श्री महालक्ष्मी मंदिर सारसबाग पुणे ; दिवाळी पाडव्यानिमित्त भव्य अन्नकोट
पुणे :  विविध प्रकारची मिठाई, फरसाण, चिवडा, फळे यांसह ५६ प्रकारच्या मिष्टांन्नांचा भोग श्री महालक्ष्मी देवीसमोर लावण्यात आला. सारसबागेसमोरील श्री महालक्ष्मी मंदिरात दिवाळी पाडव्यानिमित्त श्री गोवर्धन पूजा करून भव्य अन्नकोट आयोजित करण्यात आला होता. दिवाळीनिमित्त मंदिराला आकर्षक विद्युतरोषणाई देखील करण्यात आली होती.

श्री महालक्ष्मी मंदिर, श्री बन्सीलाल रामनाथ अग्रवाल धार्मिक व सांस्कृतिक ट्रस्ट च्यावतीने दिवाळीनिमित्त विविध कार्यक्रमांचे आयोजन मंदिरात केले जाते. ट्रस्टच्या प्रमुख विश्वस्त अमिता राजकुमार अग्रवाल, प्रमुख संस्थापक विश्वस्त राजकुमार अग्रवाल,  विश्वस्त अ‍ॅड.प्रताप परदेशी, डॉ.तृप्ती अग्रवाल, भरत अग्रवाल, प्रविण चोरबेले, हेमंत अर्नाळकर, रमेश पाटोदिया, नारायण काबरा, निलेश लद््दड आदी यावेळी उपस्थित होते. 

लक्ष्मीपूजनानिमित्त श्री महालक्ष्मी देवीला शुद्ध सोन्यात बनविलेली सुमारे १६ किलो वजनाची साडी मंदिर प्रशासनाकडून नेसविण्यात आली. त्याचे दर्शन घेण्याकरिता देखील देवीभक्तांनी मोठी गर्दी केली. वर्षभरात केवळ दोन वेळा म्हणजेच दसरा आणि लक्ष्मीपूजनाच्या दिवशी ही साडी देवीला नेसविण्यात येते. तर, पाडव्याला अन्नकोट आयोजित केला जातो.

अन्नकोट मध्ये ठेवण्यात आलेले सर्व पदार्थ मंदिरात भाविकांना प्रसाद म्हणून देण्यात आले. महालक्ष्मी मंदिराच्या वेबसाईट www.mahalaxmimandirpune.org यावरुन आॅनलाईन सुविधांची सोय देखील करण्यात आली आहे, असे अमिता अग्रवाल यांनी सांगितले.

जाधवर ग्रुप ऑफ इन्स्टिट्यूट तर्फे दिवाळीनिमित्त पंतप्रधान आणि सैनिकांप्रती कृतज्ञता

पुणे : जाधवर ग्रुप ऑफ इन्स्टिट्यूटमधील २ हजार विद्यार्थ्यांनी पंतप्रधान नरेंद्र मोदी आणि भारतीय सैनिकांना पत्र लिहिली. दिवाळीनिमित्त ही पत्रे नरेंद्र मोदी आणि जम्मू काश्मिर येथे तैनात बीएसएफ जवानांना पाठवण्यात आली. जवानांना दिवाळीच्या शुभेच्छा देत त्यांच्याप्रती कृतज्ञता व्यक्त करुन विद्यार्थ्यांनी पत्रातून जवानांना अभिवादन केले आहे.

संस्थेचे उपाध्यक्ष अ‍ॅड.शार्दुल जाधवर यांनी याकरिता विशेष मार्गदर्शन केले. विद्यार्थ्यांच्या मनातील सैनिकांबद्दल आदर या उपक्रमाद्वारे दिसून आला. भारतीय सेनेबद्दल सर्वसामान्यांमध्ये जागृती करण्याचे काम शिक्षकांच्या माध्यमातून करण्यात आले. भारतीय सैन्याविषयी आणि सैनिकांच्या बलिदानाविषयी माहिती यावेळी देण्यात आली.

तुम्ही सीमेवर आहात, म्हणून आम्ही देशात सुरक्षित आहोत. तुम्ही आमची ताकद आहात. आम्हाला ही मोठे झाल्यावर तुमच्यासारखे सैनिक व्हायचे असे लिहीत विद्यार्थ्यांनी सैनिकांप्रती आपला आदर व्यक्त केला.

