पुणे-कात्रज-स्वारगेट – हडपसर गाडीतळ या मार्गावरील पीएमपीएमएल च्या बसेस मधील वाढत्या चोऱ्या मुळे पोलीस आणि प्रवासी हैराण झाले असताना आता अशा चोऱ्यांच्या प्रकरणात २५ आणि ३० वर्षीय २ तरुणींना पोलिसांनी ताब्यात घेऊन एकूण ५ चोऱ्यांचा तपास लावला आहे. या प्रकरणी आता पर्यंत एकूण ६ तोळे वजनाचे दागिने पोलिसांनी हस्तगत केले आहेत .

या संदर्भात पोलिसांनी सांगितले कि,’
स्वारगेट पोलीस ठाणे पुणे शहर गु.र.नं. १८०/२०२४ भा.द.वि.कलम ३७९ मधील फिर्यादी हे दि.१४/०५/२०२४ रोजी आळंदी पी एम पी एम एल बस स्टॉप येथे बसमध्ये चढत असताना मोठया प्रमाणात गर्दी होती सदर गर्दीचा फायदा घेवुन अज्ञात चोरट्याने फिर्यादी यांच्या डावे हातातील सोन्याची बांगडी चोरी केली होती. त्यावरुन फिर्यादी यांनी फिर्याद दिल्यावरुन वर नमुद गुन्हा दाखल करण्यात आला होता. दाखल गुन्हयातील आरोपीचा शोध घेणे बाबत वरिष्ठ पोलीस निरीक्षक युवराज नांद्रे स्वारगेट पोलीस स्टेशन पुणे शहर यांनी तपास पथकातील अधिकारी अंमलदार यांना आदेशीत केले होते.
सदर गुन्हयाचे तपासा दरम्यान स्वारगेट पोलीस स्टेशनकडील दामिनी मार्शल वरील महिला पोलीस अंमलदार अनिता घायतडक या दि. १९/१२/२०२४ रोजी स्वारगेट एसटी स्टॅन्ड परिसरामध्ये पेट्रोलिंग करीत असताना कात्रज पीएमपीएल बस स्टॉप येथे काळा व हिरव्या रंगांचा टॉप परिधान केलेल्या अशा वर्णनाच्या दोन महिला ह्या संशयितरित्या फिरत असल्याचे दिसुन आल्याने त्यांना त्यांचेवर संशय निर्माण झाल्याने त्यांनी लागलीच मदती कामी तपास पथकातील अंमलदार संदीप घुले व सुजय पवार यांना सदर ठिकाणी बोलावुन घेवुन सदर महिलांना ताब्यात घेवुन त्यांना त्यांचा नाव व पत्ता विचारता त्यांनी त्यांचे नाव व पत्ता अनुक्रमे १) दुर्गा अविनाश उपाध्याय वय ३० वर्षे रा. सध्या म्हाडा कॉम्पलेक्सजवळ, खडकी पुणे, मुळगाव सरकारी दवाखान्याजवळ, दर्याचे पाठीमागे, बापुनगर गुलबर्गा कर्नाटक २) लक्ष्मी मिवा सकट वय २५ वर्षे रा. सध्या म्हाडा कॉम्पलेक्स जवळ, खडकी पुणे, मुळगाव होम मैदान सिद्धेश्वर मंदीराजवळ सोलापुर असे असल्याचे सांगितले सदर संशयित महिलांना सदर ठिकाणी विनाकारण फिरण्याबाबत विचारणा केली असता त्यांनी उडवाउडवीची उत्तरे दिली तद्नंतर सदर महिलांना महिला पोलीस अंमलदार यांचे मदतीने स्वारगेट पोलीस स्टेशन येथे आणुन त्यांचे कडे महिला पोलीस अंमलदार धायतडक यांचे समक्ष पोलीस अंमलदार संदीप घुले व सुजय पवार यांनी कौशल्य पुर्ण तपास केला असता त्यांनी सांगितले कि, गेले ७ ते ८ महिन्यांपुर्वी त्या दोघींनी स्वारगेट येथील आळंदी पी.एम.टी बस स्टॉप येथे एका महिलेच्या हातातील बांगडी चोरी केली होती. असे सांगितल्याने स्वारगेट पोलीस स्टेशन कडील गुन्हे अभिलेखाची पडताळणी केली असता सदर

आरोपीतांनी स्वारगेट पोलीस स्टेशन गुन्हा रजि नंबर १८०/२०२४ भादंविकलम ३७९ प्रमाणे गुन्हा केल्याचे निष्पन्न झाले आहे. सदर महिला आरोपींना दाखल गुन्हयात अटक करुन पोलीस कोठडी मधील तपासा दरम्यान त्यांचे कडुन ०४,८८,०००/- रु. किं. चे ६० ग्रॅम वजनाचे (६ तोळे) सोन्याचे दागीने तपासा दरम्यान जप्त करुन स्वारगेट पोलीस स्टेशन येथे दाखल असलेले सोने चोरीचे एकुण ०५ गुन्हे उघडकीस आणले आहेत ते पुढीलप्रमाणे-
१) स्वारगेट पो.स्टे.गु.र.नं १८०/२०२४ भादंविकलम ३७९ प्रमाणे
२) स्वारगेट पो.स्टे.गु.र.नं.५०७/२०२४ भा.न्या.सं. कलम.३०३ (२) प्रमाणे
३) स्वारगेट पो.स्टे.गु.र.नं. ४९३/२०२४ भा.न्या.सं. कलम.३०३(२) प्रमाणे
४) स्वारगेट पो.स्टे.गु.र.नं. २९५/२०२४ भा.न्या.सं. कलम.३०३ (२) प्रमाणे
५) स्वारगेट पो.स्टे.गु.र.नं. ४७३/२०२४ भा.न्या. सं. कलम. ३०३ (२) प्रमाणे
सदरची कामगिरी ही अप्पर पोलीस आयुक्त, पश्चिम प्रादेशिक विभाग, पुणे शहर, श्री. प्रविणकुमार पाटील मा. पोलीस उप-आयुक्त, परि.२ श्रीमती स्मार्तना पाटील मा. सहा. पोलीस आयुक्त, स्वारगेट विभाग, श्री. राहुल आवारे, यांचे मार्गदर्शनाखाली स्वारगेट पोलीस स्टेशनचे वरिष्ठ पोलीस निरीक्षक श्री. युवराज नांद्रे यांचे आदेशान्वये तपास पथकातील सहा. पोलीस निरीक्षक राहुल कोलंबीकर, पोलीस उप-निरीक्षक रविंद्र कस्पटे, पोलीस अंमलदार मोराळे, तनपुरे, घुले, पवार, शिंदे, टोणपे, खेदाड, शेख, चव्हाण, दुधे, महिला पोलीस अंमलदार सिताप, शिंदे, अनिता धायतडक, सांगोलकर यांनी केली

पुणे-२१ वर्षे वयाच्या चोरट्यास पकडून त्याने चोरलेल्या ६ दुचाक्या हडपसर पोलिसांनी हस्तगत केल्या आहेत.

