पुणे: महाराष्ट्र विधानसभा निवडणूक 2024 शांततेत आणि पारदर्शकतेसह पार पाडण्यासाठी खडकवासला विधानसभा मतदारसंघातील निवडणूक कार्यालयात मतदान केंद्रस्तरीय अधिकारी समन्वय कक्ष कार्यान्वित करण्यात आला आहे. निवडणूक निर्णय अधिकारी डॉ. यशवंत माने, किरण सुरवसे, आणि सचिन आखाडे यांच्या नेतृत्वाखाली मतदान प्रक्रियेची तयारी सुरू आहे. मतदारसंघात शांततामय व निर्भय वातावरणात निवडणूक पार पडावी यासाठी विविध उपाययोजना राबवण्यात येत आहेत.
या कक्षाचे नोडल अधिकारी प्रा. मनिष खोडस्कर आणि रवी फणसे यांच्या मार्गदर्शनाखाली अन्य कर्मचारी मतदान केंद्रांवरील कामकाजावर लक्ष ठेवून आहेत. कक्षाच्या व्यवस्थापनात निवडणूक प्रक्रियेत येणाऱ्या आव्हानांना सामोरे जाण्याची तयारी पूर्ण करण्यात आली आहे. यामुळे मतदारांना योग्य सुविधा, शिस्तबद्ध व्यवस्था, आणि तक्रार निवारणासाठी सक्षम यंत्रणा उपलब्ध करून देण्यात आली आहे.
खडकवासला विधानसभा मतदारसंघात एकूण 505 मतदान केंद्र असून, त्यापैकी दोन विस्तारित केंद्रे देखील कार्यान्वित करण्यात आली आहेत. मतदारांच्या व मतदान केंद्रस्तरीय अधिकारी यांच्या सोयीसाठी या केंद्रांची व्यवस्था आखली गेली आहे. प्रत्येक केंद्रावर मतदान कर्मचाऱ्यांसोबतच मायक्रोऑब्झर्व्हर्सना नियुक्त करण्यात आले आहे, जे मतदारांना मार्गदर्शन करून त्यांचे अनुभव सुगम करण्यासाठी तत्पर आहेत.
मतदान प्रक्रिया शांततामय वातावरणात पार पडण्यासाठी प्रशासनाने विविध सुरक्षा यंत्रणा तैनात केल्या आहेत. मतदान केंद्रांवर पोलीस, सुरक्षा कर्मचारी, आणि आवश्यकतेनुसार मेडिकल किटची सोय करण्यात आली आहे. मतदारसंघातील प्रत्येक नागरिकाला त्यांच्या मतदानाच्या हक्काचा उपयोग निर्भयतेने करता यावा, यासाठी ही सर्व यंत्रणा सज्ज आहे.
या मतदान केंद्रस्तरीय अधिकारी समन्वय कक्षाद्वारे, मतदारांना पारदर्शक आणि व्यवस्थित निवडणूक प्रक्रिया अनुभवता यावी यासाठी प्रशासन कटिबद्ध आहे.

पुणे–महिलांचे संरक्षण, संवर्धन आणि त्यांच्या आरोग्याची सदैव काळजी घेणाऱ्या हेमंत रासने यांच्या पाठीशी कसबा मतदारसंघातील लाडक्या बहिणी भक्कमपणे उभ्या असल्याचा विश्वास भाजपच्या शहर उपाध्यक्षा स्वरदा बापट यांनी व्यक्त केला.

स्वरदा बापट, मृणालिनी रासने, ज्योत्स्ना सरदेशपांडे, ॲड. गायत्री खडके, योगिता गोगावले, रीना सपकाळ, माधुरी पंडित, रुपाली कदम, धनश्री कदम, श्रेया रासने, सोनाली सिद्ध आणि माधुरी मोधर या भाजप महिला मोर्चाच्या कार्यकर्त्या रासने यांच्या प्रचारार्थ घरोघर संपर्क साधून प्रचार करीत आहेत.

बापट म्हणाल्या, हेमंत रासने यांच्या पुढाकारातून कसबा मतदारसंघातील बारा हजार महिलांना मुख्यमंत्री लाडकी बहीण योजनेचा लाभ मिळाला अहे. त्यांच्या खात्यात प्रत्येकी महिन्याला प्रत्येकी पंधराशे रुपये जमा होत आहेत. राज्यात जन्मलेल्या मुलींच्या जन्माचे स्वागत करण्यासाठी महायुती सरकारने लेक लाडकी योजना सुरू केली आहे. त्या योजनेतून त्या मुलीला अठरा वर्षांची झाल्यानंतर एक लाख रुपये मिळतील. या योजनेला ही मोठा प्रतिसाद मिळत आहे. एसटी बस प्रवासासाठी 50 टक्के सवलतीचा महिलांना फायदा होत आहे. मुलींना उच्च शिक्षण मोफत करण्यात आले आहे. या योजनांची मतदारसंघात जनजागृती करून अधिकाधिक लाभ मिळवून देण्यात हेमंतभाऊ आघाडीवर आहेत. त्यामुळे महिलांचे मोठ्या संख्येने मतदान महायुतीला होईल याचा विश्वास वाटतो.