पंतप्रधानांनी पुढाकाराने आधुनिक आणि विकसित भारताच्या गरजा लक्षात घेऊन नवीन राष्ट्रीय शैक्षणिक लागू करण्यात आले आहे. ज्ञानाच्या बाबतीत भारताला एक मजबूत देश बनवण्यासाठी आम्ही कटीबद्ध आहोत, अशी ग्वाही मुलांनी पत्राद्वारे दिली. तसेच नवीन शैक्षणिक धोरणात कौशल्य विकास आणि नोकरी धिष्ठित शिक्षण असावे, अशी अपेक्षा देखील व्यक्त केली.

मुक्तपणे मुक्त श्रेष्ठपणे श्रेष्ठ सर्वत्र वरिष्ठ आदिशक्ती
‌‘ब्रह्मचित्कला मुक्ताई‌’ कार्यक्रमातून उलगडला संत मुक्ताबाईंचा अलौकिक जीवनप्रवास

पुणे : भक्तांप्रती असलेला मातृत्वभाव, भक्तीयोगात प्राप्त केलेले उच्च स्थान, सामान्य जीवांना परब्रह्माचे दर्शन घडविण्याची आध्यात्मिक तयारी असणाऱ्या आदिशक्ती मुक्ताबाईंचा अलौकिक जीवनप्रवास ‌‘ब्रह्मचित्कला मुक्ताई‌’ या कार्यक्रमातून उलगडला.
महाराष्ट्राला अनमोल आणि अमोघ अशी संत परंपरा लाभली आहे. दिवाळीच्या शुभेच्छा देतानाच संस्कारमूल्य जपणारी एक तरी पणती आपणही लावावी या उद्देशाने पंडित हेमंत पेंडसे यांनी संत मुक्ताबाई यांच्या जीवनकार्यावर आधारित ‌‘ब्रह्मचित्कला मुक्ताई‌’ या कार्यक्रमाचे आयोजन केले होते. कीर्तनाच्या धाटणीतून आणि अभंगांची जोड देत संत मुक्ताबाई यांचा जीवनपट भावपूर्णतेने पुणेकरांसमोर मांडण्यात आला. पंडित हेमंत पेंडसे, प्रख्यात कीर्तनकार रोहिणी माने-परांजपे यांच्यासह राधिका ताम्हनकर, मेहेर परळीकर यांचा सहभाग होता. अमित वेणू (बासरी), कौस्तुभ परांजपे (ऑर्गन), अजित किंबहुने (तबला), उद्धव गोळे (पखावज), स्वप्नील कुंभार (टाळ) यांनी साथसंगत केली. कार्यक्रम भावे प्राथमिक शाळेच्या सभागृहात आयोजित करण्यात आला होता.
महाराष्ट्राला लाभलेल्या संत परंपरेमध्ये भक्तीचा मळा फुलविणाऱ्या संत मुक्ताबाई यांचे बहुमूल्य योगदान आहे. असामान्य बुद्धिमत्ता लाभलेल्या आणि भक्तीयोगमार्गात उच्च स्थान प्राप्त केलेल्या संत मुक्ताबाई या अपूर्णत्वाला पूर्णत्व देणारे जीवन जगल्या. मानवी मनाचे समुपदेशन करणाऱ्या आदीशक्ती मुक्ताईचे नाव स्त्री संतांच्या मांदियाळीत प्रामुख्याने घेतले जाते. संत निवृत्तीनाथ, संत ज्ञानेश्वर आणि संत सोपानदेव यांची धाकटी बहिण म्हणजे संत मुक्ताबाई. ही चारही भावंडे विरक्ती, ज्ञान, भक्ती आणि मुक्ती यांचे मूर्तीमंत दीव्य स्वरूप होत. बोलण्यात स्पष्टता आणि कठोरता असणाऱ्या मुक्ताईने वयाच्या अवघ्या सातव्या वर्षी भावंडांचे आईपण स्वीकारत शिष्यांवर मायेची चादर पांघरली.
संत मुक्ताईची जीवनकथा आपल्या अमोघ वाणीतून रोहिणी माने-परांजपे एकिकडे उलगडत असताना नमो ज्ञानेश्वरा, मुंगी उडाली आकाशी, व्यथा सांगण्यास ज्ञाना, ताटी उघडा ज्ञानेश्वरा, धन्य धन्य मुक्ताबाई, निर्गुणाचे डहाळी, पाळणा लाविला, गुरू हा संतकुळीचा राजा, टाळ दिंडीचा गजर, बोलतो मृदुंग बोले एकतारी, मुक्तपणे मुक्त श्रेष्ठपणे श्रेष्ठ सर्वत्र वरिष्ठ आदिशक्ती, आली गेली कैसी कळले नाही कोठे मुक्ताई या भक्तीरचना भावपूर्णतेने सादर करण्यात आल्या.
संत निळोबाराय, संत मुक्ताई, संत नामदेव, संत सोयराबाई, संत एकनाथ यांच्य रचनांसह डॉ. राहुल देशपांडे यांची भक्तिगीते पंडित हेमंत पेंडसे, राधिका ताम्हनकर, मेहेर परळीकर यांनी सादर केली.
भक्तीमार्गात परकाया प्रवेशसिद्धी मिळविलेल्या, स्त्री-पुरुष भेदापलिकडे जगणे शिकविणाऱ्या संत मुक्ताईंचा खडतर आणि भक्तीरसाने परिपूर्ण जीवनप्रवास ऐकताना उपस्थितांचे डोळे पाणावले.

