हाताशी धरून संगणमत व कटकारस्थान करून सदर लॉजिंग बोर्डिंग चे ठिकाणी पाठवून तिथे असलेल्या महिलेचे अश्लिल चित्रीकरण करून, त्याठिकाणी काम करत असलेल्या मॅनेजर यास “रुपाली पाटलांचे मामा कुठे आहेत, त्यांना इथे बोलवा” वास्तविक पाहता त्या पत्रकाराला हा लॉज कोणाचा आहे, त्या लॉजचे मालक कोण आहेत, त्यांची भाची कोण आहे, ह्या गोष्टींची माहिती असण्याचा संबंध नाही, परंतु एकूणच हा सगळा प्रकार षडयंत्र असून ह्या षड्यंत्रामध्ये अजून काही व्यक्ती सामील असून हे केवळ माझी नाहक बदनामी करून मी देखील महिलांचे शोषण करणारी महिला आहे, असे भासविण्याकामी केल्याचे प्रथमदर्शनी माझे ठाम मत निर्माण झाले आहे. सबब आपण रोहन कदम, वैभव सोनवणे, अभिजित पोटे, अक्षय बडवे याच्यावरती तात्काळ गुन्हा दाखल करून त्याच्याकडे सखोल तपास करावा. तसेच त्या लॉजिंग बोर्डिंग समोरचे सीसीटीव्ही फुटेज हे सर्व तपासून घ्यावे. त्या तपासणीमध्ये सदर पत्रकार रोहन कदम, वैभव सोनवणे अभिजित पोटे, अक्षय बिडवे यांच्या वरोबर इतर कोण कोण होते, त्याला आर्थिक रसद कुणी पुरवली, आमच्या राष्ट्रवादी काँग्रेस (अजितदादा पवार गट) पक्षातील देखील कोण यामध्ये सामील आहे का? विरोधक म्हणून कोण यामध्ये काम करत होते या सर्व कटकारस्थानाचा सखोल पोलीस तपास होणे आवश्यक आहे. याच्या संदर्भात मी आपणाकडे लेखी कायदेशीर तक्रार करीत आहे. तसेच या गंभीर प्रकाराबाबत मी मुंबई उच्च न्यायालयात देखील याचिका दाखल करून माझ्याविरुद्ध केलेल्या षड्यंत्राची संपूर्ण सी.आय.डी. अथवा सी.बी.आय. मार्फत चौकशी करावी याची देखील मागणी करणार आहे. परतु माझा पुणे पोलिसांवर प्रचंड विश्वास असून आपण मला न्याय द्याल ही अपेक्षा आहे.सबब माझी आपणास विनंती की. पत्रकार रोहन कदम व इतर यास तात्काळ ताब्यात घेऊन त्याच्यावरती गुन्हा दाखल करून या पाठीमागचा सूत्रधार कोण आहे. यामध्ये कोण कोण पत्रकार गुंतलेले आहेत, याला कुठल्या राजकीय महिलेने आर्थिक रसद पुरवली या सर्वांना तात्काळ अटक करण्यात यावी. ही माझी नम्र विनंती.
पुणे
दि. 11/4/2026
प्रतः खाना
① मा. मुख्मंयत्री तथा गृहमंत्री. मा. देवेंद्र फडवणीस साहेब
② मा. पोलीस आयुक्त साहेव श्री अमितेश कुमार पुणे
अर्जदार
1
अॅड. रूपाली पाटील ठोंबरे

मुळा रोड व होळकर पूल परिसराची मनपा अधिकाऱ्यांसमवेत केली पाहणी

पुणे
बुधवार, १५ एप्रिल २०२६

पुणे शहरातील नद्यांमधील जलपर्णीच्या समस्येने रौद्र रूप धारण केले असून, नागरिकांचे आरोग्य धोक्यात आले आहे. या पार्श्वभूमीवर आमदार सिद्धार्थ शिरोळे यांनी आज, १५ एप्रिल रोजी मुळा रोड आणि होळकर पूल परिसरातील नदीपात्राची पुणे महानगरपालिका आणि खडकी कॅंटोन्मेंट बोर्डाच्या अधिकार्यांसमवेत प्रत्यक्ष पाहणी केली.
नदीच्या प्रदूषणाकडे आणि जलपर्णीकडे प्रशासनाचे लक्ष वेधताना आमदार शिरोळे म्हणाले की,
“जलपर्णीमुळे होणारी दुर्गंधी आणि डासांचा वाढता प्रादुर्भाव यामुळे स्थानिक नागरिक हैराण झाले आहेत. केवळ तात्पुरती मलमपट्टी नको, तर पर्यावरणाचा समतोल राखून शास्त्रीय पद्धतीने जलपर्णी कायमस्वरूपी कशी नष्ट करता येईल, यावर आमचा भर आहे. हा मुद्दा मी यापूर्वीही अनेकदा विधानसभेत उपस्थित केला असून प्रशासनाने आता युद्धपातळीवर काम करणे गरजेचे आहे.”

