पिंपरी, पुणे (दि. १६ ऑक्टोबर २०२४) पिंपरी चिंचवड शहर पत्रकार संघाच्या अध्यक्षपदी पत्रकार सायली कुलकर्णी यांची निवड करण्यात आली आहे.
उपाध्यक्षपदी विनय लोंढे आणि रेहान सय्यद यांची निवड करण्यात आली.
अखिल भारतीय मराठी पत्रकार संस्था ( रजि.) या संस्थेशी संलग्न असलेल्या पिंपरी चिंचवड शहर पत्रकार संघाच्या नवीन पदाधिकाऱ्यांची निवड पुढील एक वर्षासाठी (सन २०२४ ते २०२५) करण्यात आली आहे.
पत्रकार संघाचे पदाधिकारी व सभासदांची मंगळवारी बैठक घेण्यात आली या बैठकीत अध्यक्ष – सायली कुलकर्णी, (माझी सखी सोबती); उपाध्यक्ष – विनय लोंढे (खरा सामना); रेहान सय्यद (शबनम न्यूज); सचिव – संतोष जराड (पीसीएमसी न्यूज); कोषाध्यक्ष – गणेश शिंदे (न्यूज २४ महाराष्ट्र); सदस्य – बापूसाहेब गोरे (माझा आवाज), विश्वास शिंदे (पुणे दर्शन), अशोक लोखंडे (पीसीएमसी न्यूज) यांची निवड करण्यात आली.
पिंपरी चिंचवड शहर पत्रकार संघाला अनेक वर्षांची परंपरा असून पत्रकार अधिवेशन, पत्रकार कार्यशाळा, दिवाळी फराळ, पत्रकारांच्या प्रश्नाची सोडवणूक करण्यासाठी प्रयत्न करणे असे अनेक उपक्रम पत्रकार संघाच्या माध्यमातून राबविले जातात. पत्रकार संघाच्या सन २०२४-२५ साठी नूतन कार्यकारिणी निवड झाल्याने पदाधिकाऱ्यांचे सर्व स्तरातून अभिनंदन केले जात आहे.

पिंपरी, पुणे (दि. १६ ऑक्टोंबर २०२४) पिंपरी चिंचवड एज्युकेशन ट्रस्ट संचलित एस. बी. पाटील इन्स्टिट्यूट ऑफ मॅनेजमेंटला “नॅकचे ए प्लस” मानांकन नुकतेच प्राप्त केले आहे. हे मानांकन मिळणे म्हणजे पीसीईटीच्या विश्वस्तांनी एसबीपीआयएमच्या कर्मचाऱ्यांवर दाखवलेला विश्वास सार्थ ठरवला आहे. या महाविद्यालयाने राष्ट्रीय मुल्यांकन व प्रत्यायन परिषदेची नॅकची ‘ए प्लस’ श्रेणी दुसऱ्या फेरीमध्ये प्राप्त केली आहे. त्याबद्दल शिक्षक व शिक्षकेतर कर्मचाऱ्यांचे पीसीईटीचे अध्यक्ष ज्ञानेश्वर लांडगे व इतर पदाधिकाऱ्यांच्या हस्ते सत्कार करण्यात आला.
यावेळी महाविद्यालयाच्या संचालिका डॉ. कीर्ती धारवाडकर, उपाध्यक्ष पद्माताई भोसले, सचिव विठ्ठल काळभोर, खजिनदार शांताराम गराडे, विश्वस्त तथा पीसीयूचे कुलपती हर्षवर्धन पाटील, उद्योजक नरेंद्र लांडगे, अजिंक्य काळभोर, कार्यकारी संचालक डॉ. गिरीश देसाई, समन्वयक डॉ. अमरीश पद्मा व प्राध्यापक, शिक्षकेतर कर्मचारी उपस्थित होते.
यावेळी महाविद्यालयाच्या संचालिका डॉ. कीर्ती धारवाडकर यांनी सांगितले की, एस. बी. पाटील इन्स्टिट्यूट ऑफ मॅनेजमेंटची स्थापना २००९ मध्ये करण्यात आली. संस्थेने नॅशनल बोर्ड ऑफ ॲक्रेडीटेशन (एनबीए) मानांकन या पूर्वी पहिल्या फेरीत पटकावले होते. आता या महाविद्यालयाच्या शिरपेचात अजून एक मानाचा तुरा खोवला गेला आहे. राष्ट्रीय मूल्यांकन व प्रत्यायन परिषद म्हणजेच ‘नॅक’चे परीक्षण महाविद्यालयाने यशस्वीरीत्या पूर्ण केले असून ‘ए प्लस’ ही श्रेणी पुढील पाच वर्षांसाठी परीक्षणाच्या दुसऱ्याच फेरीत प्राप्त केली आहे. शैक्षणिक प्राविण्य, संशोधन व नवनिर्माण, व्यवसायाभिमुखता आणि सामाजिक बांधिलकी या चतु:सुत्रीवर संस्थेची वाटचाल सुरू आहे.
विद्यार्थ्यांच्या क्रमिक अभ्यासक्रमाबरोबरच क्रीडा, सांस्कृतिक आदी सर्वांगीण विकासावर महाविद्यालय भर देत असल्याने ‘नॅक’च्या परीक्षणात यश मिळणे ही त्याची पावती आहे. सर्व विश्वस्तांचे सहकार्य आणि अध्यापक, शिक्षकेतर कर्मचारी, विद्यार्थी व पालक यांचे योगदान यामुळे हे मानांकन प्राप्त झाले. येथे दिल्या जाणाऱ्या शिक्षणाचा दर्जा, प्रशिक्षण व मार्गदर्शनामुळे महाविद्यालयाच्या बहुतांशी विद्यार्थ्यांना उत्तम नोकरीच्या संधी उपलब्ध होतात. त्यामुळे व्यवस्थापन शाखेला प्रवेश घेताना विद्यार्थी व पालक नेहमीच एसबीआयएमला प्राधान्य देतात.

