भाजप नेते धर्म जाती, कलम ३७० यावर सतत भाषण करत आहेत पण आघाडी नेते विकासावर भर देत आहे. जनतेला आम्ही विमा कवच, आरोग्य सुविधा, गॅस सिलेंडर देणे अशी आश्वासने दिली आहे. भाजप हा कोणाचा मित्र कधी होऊ शकत नाही, ते धोकेबाज आहे. त्यांनी खोके देऊन मित्र पक्षांना सोबत घेतले आहे. भाजपला मत म्हणजे नफरतला मतदान आहे. त्यामुळे राहुल गांधींना जनतेने साथ द्यावी, असे मत ऑल इंडिया कांग्रेस मायनॉरिटी सेल अध्यक्ष खासदार इमरान प्रतापगढी यांनी गुरवारी व्यक्त केले.

पुणे कॅंटनमेंट मतदार संघातील काँग्रेस, राष्ट्रवादी (शरद पवार ), शिवसेना (उद्धव ठाकरे) व मित्र पक्षाचे अधिकृत उमेदवार माजी गृहराज्यमंत्री रमेश बागवे तसेच हडपसर मतदार संघातील प्रशांत जगताप यांच्या निवडणूक प्रचारासाठी आले असताना ते बोलत होते. यावेळी रमेश बागवे,अमीन पठाण, मौलाना निजामुद्दीन चिश्ती, डॉ.मौलाना काझमी, अली इनामदार, शफी इनामदार उपस्थित होते.

प्रतापगढी म्हणाले, भाजपने संविधान बदलण्यासाठी लोकसभा निवडणुकीत प्रयत्न केले. पण जनतेने ४०० पार नारा देणाऱ्यांना २४० पर्यंत आणून बसवले. बिहार मधील नितीश कुमार हे केंद्र सरकारसोबत आता असेल, तरी ते कधी सत्तेतून साथ निघून जातील सांगता येत नाही, यासाठी महाराष्ट्र निवडणूक महत्वाची आहे.

भाजप बेटंगे तो कटेंगे नारा देतात. पण आम्ही मोहब्बत राजकारण करतो. महाराष्ट्र हा स्वतःची अस्मिता असलेला प्रदेश असून त्याचे रिमोट गुजरातच्या हाती देऊ नका. देशाला कोणत्या जाती किंवा धर्मा मध्ये विभागले जाऊ नये, तर हा देश एकसंध ठेवावा. संविधान वाचवणे महत्वाचे आहे.

महागाई, बेरोजगारी, भ्रष्टाचार याबाबत केंद्र सरकार काही बोलत नाही किंवा उपाययोजना करत नाही. महिला, मुले सुरक्षित ठेवण्याची ही निवडणूक आहे. २६ नोव्हेंबर रोजी संविधान दिवस साजरा केला जाणार आहे. कारण काँग्रेस नेते राहुल गांधी यांची सरकारला भीती वाटत आहे. संसदेत प्रवेश करताना नरेंद्र मोदी यांनी माथा टेकून संसदेत प्रवेश केला आणि आठ वर्षात संसद बदलून टाकली. आता त्यांनी संविधान विषय काढून त्याबाबत बदल करण्यासाठी प्रयत्न सुरू केले. शिवसेना नेते उद्धव ठाकरे यांच्या मागील दोन दिवस बॅग जाणीवपूर्वक तपासणी करून त्यांना त्रास दिला जात आहे, जनतेने याचा बदला घ्यावा, असे प्रतापगढी म्हणाले.

विकासासाठी रमेश बागवे यांना आमदार पदावर निवडून द्या. आगामी काळात पुण्यात खासदार देखील काँग्रेसचा होईल. काँग्रेसचे अंतर्गत सर्व्हे नुसार रमेश बागवे यंदा मोठ्या मताधिक्याने विजयी होतील, सत्ता आल्यावर आम्ही त्यांना पुन्हा मंत्री करू, असेही प्रतापगढी

पुणे- लोणी भापकर येथील सभेत शरद पवार यांचे नाव न घेता अजित पवार पुन्हा वयावर घसरले आणि मुलगी झाली तर नातूच काढला .. असे म्हणत अरे मी पण तुमचा पुतण्याच आहे न म्हणत कौटुंबिक भावनिक कार्ड खेळले .