सध्या तातडीचा उपाय म्हणून मैन्युअल पद्धतीने नदीपात्रातील जलपर्णी काढण्याचे काम तातडीने सुरू करण्याचे निर्देश प्रशासनाला देण्यात आले आहेत.
जलपर्णीमुळे डेंग्यू, मलेरिया यांसारख्या आजारांचा धोका वाढला आहे. ही मोहीम राबवल्यामुळे नागरिकांना दुर्गंधी आणि डासांपासून मोठा दिलासा मिळणार आहे.
भविष्यात जलपर्णी पुन्हा वाढू नये यासाठी इको-फ्रेंडली आणि तांत्रिक पद्धतींचा वापर करण्याबाबत चर्चा करण्यात आली.
या पाहणी दौऱ्यावेळी महानगरपालिकेचे आरोग्य अधिकारी, ड्रेनेज विभागाचे अधिकारी आणि स्थानिक पदाधिकारी उपस्थित होते. मुळा आणि मुठा नद्यांना जलपर्णीमुक्त करण्यासाठी सातत्याने पाठपुरावा सुरूच राहील, असा विश्वास आमदार शिरोळे यांनी यावेळी व्यक्त केला.

पुणे- युध्द स्थिती आणि वाढता उष्मा यांनी हैराण झालेल्या मनाला निसर्ग आणि शांतता याचे महत्व आता जाणवणार असून याच पार्श्वभूमीवर वृक्षवल्ली आम्हा सोयरी वनचरे। ही सुस्वरे आळवित शिवणे ते खराडी कर्वेनगर हद्दीतील १०० फुटी डीपी रस्त्याच्या बाजूला नगरसेवक स्वप्नील दुधाने पर्यावरणप्रेमी आणि स्थानिक नागरिकांनी सकाळी अवघे २ तास काढून म्हणजे सकाळी ८ ते १० या वेळेत २५ रोपांचे रोपण केले आणि हि वृक्ष जोपासण्याचा निर्धार हि केला .

दुधाने यांनी सांगितले कि,’ क्रांतिज्योती महात्मा जोतिबा फुले आणि भारतरत्न डॉ. बाबासाहेब आंबेडकर यांच्या जयंतीचे औचित्य साधून आपण आज प्रभागातील स्वराज्यरक्षक छत्रपती संभाजी महाराज क्रीडा संकुल आणि शिवणे ते खराडी कर्वेनगर हद्दीतील १०० फुटी डीपी रस्ता या ठिकाणी वृक्षारोपण सोहळा आयोजित केला होता.भारतीय समाजातील दूषित गोष्टी दूर करून स्वच्छ वातावरण निर्माण करणारे महापुरुष आणि त्यांच्या कार्याबद्दल कृतज्ञता व्यक्त करण्यासाठी आपण युवा सहकारी, पर्यावरणप्रेमी आणि स्थानिक नागरिकांसह २५ रोपांचे रोपण करण्यात आले. सकाळी ८ ते १० या वेळेत संपन्न झालेल्या सदर कार्यक्रमामध्ये कांचन, बकुळ, पिंपळ, कडुलिंब अशा सर्व भारतीय वृक्षांना मोठे करण्याचा संकल्प. केला. या महापुरुषांच्या कार्याची सावली आपले जीवन सुसह्य बनवत असताना त्यांच्या शिकवणीची मुळे समाजात खोलवर रुजावी आणि समतेची गोमटी फळे सर्वांना चाखता यावी, अशी सदिच्छा याप्रसंगी व्यक्त केली.

पुणे : ”विकसित भारताच्या निर्मितीत महिला शक्तीचा सक्रिय सहभाग हे पंतप्रधान नरेंद्र मोदी यांचे स्वप्न असून, नारी शक्ती वंदन अधिनियमाच्या माध्यमातून लोकसभेसह सर्व विधानसभांमध्ये महिला प्रतिनिधित्वाचा आवाज बुलंद होईल,” असे प्रतिपादन राज्यसभा खासदार प्रा. डॉ. मेधा कुलकर्णी यांनी मंगळवारी केले.