याज्ञवल्क्य उद्योजक विकास अभियान (युवा) वर्धापन दिन सोहळा ; कॉसमॉस बँकेचे अध्यक्ष मिलिंद काळे यांची उपस्थिती
पुणे : शुक्ल यजुर्वेदीय माध्यंदिन महाराष्ट्रीय ब्राह्मण मध्यवर्ती मंडळाचा उपक्रम असलेल्या याज्ञवल्क्य उद्योजक विकास अभियान (युवा) च्या वर्धापनदिनानिमित्त विशेष कार्यक्रमाचे आयोजन करण्यात आले आहे. सोहळ्यांतर्गत वितरित होणारे सृजन आर्ट गॅलरी पुरस्कृत सृजन युवा कलाकार पुरस्कार व स्व. चंद्रकांत जोशी स्मृतिप्रित्यर्थ युवा उद्योजक पुरस्कार अनुक्रमे लोकप्रिय सुप्रसिद्ध अभिनेता दिग्दर्शक व निर्माता प्रसाद ओक आणि सर्वत्र टेक्नॉलॉजीज प्रा. लि. चे संस्थापक, उपाध्यक्ष व व्यवस्थापकीय संचालक मंदार आगाशे यांना प्रदान करण्यात येणार आहे, अशी माहिती संस्थेचे कार्याध्यक्ष विश्राम कुलकर्णी व कार्यवाह श्रीकांत जोशी यांनी पत्रकार परिषदेत दिली. 
पत्रकार परिषदेला संस्थेचे उपेंद्र केळकर, सचिन पंडित, चैतन्य सराफ, अपूर्वा देवगावकर, मंजुषा वैद्य,अजय कुलकर्णी, आशिष कुलकर्णी, आशिष भावे आदी उपस्थित होते. 
टिळक स्मारक मंदिर येथे शनिवार, दिनांक १९ आॅक्टोबर रोजी सायंकाळी ५ वाजता हा सोहळा आयोजित करण्यात आला आहे. कॉसमॉस बँकेचे अध्यक्ष मिलिंद काळे यांच्या हस्ते पुरस्कार प्रदान सोहळा होणार आहे. यावेळी संस्थेच्या युवा महिला अध्यक्ष व खासदार प्रा.डॉ. मेधा कुलकर्णी या देखील उपस्थित राहणार आहेत. सन्मानचिन्ह, मानपत्र असे पुरस्काराचे स्वरुप आहे. यापूर्वी युवा कलाकार पुरस्कार स्वप्नील जोशी, मनोज जोशी, बेला शेंडे, संदीप खरे, संकर्षण क-हाडे आदींना देण्यात आला आहे. 
पुरस्कार वितरण सोहळा, वर्धापन दिन कार्यक्रमासह ब्राह्मण उद्योजकांचे एकत्रीकरण हा देखील कार्यक्रमाचा उद्देश आहे.सोहळ्याचे आयोजन संस्थेच्या युवा कार्यकारिणीने केले आहे. कार्यक्रम सर्वांसाठी विनामूल्य खुला असून पुणेकरांनी मोठया संख्येने उपस्थित रहावे, असे आवाहन देखील करण्यात आले आहे. शुक्ल यजुर्वेदीय माध्यंदिन महाराष्ट्रीय ब्राह्मण मध्यवर्ती मंडळ ही संस्था १९४० साली स्थापन करण्यात आली. युवा हा उपक्रम २००४ साली स्व. चंद्रकांत जोशी यांच्या नेतृत्वाखाली पंढरपूर येथील अधिवेशनात सुरु करण्यात आला होता.