या संदर्भात पोलिसांनी सांगितले कि,’दि.२३/१२/२०२४ रोजी दरोडा व वाहनचोरी विरोधी पथक-२ मधील पोलीस अधिकारी व पोलीस अंमलदार हडपसर पोलीस स्टेशन कार्यक्षेत्रात गस्त करीत असताना, पोलीस अंमलदार विक्रांत सासवडकर यांना मिळालेल्या बातमीप्रमाणे त्यांनीअर्जुन हिराजी भोसले वय २१ वर्षे रा. दत्त मंदिराचे जवळ अप्पर इंदिरानगर पुणे याचे कब्जात मिळुन आलेली दुचाकी ही चोरीची असल्याचा संशय आल्याने त्यास ताब्यात घेवुन त्याचेकडे अधिक तपास केला असता त्याने पुणे शहर कार्यक्षेत्रातुन दुचाकी वाहने विक्री करण्याचे उद्देशाने चोरी केली होती, नमुद आरोपी अर्जुन हिराजी भोसले याचेकडुन १,६५,०००/- रु.च्या एकुण ०६ दुचाकी वाहने जप्त करण्यात आलेली आहे. त्याचेकडुन हडपसर, विश्रामबाग, भारती विद्यापीठ, चतुश्रृंगी व डेक्कन पोलीस स्टेशन कडील एकुण ६ वाहन चोरीचे गुन्हे उघडकीस आणलेले आहेत.
सदरची कामगिरी अपर पोलीस आयुक्त (गुन्हे), पुणे शहर शैलेश बलकवडे, पोलीस उप- आयुक्त (गुन्हे) निखिल पिंगळे, सहा. पोलीस आयुक्त गुन्हे २ राजेंद्र मुळीक यांचे मार्गदर्शनाखाली वरिष्ठ पोलीस निरीक्षक वाहिद पठाण (अतिरीक्त कार्यभार) दरोडा वाहन चोरी पथक २, सहा.पो. निरी. सी.बी.बेरड, पोलीस अंमलदार राजेश अभंगे दिनकर लोखंडे, अशोक आटोळे, राजेश लोखंडे, विनायक रामाणे, दत्तात्रय खरपुडे, सुनिल महाडीक, गणेश लोखंडे, राहुल इंगळे, विक्रांत सासवडकर, विनायक येवले व अमोल सरतापे यांनी केली आहे.

पुणे- येथील सहकारनगर पोलिसांनी २ लहान मुले पकडून त्यांनी केलेले घरफोडीच्या गुन्ह्याचा पर्दाफाश केला आणि त्यांच्याकडून ९०,०००/- रुपये किंमतीचे सोन्याचे दागिन्यासह मुद्देमाल जप्त केला. पोलिसांनी सांगितले कि,’
दि.०९/१२/२०२४ रोजी रात्रौ २३.०० वा.ते दि.१०/१२/२०२४ रोजी सकाळी ०९/०० वा.चे दरम्यान फिर्यादी यांचे राहते घराचा दरवाजा कशाचे तरी सहाय्याने उघडुन घरात प्रवेश करुन घराचे कपाटे उचकटुन कपाटात ठेवलेले सोन्या चांदीचे दागीने कोणीतरी अज्ञात इसमाने चोरून नेले त्या बाबत अज्ञात इसमाविरूध्द सहकारनगर पोलीस स्टेशन गु.र.नं.४३५/२०२४ भारतीय न्याय संहीता २०२३ चे कलम ३३१ (३), ३३१ (४) ३०५ प्रमाणे गुन्हा दाखल करण्यात आला होता.
दिनांक २४/१२/२०२४ रोजी सदर दाखल गुन्हयाचा तपास वरिष्ठ पालीस निरीक्षक छगन कापसे यांचे मार्गदर्शनाखाली सहकारनगर पोलीस स्टेशन कडील तपास पथकातील अधिकारी व अंमलदार असे तपास करित असताना पोलीस अंमलदार महेश मंडलीक यांना त्यांच्या बातमी मिळाली की सदर गुन्हा हा तळजाई वसाहतीमधील रेकॉर्डवरील बालकांनी केला असुन ते तळजाई वसाहतीमधील बदाम चौकाचे अलीकडे एका रिक्षामध्ये बसलेले असुन त्यांचेकडे सोन्याचे दागीने आहेत. त्यांना ताब्यात घेवुन त्याच्या कडे पालकांन समक्ष सदर गुन्हयाच्या अनुशंगाने तपास केला असता सदर विधीसंघर्षीत बालकांनी सदरचा गुन्हा केल्याचे कबुल केल्याने दोन बालकांना ताब्यात घेवुन त्यांचे कडुन चोरीस गेलेले दागिने असा एकुण ९०,०००/- रुपये किंमतीचा मुद्देमाल जप्त करण्यात आला आहे.
सदरची कामगीरी अपर पोलीस आयुक्त पश्चिम प्रादेशीक विभाग प्रविणकुमार पाटील, पोलीस उपायुक्त परिमंडळ-२, श्रीमती स्मार्तना पाटील, सहा. पोलीस आयुक्त, स्वारगेट विभाग राहुल आवारे, वरिष्ठ पोलीस निरीक्षक छगन कापसे, यांचे मार्गदर्शनाखाली सहकारनगर पोलीस स्टेशन तपास पथकाचे सहा पोलीस निरीक्षक सागर पाटील, सहा. पोउपनिरी बापु खुटवड, पोलीस अंमलदार महेश मंडलिक, अमोल पवार, किरण कांबळे, बजरंग पवार, चंद्रकांत जाधव, अमित पदमाळे, सागर सुतकर, खंडु शिंदे, योगेश ढोले, महेश भगत यांनी केली आहे.