”विकसित भारताला समर्पित असलेले नारी शक्ती वंदन अधिनियम लोकसभेत पूर्ण बहुमताने पारित होऊन लोकशाहीच्या इतिहासात सुवर्णाक्षराने नोंदविले जाईल,” असा विश्वासही त्यांनी व्यक्त केला.

लोकसभा आणि सर्व राज्यांच्या विधानसभांमध्ये महिलांना ३३ टक्के आरक्षण देणाऱ्या नारी शक्ती वंदन अधिनियमाच्या अंमलबजावणी संदर्भात १६ एप्रिलपासून संसदेच्या विशेष अधिवेशनात चर्चा होणार आहे. या पार्श्वभूमीवर भारतीय जनता पक्ष पुणे शहरतर्फे पक्ष कार्यालयात आयोजित पत्रकार परिषदेत त्या बोलत होत्या. या वेळी भाजप महिला मोर्चाच्या शहराध्यक्षा मनीषा लडकत, शहर सरचिटणीस प्रियंका शेंडगे, नगरसेविका निवेदिता एकबोटे यांच्यासह पदाधिकारी, कार्यकर्ते उपस्थित होते.

प्रा. डॉ. मेधा कुलकर्णी म्हणाल्या, ”भारत हे जगातील सर्वांत मोठे लोकशाही राष्ट्र आहे. भारतीय महिलांनी विविध क्षेत्रात आपले कर्तृत्व सिद्ध केले आहे. केंद्र सरकारमध्ये बारा महिला मंत्री आपल्या खात्यांचा कारभार समर्थपणे सांभाळत आहे. देशाच्या तिजोरीची किल्ली असणारे अर्थमंत्रीपद निर्मला सीतारमण यांच्या रुपाने एक महिला भूषवित आहे. अनेक स्थानिक स्वराज्य संस्थांचे नेतृत्व महिलांच्या सक्षम हातात आहे. नुकत्याच झालेल्या निवडणुकीत ६५ टक्के महिलांनी मतदान करून लोकशाही उत्सवात सक्रिय सहभाग घेतला आहे. लोककल्याणकारी योजनांचा लाभ घेऊन महिला सक्षम होत आहेत. महिलांच्या राजकीय प्रतिनिधित्वातून सामाजिक प्रगती साधण्याच्या भूमिकेतून पंतप्रधान नरेंद्र मोदी सरकारने सप्टेंबर २०२३ मध्ये नारी शक्ती वंदन अधिनियम बहुमताने पारित केले. या अधिनियमामुळे नारी शक्तीचा सन्मान होऊन लोकसभा आणि विधानसभांमध्ये महिलांना ३३टक्के आरक्षण मिळणार आहे. या अधिनियमाच्या अंमलबजावणीसाठी सर्वांनी पाठिंबा द्यावा.”

”’मिस कॉल’द्वारे द्या पाठिंबा”

‘लोकसभा आणि विधानसभांमध्ये महिलांची ताकद वाढविण्यासाठी ‘नारी शक्ती वंदन अधिनियम’ अत्यंत महत्त्वपूर्ण असून, हा एकविसाव्या शतकातील सर्वांत महत्त्वपूर्ण आणि ऐतिहासिक लोकशाही निर्णय ठरणार आहे. या अधिनियमाला पाठिंबा देण्यासाठी ९६६७१७३३३३ या क्रमांकावर ‘मिस कॉल’ देऊन महिला सक्षमीकरणाच्या या निर्णयाला पाठबळ द्यावे,’ असे आवाहन प्रा. डॉ. मेधा कुलकर्णी यांनी केले.

पुणे- येत्या १ मे म्हणजेच महाराष्ट्र दिनापासून राज्यातील सर्व रिक्षा आणि टॅक्सीचालकांना मराठी भाषा बोलता, लिहिता येणे सक्तीचे करण्यात आले आहे. मराठी लिहिता-वाचता येणार नाही त्यांचे परवाने थेट रद्द होतील, असे परिवहनमंत्री प्रताप सरनाईक यांनी जाहीर केले. मराठी सक्तीचा नियम यापूर्वीही होता. पण चालकाला समज देऊन सोडून दिले जात होते.महाराष्ट्र मोटार वाहन नियम, १९८९ मधील नियम २४ आणि २७ (४) नुसार, रिक्षा, टॅक्सी, बस चालवण्याच्या परवान्यासाठी मराठीचे ज्ञान असणे बंधनकारक आहे. ‘मोटार वाहन कायदा १९८८’ च्या कलम ८६ नुसार आरटीओला परवाना निलंबन किंवा रद्दचा अधिकार आहे. त्याची अंमलबजावणी आता ३७ वर्षांनंतर होईल असे दिसते आहे .अगदी याच आधारावर पुण्याच्या महापौर मंजुषा नागपुरे यांना आता तुम्हीही पुण्यात पथारी,स्टॉल क्यूआर कोड आधारित लायसन्स देताना हा धाडसी निर्णय घ्याल काय ? असा सवाल केला गेला तर नवल वाटू नये