–शिवाजीनगरमध्ये परिवर्तनासाठी जनता सज्ज असल्याचा केला दावा

पुणे : गेल्या दहा वर्षांपासून भाजपच्या ताब्यात असलेल्या शिवाजीनगर विधानसभा मतदार संघात मूलभूत सोयीसुविधांचा बोजवारा उडाला आहे. जनतेनं मोठ्या विश्वासानं दोनवेळा भाजपच्या हातात सत्ता दिली मात्र भ्रष्ट नेत्यांनी या मतदार संघाचं अक्षरश: वाटोळे केले आहे. निष्क्रिय आणि अकार्यक्षम लोकप्रतिनिधींमुळे हा मतदारसंघ विकासाच्या बाबतीत खूप मागे पडला आहे, अशी खंत मनिष आनंद यांनी पत्रकार परिषदेत व्यक्त केली.

आता विधानसभा निवडणूक जवळ आली आहे. पाच वर्षे गायब असलेले आमदार पुन्हा आता प्रकट होतील आणि नेहमीप्रमाणेच आश्वासनांचा पाऊस पाडतील. मतदारांना आमिषं दाखवतील. पण जनता सुज्ञ आहे. मतदारराजा पुन्हा पुन्हा अशी चूक कधीच करणार नाही, याची मला खात्री आहे, असा विश्वासही त्यांनी व्यक्त केला. मनिष आनंद हे शिवाजीनगर मतदार संघात कॉंग्रेसकडून निवडणूक लढविण्यास इच्छुक आहेत. आज शिवाजीनगर येथे आयोजित पत्रकार परिषदेत ते बोलत होते. यावेळी त्यांनी पत्रकारांनी विचारलेल्या विविध प्रश्नांना सविस्तर उत्तरे दिली.

मनिष आनंद म्हणाले की,शिवाजीनगर विधानसभा मतदारसंघातील समस्यांची मला जाण आहे. खडकी छावणी परिषदेचा सदस्य म्हणून १२ वर्षे काम पाहिले आहे. तसेच उपाध्यक्ष म्हणून ६ वर्षांचा अनुभव आहे. याशिवाय पुणे शहर जिल्हा काँग्रेस कमिटीचा उपाध्यक्ष म्हणूनही काम पाहिले आहे. तसेच स्व. सुरेंद्र आनंद मेमोरिअल फाउंडेशनच्या माध्यमातून अनेक समाजपयोगी कामे करत आहे. सर्वसामान्यांमध्ये जाऊन काम करणारा नेता म्हणून लोकांशी नाळ जुळलेली असल्याचेही मनिष आनंद यांनी सांगितले.

ते पुढे म्हणाले की, गेल्या १० वर्षांत शिवाजीनगर मतदारसंघातील नागरी प्रश्न अधिक बिकट बनले आहेत. प्रंचड वाहतूक कोंडी, रस्त्यांवरील खड्डे, अपूरा पाणीपुरवठा, कच-यांचे ढीग, वाढती गु्न्हेगारी, प्रदुषण अशा नागरी प्रश्नांनी शिवाजीनगर मतदारसंघाचे नुकसान झाले आहे. त्यामुळे आता शिवाजीनगरमध्ये परिवर्तन हवे आहे.