सांस्कृतिक कला महोत्सवात कलागुणांचे, सृजनशीलतेचे मनोहारी सादरीकरण
पुणे: मनोहारी गणेश वंदना, आदिशक्तीचा जागर… कर्णमधुर गीतांचे व पोवाड्यांचे गायन… प्रबोधनपर नाटिकांचे सादरीकरण… भारुडांतून अंधश्रद्धा निर्मूलन… वारकरी वेशात हरिनामाचा गजर अन देशभक्तीपर गीतांचा गहिवर… नेत्रदीपक नृत्याविष्कार… विद्यार्थ्यांतील कलागुणांचे, सृजनशीलतेचे मनमोहक सादरीकरण पाहून उपस्थितांनी टाळ्यांचा केलेला कडकडाट अन भरभरून कौतुक!
निमित्त होते, धारेश्वर विद्या व क्रीडा प्रतिष्ठान संस्थेत आयोजित सांस्कृतिक कला महोत्सव सप्ताहाचे! सलग सात दिवस धायरी येथील धारेश्वर विद्या व क्रीडा प्रतिष्ठान शैक्षिणक संकुलात वार्षिक सांस्कृतिक कला महोत्सव मोठ्या उत्साहात साजरा झाला. संस्थेच्या सर्व शाखांमधील विद्यार्थ्यांनी आपापली कला या महोत्सवात सादर केली. विविध कला, परंपरा व सृजनशीलतेचे दर्शन घडवणारा हा महोत्सव पाहण्यासाठी विद्यार्थी, पालक व परिसरातील नागरिकांनी मोठी गर्दी केली होती.
विद्यार्थ्यांनी गणेश वंदना, आदिशक्तीचा जागर, कोळी नृत्य, कव्वाली, पाणी अडवा पाणी जिरवा, मिशन मंगलम, खंडोबाचा जागर, महाराष्ट्राची संतपरंपरा, छत्रपती शिवाजी महाराज यांच्या जीवनावर आधारित विविध प्रसंग व पोवाडे आणि विविध नाटिकांच्या माध्यमातून सादरीकरण केले. मोबाईल पाहण्याचे दुष्परिणाम आणि खेळाचे फायदे यावर भाष्य करणारी नाटिका, विविध ऐतिहासिक प्रसंगावर गीतांच्या माध्यमातून केलेले भाष्य, छत्रपती शिवाजी महाराज, छत्रपती संभाजी महाराज आणि हिरकणी यांच्या इतिहासाची महती पटवून देणारे प्रसंग सादर केले. देशभक्तीपर गीतांतून ‘जय जवान, जय किसान’चा नारा दिला. भारतरत्न स्वर्गीय रतन टाटा यांनाही गीतांच्या माध्यमातून श्रद्धांजली अर्पण करण्यात आली.
या सांस्कृतिक महोत्सवासाठी विविध क्षेत्रातील मान्यवरांनी हजेरी लाऊन विद्यार्थ्यांचे कौतुक केले. राज्य महिला आयोगाच्या अध्यक्षा रूपाली चाकणकर, शिक्षण विभागाच्या सुवर्णाताई फणसे, प्रशांत नेटवटे, संस्थेचे अध्यक्ष काकासाहेब बंडोजी चव्हाण, पदाधिकारी नंदूशेठ बंडोजी चव्हाण, भीमराव बंडोजी चव्हाण, सचिव सुधाकरराव जाधवर, संचालक अनिकेत काकासाहेब चव्हाण, संचालिका सुनिता काकासाहेब चव्हाण, हर्षदा अनिकेत चव्हाण, रवीना अवधूत चव्हाण यांच्यासह धायरी व परिसरातील सर्व मान्यवर उपस्थित होते. महोत्सवाचे नियोजन विविध शाखांचे मुख्याध्यापक विकास कुंभार, विलास खाडे, माधव काकडे, डॉ. सुनीता चव्हाण, दीपक खेडकर, वंदना काकडे, मदन सूर्यवंशी यांनी सर्व शिक्षकांच्या सहकार्याने केले. महोत्सवाच्या यशस्वीतेसाठी विद्यार्थ्यांसह पालकांनी अतिशय मोलाचे योगदान दिले.
“धारेश्वर विद्या व क्रीडा प्रतिष्ठान गेली २५ वर्षे विद्यार्थ्यांना दर्जेदार शिक्षण देण्यासाठी कार्यरत आहे. आपल्या विद्यार्थ्यांना एक व्यासपीठ मिळवून देण्याच्या उद्देशाने दरवर्षी हा सांस्कृतिक महोत्सव आयोजिला जातो. त्यातून विद्यार्थ्यांच्या कलागुणांना वाव मिळतो. त्यांच्यात नवी ऊर्जा निर्माण होते. विद्यार्थी, शिक्षक व पालकांच्या एकत्रित मेहनतीमुळे यंदाचा महोत्सव अतिशय दर्जेदार झाला आहे.”- काकासाहेब चव्हाण, अध्यक्ष, धारेश्वर विद्या व क्रीडा प्रतिष्ठान

पुणे- मराठी भाषेला अभिजात भाषेचा दर्जा मिळाला अभिमान आहे आम्हाला ..पण यामुळे किती मराठी भाषिकांचे कोणकोणते फायदे झाले ? मराठी भाषेचा किती प्रसार झाला ? निवडणुकीच्याच तोनावर पुण्यात मराठी भाषा भवनाचे लोकार्पण देखील करण्यात आले काय झाले या भवना मुळे.. नेमके काय साधले ? अशा प्रश्नांचा आता मारा होऊ लागला असताना मराठी भाषा भवनाच्या दुरावस्थेची पोलखोल शिवसेना ठाकरे गटाचे शहर प्रमुख संजय मोरे युवासेना शहर अधिकारी राम थरकुडे, शहर समन्वयक युवराज पारिख, संघटक अजय परदेशी यांनी केली आहे.