त्याला कारणही आहे , कारण असे आहे कि,’शहरातील पथारी व्यवसायिकांच्या समस्या सोडविण्यासाठी तसेच त्यांच्या व्यवसायाला शिस्तबद्ध व कायदेशीर स्वरूप देण्यासाठी महापौर मंजुषा नागपुरे यांनी महत्त्वपूर्ण निर्णय घेतले आहेत.शहरातील सर्व पथारी व्यवसायिकांचे पोलीस व्हेरिफिकेशन करून त्यांची सखोल पडताळणी करण्यात येणार आहे. यासोबतच प्रत्येक पात्र पथारी व्यवसायिकास बारकोड/क्यूआर कोड आधारित ओळखपत्र देण्यात येणार असून, या माध्यमातून त्यांना अधिकृत परवाना (लायसन्स) प्रदान करण्यात येईल. या बारकोडमध्ये संबंधित व्यवसायिकाची संपूर्ण माहिती, व्यवसायाचा प्रकार व परवानगीची जागा यांचा समावेश असेल.या उपक्रमामुळे अनधिकृत पथारी व्यवसायावर नियंत्रण येऊन अधिकृत व्यवसायिकांना संरक्षण मिळणार आहे, तसेच शहरातील व्यवस्थापन अधिक सुसूत्र होण्यास मदत होणार आहे.तसेच, पथारी व्यवसायिकांच्या संघटनेने महानगरपालिकेस लेखी अनूमोदन देत पुढील बाबींची हमी दिली आहे की, ते रस्त्यावर कचरा टाकणार नाहीत, स्वच्छता राखतील, महानगरपालिकेला पूर्ण सहकार्य करतील तसेच वाहतुकीस अडथळा निर्माण होणार नाही, याची दक्षता घेतील.महापौर यांनी संबंधित सर्व विभागांना या निर्णयांची प्रभावी अंमलबजावणी करण्याचे निर्देश दिले असून, या माध्यमातून शहरातील पथारी व्यवसाय अधिक शिस्तबद्ध, स्वच्छ व नियमनबद्ध करण्याचा उद्देश आहे.

पण आतापर्यंत कुठेहि यात महापौर यांनी अथवा महापालिका प्रशासनाने किंवा पथारी स्टॉल धारकांच्या संघटनांनी असा परवाना देताना किंवा पथारी स्टॉल धारकांचे पुनर्वसन करताना प्रथम महाराष्ट्रीयन किंवा मराठी भाषा अवगत असलेला म्हणजे लिहिता वाचता ,बोलता येणारा यांना प्राधान्य असे कुठेही कधीही म्हटलेले नाही. देशात कुणालाही कुठे जाऊन कोणताही व्यवसाय जो बेकायदा नाही तो करण्याची मुभा आहे. मात्र हे राबविले जात असताना ज्या त्या राज्यातील नागरिकांना प्रथम प्राधान्य दिले गेले पाहिजे.अशी अपेक्षा आता वाढत्या परप्रांतीयांच्या लोंढ्यामुळे पुढे आली आहे. गावे महाराष्ट्रातील , पण जिथे तिथे परप्रांतीयांची एवढी संख्या वाढते आहे कि, मूळ मराठी , महाराष्ट्रीयन दिसेनासा होतो आहे. या पार्श्वभूमीवर परिवहनमंत्री प्रताप सरनाईक यांनी घेतलेल्या निर्णयाचे स्वागत होता असताना आता पुण्याच्या महापौर मंजुषाताई नागपुरे असाच निर्णय पथारी स्टॉल धारकांना परवाना देताना किंवा पथारी स्टॉल धारकांचे पुनर्वसन करताना घेतील काय ? असा प्रश्न उपस्थित होतो आहे.