हा मतदारसंघ पुण्याच्या मध्यभागी येतो. या भागात नागरीकरण झपाट्याने वाढत आहे. वाढत्या लोकसंख्येला सोयीसुविधा पुरविण्यात सत्ताधारी अपयशी ठरले आहेत. त्यामुळे समस्यांचा डोंगर वाढतच चालला आहे. शहरी भागात वाहतूक कोंडीसारखा विषय खूपच संवेदनशील बनला आहे. यासाठी मेट्रोचे कारण पुढे केले जात असले तरी प्रवाशांना जीव मुठीत घेऊन प्रवास करावा लागत आहे, ही वस्तुस्थिती आहे. त्यासाठी पर्यायी व्यवस्था करणे अपेक्षित होते. मात्र १० वर्षात सत्ताधाऱ्यांना तेही करता आले नाही. मतदारसंघात एकही सरकारी हाॅस्पिटल नाही, येथील नागरिकांना ससून किंवा खासगी हाॅस्पिटल्सवर अवलंबून राहावे लागते. या मतदार संघात पाण्याचा मोठा प्रश्न आहे. नागरिकांवर पाणी विकत घेण्याची वेळ आली आहे. जो लोकप्रतिनिधी दहा वर्षात नागरिकांच्या रस्ते, पाणी, वीज, आरोग्य या मूलभूत गरजा पूर्ण करू शकत नाही, ते मतदार संघाचा सर्वांगीण विकास करू शकतील? असा सवालही मनीष आनंद यांनी केला.

शिवाजीनगर मतदार संघाला लागलेलं हे ग्रहण सोडविण्यासाठी कॉग्रेसच्या माध्यमातून मला काम करायचे आहे. जनतेने पाहिलेले मतदार संघाच्या विकासाचे स्वप्न पूर्ण करण्यासाठी काम करायचे आहे. केवळ सत्तेच्या मागे लागलेल्या लोकप्रतिनिधींना याचाही विसर पडला आहे की, आपण ज्या मतदार संघाचे प्रतिनिधित्व करत आहे, त्याचं नाव शिवाजीनगर विधानसभा मतदारसंघ ‘ आहे. हिंदुत्वाचा डंका पिटणाऱ्या भाजपाला मतदारसंघाचे नाव बदलून ते ‘छत्रपती शिवाजीनगर’ करावे, असे कधीच का वाटले नाही? कारण त्यांचे हिंदुत्व खोटे आणि फक्त मते मिळविण्यापुरतेच आहे. निवडणुका आल्या की त्यांचे हिंदुत्व जागे होते आणि मते मिळाली की सोयीस्करपणे सगळं विसरून जातात. मला संधी मिळाली तर मी पहिल्यांदा मतदार संघाचे नाव बदलून ते छत्रपती शिवाजीनगर असे करेन.

राष्ट्रीय-आंतरराष्ट्रीय पातळीवरील खेळाडू तयार व्हावेत यासाठी मला असं एक स्टेडियम उभारायचं आहे, जिथं सर्व प्रकारच्या खेळांचे तंत्रशुध्द प्रशिक्षण मिळेल. जिथं खेळाडूंना मार्गदर्शन करण्यासाठी तज्ज्ञ प्रशिक्षक असतील. अत्याधुनिक सोयीसुविधा असतील. मतदारसंघात मूलभूत प्रश्न जैसे थे आहेत. वस्तीसुधाराचे महत्वाचे काम करायचे आहे. महिलांच्या सुरक्षेचा गंभीर प्रश्न उभा राहिला असल्याने महिला प्रशिक्षण केंद्राचीही उभारणी करणार असल्याचे मनिष आनंद म्हणाले.

वसाहतीकरण, आर्थिक विकास, बेरोजगारी, व्यवसायिकरण वाढलं आहे. मात्र लोकप्रतिनिधीचे जनतेच्या प्रश्नांकडे अजिबात लक्ष नाही. जनतेनं आपल्याला दोनवेळा आमदार केलं, आता तिसऱ्या वेळेला पण आपणच निवडून येऊ, अशा भ्रमात ते आहेत. मात्र ते विसरले आहेत की, लोकसभा निवडणुकीत महायुतीच्या उमेदवाराला शिवाजीनगरमधून अपेक्षित मताधिक्य मिळाले नाही. विश्वासघात करणाऱ्यांना जनता कधीच माफ करत नाही असंही मनीष आनंद म्हणाले. शिवाजीनगर मतदारसंघात अनेक प्रश्न आहेत. एक नागरिक म्हणून मला प्रामाणिकपणे वाटतं की जनतेला सुखी, समाधानी आणि सुरक्षित जीवनाचा आनंद घेता यावा. त्यासाठी काम करणार असल्याचे मनीष आनंद यांनी यावेळी सांगितले.