ते म्हणाले ,’ एक मे 2024 रोजी पुणे विद्यापीठ येथे मराठी भाषा भवनचे लोकार्पण करण्यात आले. परंतु त्या दिवसापासून आज पर्यंत मराठी भाषा भवनाचा एकाही विद्यार्थ्याला उपयोग झालेला नाही. आतील सर्व पुस्तके दोरीने बांधून ठेवलेल्या अवस्थेत आहेत. तसेच सदर वास्तूला गळती लागल्याचे दिसून येते. निकृष्ट दर्जाचे काम झालेले आहे, लाईट नाही, पाणी नाही, बाथरूम नाही. बसायला खुर्च्या, टेबल नाही. उद्घाटनावर लाखो रुपये खर्च करूनही मराठी भाषा भवन वापरात येणार नव्हते तर याचे लोकार्पण का करण्यात आले ? मराठी भाषा भवनच्या चारही बाजूने पत्र्याचं कंपाउंड करून बंद ठेवण्यात आलेले आहे. अनेक ठिकाणी भिंतींचे प्लास्टर उखडलेले आहे. पुस्तकांवर धुळीचे साम्राज्य आहे. विद्यार्थ्यांना बसायला काहीही व्यवस्था नाही. विद्यार्थी येऊन याचा लाभ घेतात असं सांगितलं जातं, परंतु असे काहीही आढळून येत नाही. पुणे विद्यापीठाचे साडेसहाशे कोटीचे बजेट असून या बजेटचा अपव्यय होताना दिसत आहे. मुख्य इमारत ही हेरिटेज वास्तूमध्ये गणली जाते. तरीही इमारतीला बेकायदेशीररित्या होल मारून लाईट्स लावण्यात आले. त्याचा खर्च अडीच कोटी रुपये दाखवण्यात आला. तसेच विद्यापीठामध्ये फायबर ऑप्टिक केबल टाकण्यासाठी साडेचार कोटी रुपये खर्च करण्यात आले. परंतु तशी केबल कुठेही टाकल्याचे किंवा राउटर बसविल्याचे दिसून येत नाही.संसदेत मराठी भाषेला अभिजात दर्जा दिल्याचे फर्मान काढले जाते. आणि याच महाराष्ट्रामधे मराठीची गळचेपी होताना दिसत आहे. मागील दहा वर्षापासून सदर मराठी भाषा भवनच्या ईमारतीचे काम सुरू आहे. परंतू लोकसभा व विधानसभा निवडणूकीच्या तोंडावर मराठी माणसाचा विश्वास संपादन करण्यासाठी अर्धवट काम असताना लोकार्पण घाईघाईने केले गेले. कोनशिलेवर नाव याव म्हणून उद्घाटनाचा घाट घातला गेला का ? याप्रसंगी पुणे विद्यापीठात शिवसेना पुणे शहरप्रमुख संजय मोरे, युवासेना शहर अधिकारी राम थरकुडे, शहर समन्वयक युवराज पारिख, संघटक अजय परदेशी उपस्थित होते.

वल्लरी प्रकाशनच्या वतीने गोकर्ण आणि हरिप्रिया  काव्यसंग्रहाचे प्रकाशन

पुणे: कवितेचे बीजारोपण जरी कवीने केले, तरी ती फक्त एका व्यक्तीची राहत नाही. ज्याची अनुभव संपन्नता जास्त, त्याची कविता तेवढीच समृद्ध होते. निखळ कविता लिहिणे ही एक कला आहे, तर कवितेचे प्रभावी सादरीकरण हे शास्त्र आहे. कवीने दोन्ही गोष्टींत पारंगत असणे महत्वाचे असते कारण प्रेक्षकांसमोर सादरीकरण करताना अभ्यासपूर्ण दृष्टिकोन गरजेचा आहे, असे मत ज्येष्ठ कवी म. भा. चव्हाण यांनी व्यक्त केले.

वल्लरी प्रकाशनच्या वतीने व्यंकटेश कल्याणकर संपादित “गोकर्ण” या प्रातिनिधिक काव्यसंग्रहाचे आणि डॉ. सारिका बावस्कर यांच्या “हरिप्रिया” या काव्यसंग्रहाचे प्रकाशन साहित्य परिषदेच्या माधवराव पटवर्धन सभागृहात संपन्न झाले. यावेळी गझलकार आनंद पेंढारकर, कवयित्री कांचन सावंत, साहित्यिका मानसी चिटणीस, संपादक व्यंकटेश कल्याणकर, कवयित्री डॉ. सारिका बावस्कर इत्यादी मान्यवर उपस्थित होते.

आनंद पेंढारकर म्हणाले, कविता लिहिताना कवीने आधीच्या कवींनी लिहिलेल्या कवितांचा अभ्यास करणे, स्वतःच्या कवितांना वारंवार वाचून त्यात सुधारणा करणे आवश्यक आहे. तसेच भाषेचा गाढा अभ्यास असणे महत्त्वाचे आहे. कवी सामाजिक भान ठेवून लिहितो, तेव्हा त्याच्या कवितेत वास्तव अधिक स्पष्टपणे दिसते, त्याकरीता त्याला सामाजिक भान असणे देखील गरजेचे आहे, असेही त्यांनी सांगितले.

कांचन सावंत म्हणाल्या, “कविता म्हणजे केवळ प्रेम किंवा विरह नव्हे. याहूनही व्यापक विषय कवितेचे होऊ शकतात. त्याकडे नव्याने पाहण्याची गरज आहे. अभ्यासपूर्ण दृष्टिकोनातून कविता आपोआप सुचू लागते, त्यासाठी वेगळा विचार करण्याची गरज नसते, असेही त्यांनी सांगितले.

व्यंकटेश कल्याणकर म्हणाले, तंत्रज्ञानाने जग जवळ आणले असले तरी माणसे एकमेकांपासून दुरावत चालली आहेत. कृत्रिम बुद्धिमत्तेच्या मदतीने गोकर्ण या शब्दावर १० सेकंदांत १० कविता मिळतील, परंतु स्वतःच्या जगण्याला स्वतःच्या शब्दांत मांडणे ही खरी कविता आहे. गोकर्ण हा संग्रह कविता लिहिणाऱ्या कविच्या जीवनातील प्रत्येकासाठी समर्पित आहे.

प्रज्ञा कल्याणकर यांनी कार्यक्रमाचे सूत्रसंचालन केले. तर ज्योती इनामदार यांनी आभार मानले.  कार्यक्रम यशस्वीतेसाठी सचिन गोंगटल्लू, आर्या इनामदार, अनिष कुलकर्णी आदींनी परिश्रम घेतले.

पुणे, 25 डिसेंबर, 2024: महाराष्ट्राच्या 58व्या वार्षिक निरंकारी संत समागमाचे भव्य आयोजन सतगुरु माता सुदीक्षाजी महाराज आणि आदरणीय निरंकारी राजपिता रमितजी यांच्या पावन छत्रछायेमध्ये दिनांक 24, 25 व 26 जानेवारी, 2025 रोजी मिलीटरी डेअरी फार्म ग्राउंड, पिंपरी पॉवर हाउस जवळ, शास्त्री नगर, पुणे 411017 (महाराष्ट्र) येथील विशाल मैदानांवर आयोजित केला जात आहे. परमात्म्याची ओळख करुन मानवी जीवन दिव्य गुणांनी युक्त करत अनंताकडे विस्तारित करुन विश्वामध्ये सौहार्द व शांतीसुखाचे वातावरण निर्माण करणे हा या संत समागमाचा मुख्य उद्देश आहे.