पुणे : दिवाळी पाडव्याची मंगलमय संध्याकाळ… तुतारीची ललकारी… सनई-चौघड्यांचा मंगलमय सूर…  आणि स्वराज्यघराण्यांच्या वंशजांनी, पुणेकरांनी केलेला छत्रपती शिवाजी महाराज की जय… जय भवानी… जय शिवाजी.. हर हर महादेवचा… मर्दानी जयघोष… अशा शिवमय झालेल्या वातावरणात… तिमिरातून तेजाकडे नेणाऱ्या अष्ट सहस्त्र पणत्यांच्या लखलखाटात श्री छत्रपती शिवाजी महाराजांच्या विश्वातील पहिल्या भव्यदिव्य अश्वारूढ स्मारकापाशी शिवजयंती महोत्सव समिती तर्फे सलग १३ व्या वर्षी श्री छत्रपती शिवाजी महाराज दीपोत्सव सोहळा  साजरा झाला. यावेळी ८००० पणत्या प्रज्वलित करण्यात आल्या. 

श्री शिवछत्रपती स्मारक, एसएसपीएमएस संस्था प्रांगण येथे आयोजित दीपोत्सवाचे उद्घाटन समितीच्या महिला सदस्या रिंकल अमित गायकवाड, ललिता रवींद्र कंक, विजया सागर पवार, दिपा किरण कंक, हेमलता राजाभाऊ बलकवडे, शोभा भोई, प्रतिक्षा विवेक तुपे, कामिनी प्रवीण गायकवाड, दिपाली विशाल गव्हाणे, जोत्स्ना निलेश जगताप यांसह उपस्थित महिलांच्या हस्ते तसेच समितीचे प्रवर्तक संस्थापक अध्यक्ष अमित गायकवाड, सचिन पायगुडे, रवींद्र कंक, शंकर कडू, समीर जाधवराव, ईशान अमित गायकवाड आणि शिवकालीन स्वराज्यघराण्यांच्या वंशजांच्या व व पदाधिकाऱ्यांच्या हस्ते झाले.

समितीच्या सदस्यांच्या हस्ते शिवजयंती १९ फेब्रुवारीला स्वराज्यघराण्यांची वज्रमूठ निर्माण करणाऱ्या ऐतिहासिक सार्वजनिक शिवजन्मोत्सव स्वराज्यरथ सोहळ्यात सहभागाची यशस्वी ५ वर्षे पुर्ण केल्याबद्दल श्रीमंत देवरावराजे हांडे, श्रीमंत भोईटे सरकार, श्रीमंत सरदार बाप्पुजी मांढरे  ह्या स्वराज्यघराण्यांचा अखंड भारताच्या स्वाभिमानाचे प्रतीक श्री शिवछत्रपतींचा जिरेटोप देऊन तसेच राजे साळुंखे चालुक्य राजवंव, स्वराज्यनिष्ठ बाबर, सिंहगड वीर विठोजी कारके या स्वराज्यघराण्यांचा शिवजन्मोत्सव स्वराज्यरथ सोहळ्यात पदार्पण केल्याबद्दल दीपोत्सवाचे सन्मानचिन्ह देऊन विशेष गौरव करण्यात आला.