उपमुख्यमंत्री तथा राष्ट्रवादी काँग्रेसचे अध्यक्ष अजित पवार यांची बारामती मतदारसंघात लोणी भापकर येथे सभा झाली यावेळी बोलताना ते म्हणाले की,ही निवडणूक माझ्या भवितव्यासाठी अत्यंत महत्त्वाची आहे. इतरांचे वय पाहता भविष्यात बारामतीचे सर्वकाही मलाच पाहायचे आहे, असे ते राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांचा नामोल्लेख टाळत म्हणालेत.मी निवडणूक डोळ्यांपुढे ठेऊन काम करत नाही. मी फुशारक्या मारत नाही. माझे काम बोलते. लोकसभेला जो निर्णय घ्यायचा होता, तो तुम्ही घेतला. पण आताची निवडणूक माझ्या भवितव्यासाठी अत्यंत महत्त्वाची आहे.असेही ते म्हणले.

काल पुण्यात पंतप्रधान नरेंद्र मोदी यांची सभा झाली. त्यात त्यांनी कुणावरही टीका केली नाही. मागच्यावेळी केली, तर गडबड झाली. पण आता केवळ विकासावर बोलले. समोरचे लोक लोकसभा निवडणुकीत सुप्रियाकडे लक्ष द्या, ही साहेबांची शेवटची निवडणूक आहे असे सांगायचे. पण आता नातवाकडे लक्ष देण्यास सांगत आहेत. हे अवघडच आहे. मी सुद्धा पुतण्या आहे ना? मुलगी झाली की थेट नातूच काढला. मी सुद्धा तुमच्या मुलासारखाच आहे ना?

अजित पवार यांच्या आज लोणी भापकर यांच्यासह जळगाव कडेपठार व मेदड येथेही सभा होणार आहेत. अजित पवार पुढे म्हणाले, बारामतीच्या मतदारांनी लोकसभा निवडणुकीत आपल्याला हवा असणारा निर्णय घेतला. पण ही निवडणूक माझ्या भविष्यासाठी अत्यंत महत्त्वाची आहे. राज्यात काही प्रमुख नेते आहेत. त्यात माझे नाव येते. नाव कमवायला वेळ लागतो. 2004 पासून मला लोक सीनिअर म्हणायला लागले. तेव्हापासून मी राज्याच्या राजकारणात लक्ष देत आहे. शरद पवार साहेब राज्यात 30 वर्षे काम केल्यानंतर दिल्लीला गेले.

अजित पवार यांनी यावेळी आपले पुतणे तथा शरद पवार गटाचे उमेदवार युगेंद्र पवार यांनाही टोला हाणला. ते म्हणाले, आपल्या तालुक्यातील तरुण काम करत असतील तर त्याला मलिदा गँग का म्हटले जाते? आज विरोधात बोलण्यासाठी काहीही नसल्यामुळे काहीजण मलिदा गँग म्हणत आहेत. आम्ही काम करताना जात किंवा नात्यागोत्याचा विचार केला नाही. गावातले पुढारी नीट वागत नाहीत. त्याचा राग माझ्यावर निघतो. पण ही निवडणूक झाल्यानंतर मी पक्षातील नव्या चेहऱ्यांना पुढे आणेल.

शरद पवार साहेब मुख्यमंत्री झाल्यानंतर मी तालुक्याला कसा फायदा होईल हे पाहिले. साहेब 1989 मध्ये मी अजितला तिकीट देणार नाही असे म्हणाले होते. त्यानंतर 1991 ला मला तिकीट दिले. आता काही लोकांना काल काम सुरू केले की आज आमदार झाल्याचे स्वप्न पडत आहेत. मला इंग्रजी येते किंवा येत नाही हा प्रश्न नाही. पण त्यानंतरही मी राज्याचा उपमुख्यमंत्री आहे.

मी साडेसहा लाख कोटींचे बजेट सादर करतो. त्याला साडेसहा लाख कोटीतील एक टिंब काढून दाखवा म्हणावे. तो माझा पुतण्या आहे. मी त्याच्यावर टीका करण्याची गरज नाही. पण लोकसभा निवडणुकीत सुप्रिया सुळेंविरोधात सुनेत्राला उभे करण्याची गरज नव्हती, असेही अजित पवार यावेळी बारामतीच्या जनतेला विधानसभा निवडणुकीत आपल्यामागे ठामपणे उभे राहण्याचे आवाहन करताना म्हणाले.