​या भव्यदिव्य आध्यात्मिक आयोजनाची पूर्वतयारी करण्यासाठी स्वेच्छा सेवांचा विधिवत शुभारंभ संत निरंकारी मंडळाच्या प्रचार-प्रसार विभागाचे मेंबर इंचार्ज आदरणीय श्री.मोहन छाब्राजी यांच्या शुभहस्ते बुधवार, दि. 25 डिसेंबर, 2024 रोजी करण्यात आला. या प्रसंगी संत निरंकारी मंडळाच्या वित्त व लेखा विभागाचे मेंबर इंचार्ज श्री.जोगिंदर मनचंदा, प्रचार प्रसार कॉर्डिनेटर (महाराष्ट्र) डॉ.दर्शन सिंह, समागम समितीचे चेअरमन श्री.शम्भुनाथ तिवारी, समन्वयक श्री.ताराचंद करमचंदानी आणि समागम समितिच्या अन्य सदस्यांसहित समस्त महाराष्ट्रातील सेवादल क्षेत्रीय संचालक उपस्थित होते. हजारो सेवादल स्वयंसेवकांसह महाराष्ट्राच्या वेगवेगळ्या भागातून मोठ्या संख्येने आलेल्या भाविक भक्तगणांनी या समारोहामध्ये भाग घेतला.

स्वेच्छा सेवांच्या उद्घाटन प्रसंगी आपले भाव व्यक्त करताना आदरणीय श्री.मोहन छाब्राजी म्हणाले, की सतगुरुंच्या असीम कृपेने आयोजित होत असलेल्या या संत समागमामध्ये तोच सत्याचा संदेश दिला जाईल जो युगानुयुगे संत-महापुरुषांनी समस्त मानवतेला दिला.
ते पुढे म्हणाले, की संत निरंकारी मिशन मानवता व विश्वबंधुत्वाचे मिशन आहे. परमात्म्याचे ज्ञान प्राप्त केल्याने मानवा-मानवातील अंतर संपून जाते आणि एकमेकांशी प्रेमाचे नाते जोडले जाते. ज्यायोगे वैर, द्वेष, ईर्षा यांसारख्या दुर्भावना दूर होतात. ब्रह्मानुभूतिने आत्मानुभूति प्राप्त करुन मानवी गुणांनी युक्त होऊन धरतीसाठी वरदान बनेल असे जीवन जगणे हे मनुष्य जीवनाचे मुख्य लक्ष्य आहे.

​उल्लेखनीय आहे, की महाराष्ट्रात वार्षिक निरंकारी संत समागमांची परंपरा फार जुनी आहे. 1968 मध्ये महाराष्ट्राचा पहिला संत समागम मुंबईतील प्रसिद्ध शिवाजी पार्क मैदानावर आयोजित करण्यात आला व त्यानंतर सतत 52 संत समागम मुंबई महानगरातच होत आले. सन 2020मध्ये 53वा संत समागम नाशिक मध्ये झाला, 56वा संत समागम छत्रपती संभाजी नगर येथे तर 57वा संत समागम नागपुर नगरी येथे आयोजित करण्यात आला. यावर्षी हा 58वा संत समागम आयोजित करण्याचे सौभाग्य वि़द्येचे माहेरघर पुणे नगरीला प्राप्त झाले आहे, ज्याचे साक्षी अवघे विश्व होईल.

​समालखा येथे आयोजित 77व्या वार्षिक निरंकारी संत समागमानंतर प्रतिवर्षाप्रमाणे प्रत्येक भक्त महाराष्ट्राच्या 58व्या वार्षिक निरंकारी संत समागमाची मोठ्या आतुरतेने वाट पाहत आहेत.

​हा दिव्य संत समागम सर्वार्थाने यशस्वी व्हावा यासाठी निरंकारी सेवादलाचे स्वयंसेवक आणि मोठ्या संख्येने अन्य निरंकारी भक्तगण मोठ्या तन्मयतेने समागम स्थळावर पूर्वतयारीसाठी आपल्या निष्काम सेवा अर्पण करत आहेत.

पुणे- पिंपरी चिंचवड पोलिस हफ्तेवसुली करतात. पोलिसांचा कारभार हा कुणालातरी पाठिशी घालण्यासाठी सुरू असल्याचे दिसून येते. सामान्यांच्या प्रश्नांऐवजी मलाईदार समस्यांना प्राधान्य देतात. यामुळे सरकार बदनाम होत आहे, असे तक्रार शिंदे गटाचे खासदार श्रीरंग बारणे यांनी पोलिस आयुक्तांकडे केली आहे.दरम्यान मंत्रिमंडळ विस्तार रखडला त्या काळात गृहमंत्रीपदावरुन भाजप-शिवसेनेत रस्सीखेच सुरू होती. यावेळी शिवसेना प्रवक्ते संजय शिरसाट यांनी गृहखात्यावर एखादा डॅशिंग नेता असायला पाहिजे, असे वक्तव्य केले होते. त्यानंतर आता शिवसेना खासदार श्रीरंग बारणे यांनी राज्याच्या गृहविभागाच्या कारभारावर बोट ठेवले आहे.

श्रीरंग बारणे म्हणाले की, पिंपरी-चिंचवड पोलिस आयुक्तालय हद्दीतील पोलिस ठाण्यात येणाऱ्या सर्वसामान्य नागरिकांच्या तक्रारींची तत्काळ दखल घेतली जात नाही, तक्रारदाराला मानसिक त्रासाला सामोरे जावे लागते म्हणूनच सर्व तक्रारी तत्काळ आणि योग्य प्रकारे हाताळल्या जाव्यात. तक्रारींकडे दुर्लक्ष करणाऱ्या अधिकाऱ्यांना योग्य त्या सूचना दिल्या पाहिजेत. जनतेचा सरकारवरील विश्वास कायम ठेवणे आणि त्यांना न्याय मिळवून देणे, हे प्रशासनाचे प्रमुख कर्तव्य आहे, असेही मी स्पष्ट केले.

श्रीरंग बारणे म्हणाले की, पोलिसांचा कारभार हा कुणालातरी पाठिशी घालण्यासाठी सुरू असल्याचे दिसून येते. यात मलाईदार प्रश्नाकडे पोलिस पहिले लक्ष घालतात. मात्र सर्वसामान्यांच्या तक्रारीमध्ये ते लक्ष घालत नाहीत. माझ्याकडे हिंजवडी, वाकड, काळेवाडी, सांगवीसह मालदार पोलिस ठाण्याची तक्रार आल्याचे एका मराठी वृत्तवाहिनीला बोलताना म्हटले आहे.श्रीरंग बारणे म्हणाले की, सरकार कुठेच बदनाम होता कामा नये. देवेंद्र फडणवीस, अजित पवार आणि एकनाथ शिंदे यांच्या रुपाने राज्याला सक्षम नेतृत्व मिळाले आहे. . राज्याच्या जनतेने मोठा विश्वास देऊन पुन्हा एकदा सत्ता दिली आहे. म्हणून अशे प्रकार होत असतील ते थांबले पाहिजेत.