पुणे: राजकारणापलीकडे जाऊन जेव्हा समाज एकत्र येतो, तेव्हाच खऱ्या अर्थाने विचारांची पेरणी होते. भारतरत्न डॉ. बाबासाहेब आंबेडकर यांच्या १३५ व्या जयंतीनिमित्त पुण्याच्या कोथरूडमध्ये असेच एक ‘समरसतेचे’ चित्र पाहायला मिळाले. राज्याचे उच्च व तंत्रशिक्षण मंत्री चंद्रकांतदादा पाटील यांनी केवळ औपचारिक अभिवादन न करता, आपल्या ‘देवाशिष’ निवासस्थानी समाजातील सर्व स्तरांतील नागरिकांना एकत्र आणून एक नवा आदर्श निर्माण केला.

डॉ. बाबासाहेबांनी दिलेला ‘समानता आणि बंधुभाव’ हा मंत्र केवळ भाषणांतून न सांगता, चंद्रकांतदादांनी तो आपल्या कृतीतून दाखवून दिला. कोथरूडमधील सफाई कामगारांपासून ते उच्चपदस्थ अधिकाऱ्यांपर्यंत आणि कष्टकरी महिलांपासून ते विद्यार्थ्यांपर्यंत सर्वजणांना एकाच छताखाली एकत्रित आणून महामानवाला अभिवादन केले.

याप्रसंगी भन्ते डॉ. हरिषबोधी महाथेरो, भिक्खू हर्षवर्धन थेरो, भिक्खू आनंद मेत्ता, भिक्खूणी धम्म दर्शनी आणि भिक्खूणी महाबोधी मेत्ता यांनी उपस्थित राहून मंत्री चंद्रकांतदादा पाटील यांना आशिर्वाद दिले. ना. पाटील यांनीही भिक्खू संघाला अत्यंत श्रद्धेने ‘चिवरदान’ करून आपला आदर व्यक्त केला. यानंतर उपस्थित सर्व भन्ते आणि भिक्खूंनी सर्व अनुयायांना तसेच नागरिकांना डॉ. बाबासाहेब आंबेडकर यांच्या जयंतीनिमित्त मंगलमय शुभेच्छा दिल्या.”

कार्यक्रमाचे वैशिष्ट्य म्हणजे यावेळी कोणतीही मोठी व्यासपीठे की लांबलचक भाषणे नव्हती. तर फक्त आपुलकी आणि संवाद होता. आलेल्या प्रत्येक नागरिकाशी दादांनी वैयक्तिक विचारपूस केली. तसेच, बाबासाहेबांचे विचार आपल्या आचरणात येणे हेच त्यांना अभिवादन आहे, हा संदेश त्यांनी उपस्थितांवर बिंबवला.

या कार्यक्रमास उपमहापौर परशुराम वाडेकर, भाजप शहराध्यक्ष धीरज घाटे, ज्येष्ठ विधिज्ञ ॲड. आणि सामाजिक कार्यकर्ते एस. के. जैन, रिपाइं गटाचे सचिन खरात, रिपाइं आठवले गटाचे शहराध्यक्ष शैलेंद्र चव्हाण, संजय सोनवणे, अशोक धिवरे, अविनाश साळवे, रत्नाकर गायकवाड, डॉ. विजय खरे, अतुल साळवे, डॉ. प्रशांत पगारे, ॲड. भाई विवेक चव्हाण, राहुल डंबाळे, यशवंत नडगम, सिताराम गंगावणे, ॲड. महेश सकट, हिमाली कांबळे, नगरसेविका पल्लवी जावळे, अश्विनी भंडारे, माजी नगरसेवक राहुल भंडारे, बाळासाहेब जानराव, असित गांगुर्डे, संजय सोनावणे, रावसाहेब राखपसरे, राजू जाधव, महेंद्र कांबळे, उमेश चव्हाण यांच्यासह पुणे शहरातील आंबेडकरी चळवळीतील अनेक दिग्गजांनी उपस्थिती लावली.

मंत्री चंद्रकांतदादा पाटील यांच्या पुढाकारामुळे कोथरूडमध्ये ‘एकता आणि समतेचा’ एक नवा आदर्श प्रस्थापित झाला. दादांच्या या संवेदनशील पुढाकाराचे सर्व स्तरांतून कौतुक होत असून, “हेच आहे खऱ्या अर्थाने बाबासाहेबांच्या विचारांचे आचरण,” अशी भावना उपस्थितांनी याप्रसंगी व्यक्त केली.