बापट पुढे म्हणाल्या, स्वर्गीय खासदार गिरीश बापट यांनी कसबा मतदारसंघाची संघटनात्मक बांधणी केली आहे. त्यांचे कार्य हेमंत रासने पुढे नेत आहेत. विविध क्षेत्रांत रणरागिणींना स्त्री शक्ती सन्मानाने गौरविण्यात येते. दरवर्षी वीस हजार महिलांचे हळदीकुंकू, रक्षाबंधन, कन्यापूजन, महाभोफ्लडला आदी उपक्रमांद्वारे संस्कृतीचे जतन केले जाते. आरोग्य तपासणी, नेत्र तपासणी, चष्मे आणि औषधांचे मोफत वाटप, लहान मुलांच्या ह्दय शस्त्रक्रिया, कॅन्सर रुग्णांना पेट स्कॅन व केमोथेरपी, श्रवण यंत्रांचे वाटप, रक्त तपासण्या आदी आरोग्य सुविधांचा तेरा हजारहून अधिक महिलांनी लाभ घेतला आहे.

पुणे-कात्रज परिसरात असलेल्या भारती विद्यापीठ वैद्यकीय महाविद्यालय व हॉस्टेलमध्ये बॉम्ब ठेवण्यात आल्याचा धमकीचा ईमेल कॉलेज प्रशासनाला प्राप्त झाला. त्यानंतर याबाबतची माहिती त्यांनी तातडीने पोलिसांना दिल्यावर पोलिस बीडीडीएस पथकासह घटनास्थळी दाखल होऊन महाविद्यालय, हॉस्टेल खाली करुन सखोल तपासणी करण्यात आली. परंतु त्यानंतर सदर बाब अफवा असल्याचे स्पष्ट झाले. मात्र, याप्रकरणी संबंधित अनोळखी ईमेल धारका विराधात भारती विद्यापीठ पोलिस ठाण्यात गुन्हा दाखल करण्यात आला आहे.

याबाबत कॉलेजच्यावतीने डॉ.मंदार दत्तात्र्य करमरकर (वय-५५, रा.पर्वती दर्शन, पुणे) यांनी पोलिसांकडे अज्ञात ईमेल धारका विराधात तक्रार दाखल केली आहे. वैद्यकीय महाविद्यालयाचे प्राचार्य यांना एका अलोळखी व्यक्तीने संबंधीत इर्मल पाठवला होता. त्यामध्ये तमिळनाडूमधील एका घटनेचा उल्लेख करुन भारती विद्यापीठ वैद्यकीय महाविद्यालय व हॉस्टेलमध्ये बॉम्ब ठेवण्यात आल्याची चेतावणी देण्यात आली. याबाबत भारती विद्यापीठ पोलिसांना माहिती मिळाल्यावर ते तातडीने घटनास्थळी दाखल झाल्याचे वरिष्ठ पोलिस निरीक्षक दशरथ पाटील यांनी सांगितले.

बीडीडीएस पथक घटनास्थळी दाखल होऊन त्यांनी सर्व ठिकाणी तपासणी करत वस्तीगृहाची देखील झाडाझडती घेतली. याप्रकारामुळे महाविद्यालयात खळबळ उडून धावपळ झाली. पोलिसांनी ईमेलची तपासणी केली असता तो विदेशातून पाठविण्यात आल्याचे स्पष्ट झाले आहे. दरम्यान, ईमेल मध्ये कोणती स्पष्ट धमकी नव्हती किंवा ईमेल करणाऱ्याचा उद्देश स्पष्ट कण्यात आला नव्हता, असे पोलिसांनी सांगितले आहे. याबाबतचा पुढील तपास सहाय्यक पोलिस निरीक्षक स्वप्नील पाटील करत आहेत.

पुणे, दि. ७ : दसरा व दिवाळी सणाच्या कालावधीत अन्न व औषध प्रशासन विभागाने पुणे विभागात व जिल्ह्यात धडक मोहीम राबवून दूध, गाईचे तूप, भेसळयुक्त बटर, स्वीट खवा व वनस्पती आदी अन्न पदार्थांचा एकूण २४ लाख ७ हजार ९१८ रूपयांचा साठा जप्त केला आहे.