महाराष्ट्रात गेल्या 10 वर्षांपैकी साडेसात वर्ष गृहखातं हे देवेंद्र फडणवीस यांच्याकडे होते. केवळ महाविकास आघाडीच्या काळात माजी गृहमंत्री अनिल देशमुख यांच्याकडे या खात्याची जबाबदारी होती. या दरम्यान त्यांच्यावर भ्रष्टाचाराचे गंभीर आरोप झाले. मुंबईचे तत्कालीन पोलीस आयुक्त परमबीर सिंह यांनी अनिल देशमुख यांच्यावर शंभर कोटींच्या घोटाळ्याचा आरोप केले होते. त्यामुळे एकच खळबळ उडाली होती.

पुणे : शिवाजी रोडवर एका मद्यधुंद कारचालकाने मोटारसायकलला धडक दिली. त्यानंतर त्याने पळून जाताना अनेक वाहनांना धडक दिली. शेवटी त्याला दीप बंगला चौकात लोकांनी अडवून पोलिसांच्या ताब्यात दिले. चतु:श्रृंगी पोलिसांनी त्याची मेडिकल टेस्ट करुन त्याला पुढील कारवाईसाठी खडक पोलिसांच्या ताब्यात दिले.

दयानंद केदारी असे या कारचालकाचे नाव आहे. याबाबत चतु:श्रृंगी पोलीस ठाण्याचे वरिष्ठ पोलीस निरीक्षक विजयानंद पाटील यांनी सांगितले की, शिवाजी रोडवर प्यारा हॉटेलसमोर एका कारचालकाने मोटारसायकलला धडक दिली होती. या अपघातानंतर कारचालक पळून जात असताना त्याने आणखी काही वाहनांना धडक दिली. मोटारसायकलचालकाने त्याचा पाठलाग केला. त्याला दीप बंगला चौकात अडविले. तेथे लोकांनी त्याला पकडून ठेवून चतु:श्रृंगी पोलिसांच्या ताब्यात दिले. पोलिसांनी त्याची मेडिकल टेस्ट करुन पुढील कारवाईसाठी खडक पोलिसांच्या ताब्यात दिले.

खडक पोलीस ठाण्याचे वरिष्ठ पोलीस निरीक्षक शशिकांत चव्हाण यांनी सांगितले की, हा कारचालक एका हॉटेलमध्ये किचन मॅनेजर आहे. तो दारुच्या नशेत कार चालवत असताना मंगळवारी रात्री दहाच्या सुमारास त्याची मोटारसायकलला धडक बसली. त्यानंतर त्याने अनेक वाहनांना धडक दिली. परंतु, ही धडक किरकोळ असल्याने कोणीही तक्रार न करता निघून गेले. खाली पडलेल्या मोटार सायकलचालकाने या कारचा पाठलाग करण्यास सुरुवात केली. त्यात पळून जाताना त्याने आणखी काही जणांना धडक दिली. दीप बंगला चौकात त्याला लोकांनी पकडले. चतु:श्रृंगी पोलिसांनी त्याला खडक पोलिसांच्या ताब्यात दिले असून त्याच्यावर कारवाई केली जात आहे

पुणे, दि. २४: मराठी भाषा विभागाने मराठी भाषेचा गौरव वाढेल अशा पद्धतीने काम करतानाच हा विभाग प्रत्येकाच्या घरापर्यंत पोहोचेल अशा पद्धतीने काम करावे, असे निर्देश मराठी भाषा मंत्री उदय सामंत व्यक्त केली.

पिंपरी चिंचवड येथे मराठी भाषा विभाग आढावा बैठकीत ते बोलत होते. यावेळी विभागाचे सहसचिव नामदेव भोसले, अखिल भारतीय मराठी नाट्य परिषदेचे उपाध्यक्ष भाऊसाहेब भोईर, मराठी भाषा विभागाचे अवर सचिव नितीन डंगारे, राज्य मराठी विकास संस्थेचे संचालक तथा विश्वकोश निर्मिती मंडळाचे प्रभारी सचिव डॉ. शामकांत देवडे, भाषा संचालक विजया डोणीकर, महाराष्ट्र राज्य साहित्य व संस्कृती मंडळाच्या सचिव मीनाक्षी पाटील, विभागाच्या कक्ष अधिकारी ऐश्वर्या गोवेकर आदी उपस्थित होते.

मंत्री उदय सामंत म्हणाले, राज्यभाषेला अभिजात भाषेचा दर्जा असलेल्या तामिळनाडू किंवा अन्य राज्यांप्रमाणे महाराष्ट्रानेही आपल्या भाषेच्या विकासासाठी केंद्र शासनाकडून अधिकाधिक निधी मिळावा यासाठी प्रस्ताव पाठवून गतीने पाठपुरावा करावा.

ते पुढे म्हणाले, दुसरे विश्व मराठी संमेलन 27, 28 फेब्रुवारी आणि 1 मार्च असे तीन दिवस पुणे येथे घेण्यात येईल. त्यासाठी विभागाने तयारी करावी. तसेच दिल्ली येथे होणाऱ्या विश्व साहित्य संमेल्लनात मराठी भाषेसाठी एक तास राखून त्या माध्यमातून जागतिक स्तरावर मराठी भाषा जाईल यासाठी प्रयत्न करावेत.

राज्यस्तरावर महिला साहित्य संमेलन तसेच विभागनिहाय युवा साहित्य संमेलनाचे आयोजन करण्याचे नियोजन करावे, असे निर्देशही मराठी भाषा मंत्री श्री. सामंत यांनी दिले. देशातील सर्व बृहन्महाराष्ट्र मराठी मंडळांना आमंत्रित करुन मराठी भाषेसाठी काय योगदान देता येईल यासाठी त्यांच्या सूचना जाणून घ्याव्यात. सर्व महाविद्यालयात मराठी भाषा विभागाची प्रकाशने ठेवण्यासाठी प्रयत्न करावेत.

सर्व विद्यापीठातील मराठी भाषा विभागात मराठी भाषा संशोधन केंद्र स्थापन करण्यासाठी प्रस्ताव करावेत. पुस्तकांचे गाव या संकल्पनेच्या अनुषंगाने त्या त्या जिल्ह्यातील नामांकित लेखकांची नावांची यादी करावी, त्याचप्रमाणे कवितांचे गाव या संकल्पनेवरही काम करावे. शासनाच्या सर्व विभागांच्या प्रदर्शनात मराठी भाषा विभागाचे दालन असले पाहिजे, असेही निर्देश त्यांनी यावेळी दिले.