५० टक्के सवलतीच्या दरात धान्य उपलब्ध

आमदार चंद्रकांतदादा पाटील यांच्या हस्ते कार्ड वाटप

पुणे- महिलांनी महिलांसाठी सुरु केलेल्या समुत्कर्ष ग्राहक पेठेने कोथरुड मधील रंगकर्मींना दिवाळीच्या पार्श्वभूमीवर विशेष भेट दिली असून, ५० टक्के सवलतीच्या दरात धान्य उपलब्ध करून देण्यात येणार आहे. मंगळवार दिनांक १५ ऑक्टोबर रोजी कोथरुडचे आमदार चंद्रकांतदादा पाटील यांच्या हस्ते समुत्कर्ष ग्राहक पेठेच्या कार्डचे वाटप करण्यात आले.

दिवाळीला आता काहीच दिवस बाकी आहेत. त्यामुळे सर्वच ठिकाणी खरेदीसाठी नागरिकांची गडबड सुरू आहे. मात्र, रंगभूमीची मनोभावे सेवा करणाऱ्या नाट्यकला जिवंत ठेवणाऱ्या, पण वयामुळे घरीच असलेल्या आणि लोकांच्या दृष्टीने काहीशा विस्मृतीत गेलेल्या ज्येष्ठ नाट्य कलावंतांनाही दिवाळीचा मनमुराद आनंद लुटता यावा, यासाठी कोथरुड मधील समुत्कर्ष ग्राहक पेठेने विशेष पुढाकार घेतला आहे.

या अंतर्गत कोथरुड मधील ज्येष्ठ रंगकर्मींना ५० टक्के सवलतीच्या दरात धान्य उपलब्ध करून देण्याचा ग्राहक पेठेने निर्णय घेतला आहे. त्यामुळे रंगकर्मींना मोठा आधार मिळाला आहे. मंगळवार दिनांक १५ ऑक्टोबर रोजी कोथरूडचे आमदार चंद्रकांतदादा पाटील यांच्या हस्ते समुत्कर्ष ग्राहक पेठेच्या कार्डचे वाटप करुन धान्य उपलब्ध करून देण्यात आले.

यावेळी भाजप प्रवक्ते संदीप खर्डेकर, ऑल आर्टिस्ट फाऊंडेशनचे अध्यक्ष योगेश सुपेकर, सचिव गणेश मोरे, उपसचिव सौ अश्विनी कुरपे, उप खजिनदार मनोज माझिरे, पश्चिम महाराष्ट्र संपर्क प्रमुख सोमनाथ फाटके
संचालक मोनिका जोशी समुत्कर्ष फाऊंडेशनच्या वनिता काळे, शशिकला मेंगडे, धनंजय रसाळ, पार्थ मठकरी यांच्या सह ज्येष्ठ रंगकर्मी, बॅक स्टेज आर्टिस्ट मोठ्या संख्येने उपस्थित होते.