दसरा व दिवाळी सणाच्या कालावधीत पुणे जिल्ह्यात ४८ तर अन्न आस्थापनेतून अन्न पदार्थांचे एकूण ५५ अन्न नमुने विश्लेषणासाठी घेण्यात आले. तसेच गाईचे तूप, भेसळयुक्त बटर, स्वीट खवा, वनस्पती व भगर आदी अन्न पदार्थाचा एकूण १४ लाख ८८ हजार ३९८ रुपये किंमतीचा साठा जप्त करण्यात आला.

पुणे विभागात ८३ अन्न आस्थापनांच्या तपासण्या करण्यात आल्या तर अन्न पदार्थाचे एकुण १०२ अन्न नमुने विश्लेषणासाठी घेण्यात आले. भेसळीच्या संशयावरुन विविध अन्न आस्थापनांवर छापे टाकून जप्ती करण्यात आली. या मोहिमेत भेसळयुक्त अन्न पदार्थाचा ९ लाख १९ हजार ५२० रुपये किंमतीचा साठा जप्त करण्यात आला. दोन्हीही ठिकाणचे विश्लेषण अहवाल प्राप्त होताच कायद्याप्रमाणे पुढील कारवाई घेण्यात येईल.

ही कारवाई अन्न व औषध प्रशासनचे पुण्यातील सर्व सहायक आयुक्त (अन्न), अन्न सुरक्षा अधिकारी यांनी पार पाडली. सणासुदीच्या दरम्यान विक्री करण्यात येणाऱ्या अन्न पदार्थामध्ये भेसळ संदर्भात काही संशय असल्यास जागरुक नागरीकांनी प्रशासनाचा टोल फ्री क्रमांक १८००२२२३६५ यावर संपर्क साधावा, असे आवाहन अन्न व औषध प्रशासन पुणे विभागाचे सह आयुक्त (अन्न) सुरेश अन्नपुरे यांनी केले आहे.

पुणे, दि. 7 : “आम्ही, भारताचे नागरिक, लोकशाहीवर निष्ठा ठेवून, याद्वारे प्रतिज्ञा करतो की, आपल्या देशाच्या लोकशाही परंपरांचे जतन करु आणि मुक्त निःपक्षपाती व शांततापूर्ण वातावरणातील निवडणूकांचे पावित्र्य राखू व प्रत्येक निवडणूकीत निर्भयपणे तसेच आम्ही धर्म, वंश, जात, समाज, भाषा यांच्या विचारांच्या प्रभावाखाली न येता किंवा कोणत्याही प्रलोभनास बळी न पडता मतदान करु”, अशी शपथ पर्वती विधानसभा मतदार संघामध्ये आयोजित कार्यक्रमांमध्ये उपस्थित असलेल्या नागरिकांनी घेतली.

मतदानाचा टक्का वाढविण्यासाठी याठिकाणी मतदान जनजागृती पथकाच्या वतीने निवडणूक निर्णय अधिकारी मनोजकुमार खैरनार यांच्या मार्गदर्शनाखाली भिमाले गार्डन सॅलेसबरी पार्क, ह्युममॅकनरी शाळेजवळ तसेच मार्केट यार्ड भाजी मंडई, गगनविहार हौसिंग सोसायटी संदेशनगर येथे मतदान जनजागृती कार्यक्रम राबविण्यात आला. तर सुवर्ण मंदिर शेजारी तळजाई समाज मंदिर या ठिकाणी मतदान जनजागृती रॅली काढण्यात आली.

येत्या २० नोव्हेंबर रोजी विधानसभा सार्वत्रिक निवडणुकांसाठी मतदान होणार आहे. त्या अनुषंगाने सर्व पात्र मतदारांनी मतदान करावे, असे आवाहन करण्यात आले. तसेच मतदार सहायता ॲप तसेच सिव्हिजील ॲपबद्दल माहितीही देण्यात आली. आपल्याला असलेला मतदानाचा हक्क व तो बजावण्याचे कर्तव्य याविषयी मार्गदर्शन करुन मतदानाचे महत्व यावेळी पटवून देण्यात आले. या कार्यक्रमावेळी उपस्थित असलेल्या मतदारांनी १०० टक्के मतदान करणार असल्याचा संकल्प केला.

यावेळी स्वीप पथकाचे नोडल अधिकारी संपदा काळे, अमोल लावंड, गिरीश दारवटकर, लोकेश सुर्वे, पर्यवेक्षक सौरभ जाधव, रविंद्र पाटील, दत्तात्रय हरपळे यांच्यासह बीएलओ उपस्थित होते.