मराठी भाषेला अभिजात मिळाल्याचे महत्त्व तसेच त्यामुळे होणारे लाभांची माहिती युवकांपर्यंत पोहोचविण्यासाठी प्रयत्न करावेत. मराठी भाषा विभागांतर्गत असलेल्या सर्व संस्था, मंडळ, संचालनालयांना चांगली जागा मिळण्यासाठी प्रस्ताव करावेत, त्यासाठी प्रयत्न करण्यात येतील, असेही त्यांनी सांगितले.

पुणे, दि. २४: उद्योगांच्या समस्या सोडविण्यासाठी महाराष्ट्र औद्योगिक विकास महामंडळाने सर्व संबंधित विभागांशी समन्वय साधून उपाययोजना कराव्यात, असे निर्देश उद्योगमंत्री उदय सामंत यांनी दिले. रस्ते, वाहतूक कोंडी, पार्किंगचा प्रश्न सोडविण्यासह आवश्यक तेथे उद्योगांना जागा, पायाभूत सुविधा उपलब्ध करून दिल्या जातील, अशी ग्वाहीदेखील त्यांनी दिली.

पिंपरी चिंचवड येथे उद्योग विभागाच्या आढावा बैठकीत ते बोलत होते. यावेळी महाराष्ट्र औद्योगिक विकास महामंडळाचे मुख्य अभियंता नितीन वानखडे, पुणे महानगर प्रदेश विकास प्राधिकरणाचे मुख्य अभियंता अशोक भालकर, भारतीय राष्ट्रीय महामार्ग प्राधिकरणाचे प्रकल्प संचालक संजय कदम, पुणे विभागाचे उद्योग सहसंचालक शैलेंद्र राजपूत, महाराष्ट्र औद्योगिक विकास महामंडळाच्या प्रादेशिक अधिकारी अर्चना पाठारे, अधीक्षक अभियंता निलेश मोढवे आदींसह उद्योग संघटना, उद्योगांचे प्रतिनिधी उपस्थित होते.

बैठकीत हिंजवडी, पिंपरी चिंचवड, तळवडे आदी ठिकाणच्या महाराष्ट्र औद्योगिक विकास महामंडळाच्या हद्दीतील उद्योगांच्या समस्यांचा आढावा मंत्री श्री. सामंत यांनी यावेळी घेतला. ते म्हणाले, पीएमआरडीए च्या माण – म्हाळुंगे टी. पी. स्कीमला लवकरच मुख्यमंत्र्यांची मान्यता मिळणार असल्याने हिंजवडीसाठी पर्यायी रस्त्याच्या कामाला गती मिळणार आहे.

ते पुढे म्हणाले, वाहतूक कोंडी होणाऱ्या चौकातील टपऱ्या पोलीस विभागाच्या सहकार्याने हटवाव्यात. उद्योगांनी त्यांच्याकडील वाहने रस्त्यावर थांबणार नाहीत याची काळजी घ्यावी. एमआयडीसीने दोन्ही महानगरपालिका तसेच पीएमआरडीएच्या हद्दीतील मोकळ्या जागा शोधून तेथे उद्योगांसाठी येणाऱ्या ट्रक आदी वाहनांचे पार्किंगसाठी प्रयत्न करावेत.

राजीव गांधी माहिती तंत्रज्ञान उद्यानातील रस्त्यातील खड्डे, दुभाजक, पदपथ आदींची देखभाल दुरुस्ती तातडीने करण्याच्या दृष्टीने प्रस्तावाचा पाठपुरावा करावा. सुविधांसाठी उद्योगांकडून घेण्यात येणारे सेवा शुल्क उद्योगांना परवडेल अशा पद्धतीने त्यांचेशी समन्वय साधून वाढविण्यात यावे, असेही ते यावेळी म्हणाले.

तळेगाव येथील फ्लोरीकल्चर पार्कमधील उद्योगांना वाटप केलेल्या भूखंडांबाबत वस्तुस्थिती तपासून घ्यावी. तसेच वाटप केलेले विनावापर भूखंड अन्य उद्योगांना देण्याबाबत विचार करण्यात येईल. तळवडे माहिती तंत्रज्ञान पार्क येथील उद्योगांच्या समस्या सोडविण्यासाठी संरक्षण विभागाशी संपर्क साधण्याचे निर्देशही त्यांनी विभागाला दिले.

महाराष्ट्र औद्योगिक विकास महामंडळ, सार्वजनिक बांधकाम विभाग, जिल्हाधिकारी, पीएमआरडीए, पोलीस विभाग, पुणे तसेच पिंपरी चिंचवड महानगरपालिका, एनएचएआय, जिल्हा परिषद आदी सर्व संबंधित विभागांनी उद्योगांच्या समस्या समन्वयाने सोडवाव्यात.

राजीव गांधी माहिती तंत्रज्ञान उद्यानातील टप्पा क्र. 3 येथील पोलीस चौकीसाठी आवश्यक त्या जागेचा ताबा पोलीस विभागास देण्यात आल्याचे यावेळी सांगण्यात आले. यावेळी सीसीटीव्ही प्रकल्प, लक्ष्मी चौक येथे उड्डाणपूल बांधणे, घनकचरा व्यवस्थापन, पावसाचे पाणी वाहून नेण्यासाठी पावसाळी पाण्याची वाहिनी तसेच बॉक्स कल्व्हर्टचे बांधकाम आदींच्या अनुषंगाने विभागाच्यावतीने माहिती देण्यात आली.

पुणे-साधारण १ ते १५ जानेवारीपर्यंत सरकार नियमित कामाला लागलेले असेल. त्यांच्यापुढचा प्राधान्याचा विषय पुणे महापालिकेचे विभाजन हाच असेल. त्यावर चर्चा होऊन निर्णय घेतला जाईल, असे सूतोवाच उच्च व तंत्रशिक्षण मंत्री चंद्रकांत पाटील यांनी केले.मागील अडीच वर्षे रखडलेल्या महापालिका निवडणुका जाहीर होण्याआधीच शक्यतो हा निर्णय होईल, असेही ते म्हणाले.