अमित गायकवाड म्हणाले, दीपोत्सवाच्या पहिल्या तपपूर्तीच्या यशस्वी सांगता करुन नव तपपूर्तीचा पहिला दीपोत्सव साजरा करताना लक्ष लक्ष हत्तींचे बळ प्राप्त झाले आहे. शिवरायांचे जगातील हे पहिले भव्य अश्वारुढ स्मारक तसेच एकसंघ ओतीव काम केलेले एकमेव स्मारक आहे. राजर्षि शाहुछत्रपती पुत्र श्रीमंत राजाराम छत्रपती यांच्या अध्यक्षतेखाली १६ जून १९२८ साली या स्मारकाचे अनावरण झाले होते. स्मारकाने यंदा ९६ व्या वर्षात पदार्पण केले आहे. स्मारकाचे वजन तब्बल ८००० किलो आहे. त्यामुळे प्रत्येक किलोमागे एक पणती अशा ८ हजार पणत्यांची दिवाळी पाडव्याला शिवरायांना पारंपरिक मानवंदना देणारा हा विश्वातील एकमेव भव्यदिव्य दीपोत्सव आहे.          
समितीचे सचिव सचिन पायगुडे यांनी समितीच्या स्वराज्यकार्याचा गेल्या १२ वर्षाचा इतिहास तंतोतंत मांडून शिवशंभू भक्तां समोर जिवंत केला.दीपोत्सवाचे आयोजन दीपोत्सवाचे संकल्पक व समितीचे संस्थापक अध्यक्ष अमित गायकवाड, रवींद्र कंक, सचिन पायगुडे, शंकर कडू, समीर जाधवराव, गोपी पवार, मोहन पासलकर, किरण शितोळे, निलेश जगताप, विशाल गव्हाणे,  महेंद्र भोईटे, मयुरेश दळवी यांसह असंख्य स्वराज्यबांधवांनी केले होते.

पुणे : कलाकारांनीच कलाकारांच्या अडीअडचणी सोडविण्यासाठी स्थापन केलेला कलाकारांचा परिवार म्हणजे बालगंधर्व परिवार महाराष्ट्र राज्य, यांच्या वतीने बालगंधर्व रंगमंदिराचा वर्धापन दिन सोहळा दरवर्षी आयोजित केला जातो तसेच वर्ष भर कलाकारांच्या हिताचे अनेक कार्यक्रम राबवले जातात त्याचाच एक भाग म्हणून या वर्षी बालगंधर्व परिवार महाराष्ट्र राज्य यांच्या वतीने आणि एम आर बी फाऊंडेशन पुणे, समुत्कर्ष एंडेव्हर्स प्रा.लिमिटेड पुणे.दिवा फाऊंडेशन पुणे.बढेकर डेव्हलपर्स पुणे यांच्या सहयोगाने पुणे शहर आणि जिल्ह्यातील तब्बल १५०० शे (दीड हजार) कलाकार, तंत्रज्ञ, पडद्यामागिल कलाकारांना दिवाळी अन्नधान्य किट व फराळाचे वाटप करण्यात आले.तसेच कलाकारांनी आर्थिक सामाजिक शैक्षणिक आरोग्य दृष्ट्या सक्षम व्हावे यासाठी बालगंधर्व परिवार महाराष्ट्र राज्य व पुणे महानगर पालिका सामाजिक विभाग यांच्या संयुक्त विद्यमाने कलाक्षेत्रात पहिल्यांदाच कलाकारांच्या तब्बल ३० बालगंधर्व परिवार महिला बचत गट व बालगंधर्व परिवार पूरूष बचत गटांची स्थापना व उदघाटन करण्यात आले.कलाकारांच्या सर्वांगीण विकासासाठी हे ऐतिहासिक पाऊल उचलण्यात आल्याचे बालगंधर्व परिवार महाराष्ट्र राज्याचे अध्यक्ष श्री मेघराज राजे भोसले यांनी सांगितले.या प्रसंगी विविध क्षेत्रातील अनेक मान्यवर उपस्थित होते .