पीसीसीओई मध्ये बास्केटबॉल स्पर्धा संपन्न

पिंपरी, पुणे (दि. १६ ऑक्टोबर २०२४)
सावित्रीबाई फुले पुणे विद्यापीठ आणि
पिंपरी चिंचवड अभियांत्रिकी महाविद्यालय यांच्या संयुक्त विद्यमाने घेण्यात आलेल्या
आंतर विभागीय बास्केटबॉल मुलींच्या स्पर्धेत पुणे शहर संघाने विजेतेपद पटकावले.
पिंपरी चिंचवड एज्युकेशन ट्रस्टच्या निगडी येथील पिंपरी चिंचवड अभियांत्रिकी महाविद्यालय (दि. १४ व १५ ऑक्टोबर) येथे झालेल्या या मुलींच्या स्पर्धेमध्ये पुणे जिल्हा, पुणे शहर, नाशिक जिल्हा, अहमदनगर जिल्हा या चार संघांची जिल्हास्तरीय स्पर्धेतून निवड झाली होती. या स्पर्धा लीग पद्धतीने खेळविण्यात आल्या.
अंतिम सामन्यात पुणे शहर संघाने व पुणे जिल्हा संघावर ३६ विरुद्ध २२ या गुणफरकाने विजय मिळवला. सिया खिलारे, मानसी निर्मलकर, चैतन्या रोळे यांच्या उत्कृष्ठ खेळाच्या जोरावर पुणे शहर संघाने तीनही सामने जिंकून विजेतेपद पटकावले. तसेच सृष्टी लंगोट, पूर्वा भिरुड, संपदा सावंत, समीक्षा पाटील यांच्या उत्कृष्ठ खेळामुळे पुणे जिल्हा संघ दोन सामने जिंकून द्वितीय स्थानी राहिला.
स्पर्धेचे उद्घाटन उद्योजक अजिंक्य काळभोर यांच्या हस्ते करण्यात आले.
यावेळी पिंपरी चिंचवड अभियांत्रिकी महाविद्यालयाचे संचालक डॉ. गोविंद कुलकर्णी, डिन एचडी डब्ल्यू डॉ.पद्माकर देशमुख, विद्यापीठ प्रतिनिधी किशोर घडीयार, निवड समिती अध्यक्ष प्रा. शैलेंद्र कांबळे, सदस्य प्रा. आशिष तळेकर, अर्जुन मेहता आदी उपस्थित होते.
या स्पर्धेमधून सावित्रीबाई फुले पुणे विद्यापीठाचा संघ निवडला जाणार आहे.
स्पर्धेचे नियोजन महाविद्यालयाचे क्रीडा संचालक प्रा. संतोष पाचारणे यांनी केले.
यशस्वी संघांचे व स्पर्धकांचे पिंपरी चिंचवड एज्युकेशन ट्रस्टचे (पीसीईटी) अध्यक्ष ज्ञानेश्वर लांडगे, उपाध्यक्षा पद्माताई भोसले, सचिव विठ्ठल काळभोर, खजिनदार शांताराम गराडे, विश्वस्त व पीसीयूचे कुलपती हर्षवर्धन पाटील, उद्योजक नरेंद्र लांडगे, कार्यकारी संचालक डॉ. गिरीश देसाई, पीसीसीओईचे संचालक डॉ. गोविंद कुलकर्णी यांनी अभिनंदन केले आणि पुढील स्पर्धेसाठी शुभेच्छा दिल्या.

पुणे, दि. १५: विधानसभा सार्वत्रिक निवडणुकीच्या अनुषंगाने सर्व संबंधित यंत्रणांनी समन्वयाने कामे करुन निवडणूक प्रक्रिया यशस्वीपणे पार पाडावी, असे निर्देश जिल्हा निवडणूक अधिकारी तथा जिल्हाधिकारी डॉ. सुहास दिवसे यांनी दिले.

जिल्हाधिकारी कार्यालयात विधानसभा निवडणुकीच्या अनुषंगाने निवडणूक निर्णय अधिकारी, समन्वय अधिकारी यांच्या कामकाजाबाबत आयोजित आढावा बैठकीत ते बोलत होते. यावेळी पुणे महानगरपालिका आयुक्त डॉ. राजेंद्र भोसले, पिंपरी-चिचंवड महानगरपालिका आयुक्त शेखर सिंह, पुणे मनपा अतिरिक्त आयुक्त पृथ्वीराज बी पी, जिल्हा परिषदेचे मुख्य कार्यकारी अधिकारी संतोष पाटील, पिंपरी चिंचवड पोलीस सह आयुक्त शशिकांत महावरकर, जिल्हा पोलीस अधीक्षक पंकज देशमुख, निवासी उपजिल्हाधिकारी ज्योती कदम आदी उपस्थित होते.

डॉ. दिवसे म्हणाले, भारत निवडणूक आयोगाने निवडणूक कार्यक्रम जाहीर केला असून आदर्श आचार संहिता लागू झाली आहे. आदर्श आचारसंहितेची सर्व प्रशासकीय यंत्रणांनी काटेकोरपणे अंमलबजावणी करावी. आदर्श आचारसंहितेच्या अनुषंगाने प्राप्त तक्रारीवर तत्काळ कारवाई करण्यात यावी. मतदान केंद्रावर आवश्यक शौचालय, पाणी, व्हीलचेअर, रॅम्प, पाळणाघर, औषधोपचार, बसण्याकरीता बाकडे, आदी सोई-सुविधा उपलब्ध करुन देण्यात याव्यात. मतदारसंघातील प्रत्येक मतदान केंद्राला भेटी देऊन उपलब्ध असलेल्या सोई-सुविधांची पडताळणी करावी. शहर हद्दीत महानगर पालिकांनी तर ग्रामीण हद्दीत जिल्हा परिषदेने या व्यवस्था कराव्यात असे आयोगाने निर्देश दिले आहेत.