श्रमिक पत्रकार संघाने पुणे शहरातील नवनिर्वाचित आमदारांचे पत्रकारांबरोबर वार्तालापाचे आयोजन मंगळवारी सकाळी पत्रकार संघात केले होते. पाटील यांच्यासमवेत राज्यमंत्री माधुरी मिसाळ, आमदार भीमराव तापकीर, चेतन तुपे, बापू पठारे, सिद्धार्थ शिरोळे उपस्थित होते. हेमंत रासणे व सुनील कांबळे या आमदारांनी कामामुळे शहराबाहेर असल्याने उपस्थित राहता येणार नाही, असे कळविले होते. संघाचे अध्यक्ष सुनीत भावे, सरचिटणीस मीनाक्षी गुरव यावेळी व्यासपीठावर उपस्थित होते. त्यांनी आमदारांचे स्वागत केले. पुण्यातील वाहतूक, पाणी, गुन्हेगारी, नव्याने सुरू असलेल्या प्रकल्पांमुळे होणाऱ्या अडचणी, अशा अनेकविध समस्यांना स्पर्श करत आमदारांनी त्यावर काय कामकाज सुरू आहे याची माहितीही दिली. मेट्रोचे जाळे वाढविण्यात भर देणार असल्याचे त्यांनी सांगितले.

पाटील म्हणाले, महापालिकेची निवडणूकच नसल्याने नगरसेवक व नागरिक यांच्यात संवाद राहिला नाही. आमदारांची नसलेली कामे आमदारांना करावी लागत आहेत. मात्र, आता सरकार लवकरच कामकाजाला लागेल. त्यानंतर काही विषय प्राधान्याने घेण्यात येणार आहेत. त्यात हाही विषय आहे. मेट्रो, नदी सुधार, ड्रेनेजच्या पाण्याचे शुद्धीकरण प्रकल्प, असे विषय आमदारांशी संबंधित असतात. पुण्याच्या पाण्याचा प्रश्न बिकट आहे. मुळशी धरणाबाबत सरकार व टाटा कंपनी यांच्यात बोलणी सुरू आहे. आता धरणातून वीज तयार होत नाही. त्यामुळे ‘धरणच ताब्यात द्या’ अशी आमची मागणी आहे. तसे झाले तर पुण्याच्या पाण्याचा प्रश्न भविष्यातील वाढती लोकसंख्या विचारात घेतली तरीही सुटू शकेल.

महापालिकेचे विभाजन होणे गरजेचे आहे. मात्र, त्यात राजकीय सामाजिक, भौगोलिक असे अनेक विषय गुंतलेले आहेत. त्यामुळे यावर व्यापक चर्चा अपेक्षित आहे. नावांचा प्रश्न अशा वेळी अतिशय महत्त्वाचा ठरतो. त्यातही पुणे नावाला इतिहास आहे. त्यामुळे पुणे नावाचा समावेश असलाच पाहिजे, याबाबत सगळेच आग्रही असणार. अशा अनेक गोष्टींचा साधकबाधक चर्चा झाल्यानंतरच महापालिकेच्या विभाजनाचा निर्णय होईल, असे पाटील यांनी सांगितले.

पुणे शहराच्या समस्या हा विषय असला तरी राजकीय प्रश्न येणे अपेक्षित होते. त्याप्रमाणे चंद्रकांत पाटील यांना पुण्याचा दादा कोण? असा प्रश्न विचारला असता, त्यांनी हा जटिल प्रश्न आहे, असे उत्तर दिले. मात्र, मुख्यमंत्री देवेंद्र फडणवीस यांचे डोके सुपीक आहे. २३७ इतक्या मोठ्या संख्येने प्रथमच आमदार आहेत, त्यांनी बरोबर मंत्रिमंडळ तयार केले. आता हाही प्रश्न ते समाधानकारक पद्धतीने निकाली काढतील, असे पाटील म्हणाले.

वाहतुकीच्या कोंडीने संपूर्ण शहर त्रस्त आहे. त्यासाठीच मी येत्या ५ वर्षांत स्वारगेट ते खडकवासला या मेट्रोसाठी प्रयत्नशील आहे. नागरिक किंवा पत्रकार तक्रारी सांगतात, काही विषय समोर आणतात, त्याचा कधी राग येत नाही. कामाला संधी यादृष्टीने आम्ही त्याकडे पाहात असतो. त्या कामांचा पाठपुरावा केली की कामे मार्गी लागतात, असा माझा अनुभव आहे. -भीमराव तापकीर, आमदार, खडकवासला

मतदारसंघातील बसस्थानकाचा प्रश्न कालच आम्ही सोडवला आहे. तसेच वाहतूक प्रश्न गंभीर होत आहे. त्यासाठी नगरविकास मंत्री आता पुण्याचे आहेत, त्यांच्याशी बोलून हा प्रश्न सोडवू. रिंगरोड होणार आहे, तो लवकर करण्यासाठी प्रयत्न करणार आहे. मेट्रोमुळे देखील वाहतुकीवरील बराचसा ताण कमी होऊ लागला आहे.- आमदार सिद्धार्थ शिरोळे

पुण्याचा विस्तार प्रचंड होत आहे. तो कुठेतरी मर्यादित करायला हवा. पुणे वाढत असल्याने पाण्याचा प्रश्न गंभीर बनला आहे. रिंगरोडच्या बाहेर पुण्याची हद्द वाढणार नाही, असे काही धोरण करायला हवे. आपण ठोस भूमिका घेतली नाही तर पुणे वाढतच राहील. बिल्डर बांधकामे करतात, पण पाण्याची समस्या मात्र पाहिली जात नाही. वाहतूक हा एक गहन प्रश्न आहे. त्यावर काम करणे अपेक्षित आहे. रिंगरोडला जोडणारे रस्ते बनवणे गरजेचे आहे. – आमदार बापू पठारे

पुण्याचा झपाट्याने होणारा विकास आपण पाहतोय. त्यासाठी आपण भविष्यासाठी योग्य नियोजन करत आहोत. आपल्याकडे त्याचा आराखडा आहे. मेट्रो केली आहे, रिंगरोड करत आहोत. त्यामुळे बरेचसे प्रश्न सुटणार आहेत. पुण्याचा विकास २०५० पर्यंत नियोजनबद्ध झालेला असेल. समाविष्ट गावांचाही प्रश्न असून, तेथेही योग्य पायाभूत सुविधा उभ्या करणार आहोत. – नगरविकास मंत्री माधुरी मिसाळ

वाहतुकीच्या समस्येवर सार्वजनिक प्रवासी वाहतुकीसाठी मेट्रोचे जाळे वाढविणे हा उपाय आहे. आमचे त्याकडे लक्ष आहे. पाणी समस्येवर आधी महापालिकेने वितरणातील गळती थांबविणे आहे. वाढती लोकसंख्या हा महत्त्वाचा प्रश्न आहे. त्यांच्यासाठी नागरी सुविधा तयार करणे, त्यांची कार्यक्षमता राखणे, या दृष्टीने काम होणे गरजेचे आहे. ते व्हावे यासाठी आमचा प्रयत्न आहे. – चेतन तुपे, आमदार, हडपसर