सध्या महाराष्ट्रात आणि देशात लोकप्रिय असलेला मराठी बिग बॉस ५ चा विजेता,सुरज चव्हाण यांनी या सोहळ्यात सहभागी होऊन आपल्या गुलीगत पॅटर्न ने हजारो कलाकारांची मने जिंकली व कलाकारांच्या पाठीशी मेघराज राजे भोसले भैय्यासाहेब कायम उभे असतात व मलाही अनेक वेळा ते मदत करतात असे आवर्जून सांगितले,कलाकारांनी आपल्या कले बरोबर च आर्थिक सक्षमीकरणासाठी प्रयत्न करायला पाहिजेत असेही सुरज चव्हाण म्हणाले.बालगंधर्व परिवार महाराष्ट्र राज्य, अखिल भारतीय मराठी चित्रपट महामंडळ, अखिल भारतीय मराठी नाट्य परिषद पुणे, नृत्य परिषद महाराष्ट्र राज्य, पिंपरी चिंचवड कलाकार संघ,कला परिवार हडपसर,अशा विविध कलासंस्थांच्या तब्बल १५०० शे दीड हजार कलाकारांनी दिवाळी अन्नधान्य किट व फराळाचा लाभ घेतला.सायंकाळी ७ वाजता शेकडो कलाकारांच्या उपस्थितीत पहिल्यांदाच बालगंधर्व रंगमंदिरात भव्यदिव्य असा दिपोत्सव साजरा करून दिवंगत कलाकारांना अभिवादन करण्यात आले.

बालगंधर्व परिवार महाराष्ट्र राज्य चे अध्यक्ष श्री मेघराज राजेभोसले यांच्या मार्गदर्शनाखाली सर्व पदाधिकारी व सभासदांनी विशेष परिश्रम घेऊन कार्यक्रम यशस्वी केला.

पुणे- पिंपरी चिंचवड परिसरातून एका भरधाव कारने फटाके फोडणाऱ्या 35 वर्षीय व्यक्तीला धडक दिल्याची धक्कादायक घटना समोर आली आहे. या अपघातात व्यक्तीचा जागीच मृत्यू झाला. हा भीषण अपघात सीसीटीव्ही कॅमेऱ्यामध्ये कैद झाला असून त्यात एक व्यक्ती रस्त्यावर फटाके फोडताना दिसत आहे. दरम्यान, भरधाव वेगाने येणाऱ्या चारचाकी वाहनाने त्या व्यक्तीला धडक दिली. सोहम पटेल असे मृत व्यक्तीचे नाव आहे. पोलिस या प्रकरणाचा तपास करत असून चालकाचा शोध घेत आहेत.

पोलिसांनी दिलेल्या माहितीनुसार, फेलिसिटी सोसायटीसमोर हा अपघात झाला. अपघातापूर्वी सोहम त्याच्या मित्रांसोबत रस्त्याच्या मधोमध फटाके फोडत होता. या वेळी रस्त्यावरून जाणारी वाहनेही इकडून तिकडे जात होती. दरम्यान, एक भरधाव कार आली आणि सोहमच्या अंगावर गेली. कारच्या धडकेत सोहम गंभीर जखमी झाला. घटनास्थळी उपस्थित लोकांनी त्याला तात्काळ जवळच्या रुग्णालयात नेले, तेथे डॉक्टरांनी त्याला तपासून मृत घोषित केले. यानंतर या प्रकरणाची माहिती पोलिसांना देण्यात आली.ही संपूर्ण घटना सोसायटीबाहेर लावण्यात आलेल्या सीसीटीव्ही कॅमेऱ्यात कैद झाली आहे. व्हिडिओ फुटेजमध्ये सोहम पटेल आणि इतर काही लोक रस्त्यावर फटाके फोडत असल्याचे स्पष्टपणे दिसत आहे. दरम्यान, सोहमसोबतचे लोक रस्त्याच्या कडेला उभे आहेत, तर सोहम रस्त्याच्या मधोमध फटाके फोडत आहे. दरम्यान, एका बाजूने एक वेगवान कार आली आणि तिने सोहमला उडवले. घटनेनंतर कारचालक कारसह फरार झाला. पोलिसांनी हे सीसीटीव्ही फुटेज आपल्या ताब्यात घेतले आहे. सीसीटीव्ही फुटेजवरून कार आणि चालकाची ओळख पटवण्याचे प्रयत्न सुरू असल्याचे पोलिसांनी सांगितले.