मतदानाचा टक्का वाढविण्याकरीता मतदार नोंदणी, मतदार जनजागृतीविषयक शिबीरे आयोजित करावीत. बदलेल्या मतदान केंद्राविषयी मतदारांनी माहिती देण्यात यावी. एफएसटी पथके कार्यान्वित करण्यात यावीत. मतदान केंद्रात मोबाईल वापरण्यास प्रतिबंध करण्यात आला असून याबाबत याबाबत यंत्रणेसह मतदारामध्ये जनजागृती करावी. आवश्यकतेप्रमाणे अधिकारी व कर्मचाऱ्यांचे प्रशिक्षण घेण्यात यावेत. जिल्ह्यात मतदान प्रक्रिया पारदर्शक, निर्भय वातावरणात आणि सुलभ, सहजतेने पार पाडण्यासाठी प्रयत्न करावे. निवडणूक प्रक्रियेत आपल्या दिलेल्या जबाबदारीप्रमाणे चोखपणे कर्तव्य पार पाडावे, असे डॉ. दिवसे म्हणाले.

ग्रामीण भागात अनधिकृत होर्डिंग्जवर निवडणूक प्रचाराबाबत होत असल्याचे निदर्शनास आल्यास कठोर कारवाई करण्यात यावी. आवश्यक तेथे गुन्हे दाखल करण्यात यावेत, असेही डॉ. दिवसे म्हणाले.

डॉ. भोसले म्हणाले, मतदान केंद्रावर उभारण्यात येणाऱ्या शौचालयाची स्वच्छता करावी. रॅम्प सुस्थितीत असल्याची खात्री करुन घ्यावी. मतदारांना आवश्यक त्या सर्व सोई-सुविधा उपलब्ध करुन देण्यात याव्यात. महानगरपालिका क्षेत्रात मतदार जनजागृतीवर भर देण्यात यावे. याकरीता समाजमाध्यमे, वाणिज्यिक आस्थापना, पीएमपीएल बसेस, महानगरपालिकांचे इलेक्ट्रॉनिक डिस्प्ले फलक, लघुसंदेश आदी सुविधांचा वापर करावा. तसेच बचतगट गणेश, नवरात्र आणि दहीहंडी मंडळासोबत बैठक त्यांचा सहभाग वाढवावा, शहरी भागातील मतदानाचा टक्का वाढविण्याकरीता महानगरपालिकेच्यावतीने प्रयत्न करण्यात येईल.

शासकीय मालमत्तांचे विद्रुपीकरण कायद्याचे काटेकोर पालन व्हावे. शासकीय मालमत्तांवरील आचारसंहिता भंग होईल अशा राजकीय पक्षांच्या, राजकीय व्यक्तींच्या जाहिराती तत्काळ काढण्यात याव्यात. २४ तासाच्या आत जाहिराती, मजकूर काढण्यात यावा. खासगी इमारतीवरील, जागेतील मजकूर संबंधिताच्या परवानगीशिवाय लावलेला नसल्यास त्याबाबतही कठोर कारवाई करावी. विद्रुपीकरणबाबत केल्यास गुन्हे दाखल करावेत, असेही डॉ. भोसले म्हणाले.

पोलीस अधीक्षक श्री. देशमुख म्हणाले, संबंधित मतदारसंघाचे निवडणूक निर्णय अधिकारी व उप विभागीय पोलीस अधिकाऱ्यांनी संयुक्तपणे स्ट्राँगची पाहणी करुन आढावा घ्यावा. प्रमाणित कार्यपद्धती (एसओपी) नुसार हेलिपॅड व विमानाच्या धावपट्टीवरून उड्डाण परवानगीबाबत कार्यवाही व्हावी तसेच तेथील व्हिडिओ चित्रीकरण करण्यात यावे, असेही श्री. देशमुख म्हणाले.
0000