पुणे: येथील खडकवासला विधानसभा मतदारसंघात निवडणूक प्रक्रियेची तयारी वेगाने सुरू असून एकखिडकी कक्षाच्या माध्यमातून उमेदवारांना प्रचार परवान्यांचे काम सुलभ करण्यात आले आहे. या कक्षाचे काम दिवाळीच्या सुट्ट्यांमध्येही अहोरात्र सुरू आहे, ज्यामुळे निवडणूक प्रक्रियेतील विविध परवान्यांचे काम वेळेत पूर्ण होऊ शकत आहे.
कक्षाचे काम निवडणूक निर्णय अधिकारी डॉ. यशवंत माने, किरण सुरवसे, आणि सचिन आखाडे यांच्या मार्गदर्शनाखाली सुरू असून, नोडल अधिकारी स्वाती नरोटे तसेच सहाय्यक अधिकारी ज्ञानेश्वर मानकर, अक्षय लडकत, शैलेंद्र सोनवणे, दीपक टिकेकर, आणि प्रदीप शिंदे हे सर्व अधिकारी या महत्त्वपूर्ण कामात कार्यरत आहेत. त्यांच्या सहकार्यातून मतदारसंघातील विविध निवडणूक प्रक्रियांचे व्यवस्थापन प्रभावीपणे पार पडत आहे.
एकखिडकी कक्षाचे कार्य आणि महत्व
एकखिडकी कक्षाचा मुख्य उद्देश म्हणजे निवडणूक प्रक्रियेमध्ये सहभागी होणाऱ्या सर्व उमेदवारांना त्यांच्या प्रचारासाठी लागणारे विविध प्रकारचे परवाने त्वरित उपलब्ध करून देणे हा आहे. निवडणुकीच्या काळात वाहन परवाने, सभा परवाने, रॅली व पदयात्रा परवाने, तसेच लाऊडस्पीकर परवाने या सर्वांची मोठी मागणी असते. हे परवाने प्राप्त करण्याची प्रक्रिया किचकट असते; मात्र एकखिडकी प्रणालीमुळे हे कार्य सोपं होत आहे.
सुट्ट्यांमध्येही न थांबता कार्यरत
एकखिडकी कक्षाचे कामकाज दिवाळीच्या सुट्ट्यांमध्येही सुरू आहे. या काळात देखील अधिकारी अहोरात्र कार्यरत राहून परवाने देण्याचे काम करत आहेत. एकखिडकी प्रणालीच्या अंतर्गत असलेल्या कर्मचाऱ्यांनी न थांबता सेवा देऊन मतदारसंघातील उमेदवारांना सहजगत्या परवाने मिळवून देण्याचे काम केले आहे. त्यामुळे प्रचारासाठी विविध परवाने घेण्याची प्रक्रिया सोपी झाली असून, उमेदवारांच्या तयारीसाठी आवश्यक असलेल्या परवान्यांचे वितरण नियमित सुरू आहे.
निवडणूक प्रक्रियेतील सोयी आणि सुविधा
या कक्षाच्या अंतर्गत उमेदवारांना दिले जाणारे वाहन परवाने, सभा आयोजन परवाने, प्रचार रॅली व पदयात्रा परवाने आणि लाऊडस्पीकर परवाने हे सर्व कडक नियमानुसार दिले जातात. अधिकारी प्रत्येक परवान्याची प्रक्रिया नियमबद्धपणे पार पाडत आहेत. यामुळे निवडणूक प्रक्रिया सुरळीत पार पडत आहे व मतदारसंघातील प्रचाराचे व्यवस्थापन सुगम बनले आहे.
एकखिडकी कक्षाच्या त्वरित आणि वेळेवर कामामुळे निवडणूक प्रक्रियेत गती आली असून, अधिकारी आणि कर्मचारी सतत कार्यरत राहून सेवा देत असल्याने निवडणुकीतील वेळेचे व्यवस्थापन सक्षमपणे केले जात आहे.