पुणे-भाजपने लोकसभा निवडणुकीत पैशाचा बेसुमार वापर करूनही जनतेने त्याला थारा दिला नाही. तीच परिस्थिती आता विधानसभा निवडणुकीत आहे. पुण्यातील मतदार हा स्वाभिमानी असून ते भाजपला निवडणुकीत धडा शिकवतील. हजारो कोटींचे टेंडर भाजपने काढून त्यातून टक्केवारी कमावली आहे. केंद्र आणि राज्य सरकारमध्ये कोट्यवधी रुपयांचा भ्रष्टाचार होत असून, त्या पैशाचा वापर निवडणुकीत होत आहे, असे मत कसबा विधानसभा मतदारसंघाचे आघाडीचे उमेदवार आमदार रवींद्र धंगेकर यांनी पत्रकार परिषदेत व्यक्त केले.

धंगेकर म्हणाले, पंतप्रधान नरेंद्र मोदी यांनी पुण्यात जाहीर सभा घेऊन विकासकामे सांगितली. पण पुण्यातील मेट्रो डी पी आर हा काँग्रेस पक्षाने सुरू केला असून देशात प्रथम मेट्रो सुरू करण्याचे काम काँग्रेसने केले आहे. पुण्यात दिवसेंदिवस वाहतूक कोंडी प्रश्न बिकट होत असून ती सुधारण्यात सरकारला अपयश आले आहे. पुण्यातील वाढते प्रदूषण देखील प्रमुख समस्या आहे. पण त्याकडे लक्ष्य दिले जात नाही. काँग्रेस काळात अनेक राष्ट्रीय संस्था पुण्यात स्थापन झाल्या आहे. त्यामुळे विद्येचे माहेरघर याचा चेहरा मोहरा काँग्रेस काळात बदलला गेला आहे.

पुण्यात पंतप्रधान दरवेळी येऊन केवळ वेगवेगळी आश्वासने देतात, पण त्याची पूर्तता करत नाही हे वास्तव आहे. पुण्यात पाण्याचा तुटवडा जाणवत आहे पण केवळ भावनिक मुद्दे समोर करून भाजप राजकारण करत आहे. पुणे ऑटोमोबाईल हब असताना सरकारच्या चुकीच्या धोरणामुळे उद्योग स्थलांतरित होत आहे. जातीयवाद ,धार्मिक मुद्दे समोर केले जात आहे, पण आता जनता सुज्ञ आहे, असेही धंगेकर म्हणाले.

पुणे, दि. १३ नोव्हेंबर, २०२४ : शिवाजीनगर विधानसभा मतदारसंघाचा सर्वांगीण विकास, हेच ध्येय बाळगून गेल्या पाच वर्षांत मनापासून काम केले. औंध, मॉडेल कॉलनी, बोपोडी अशा विविध भागांतील नागरिकांच्या समस्या जाणून त्या सोडविण्याच्या दिशेने भरीव प्रयत्न केले आणि विकासकामांना गती दिली. अशी भावना आमदार सिद्धार्थ शिरोळे यांनी व्यक्त केली.

औंध भागात स्मशानभूमीचे सुशोभीकरण, कुटीर रुग्णालयात सोयीसुविधा, जगदीशनगर सोसायटी, इंदिरा वसाहत, कस्तुरबा वसाहत येथे हायमास्ट दिवे, बॉडी गेट पोलिस लाईन, इंदिरा वसाहत येथे विद्युत तारा भूमिगत करणे, औंध गावात छत्रपती शिवाजी महाराज चौक येथे सुशोभीकरण, सुलभ शौचालयाच्या दुरुस्तीची कामे अशा विविध कामांचा यामध्ये समावेश आहे, असे शिरोळे यांनी सांगितले.

विधानसभा निवडणुकांच्या पार्श्वभूमीवर शिरोळे मतदार संघात सर्वत्र मतदारांच्या भेटी घेत असून नुकतीच त्यांनी औंध येथील प्रिसम सोसायटी, वेस्टर्न रिव्हर व्ह्यू सोसायटी, सेल्वेन हाईटस सोसायटी, निर्मिती होरिझोन सोसायटी यासोबतच दीप बंगला चौक, मित्र नगर कॉलनी परिसरातील रहिवाशांची भेट घेतली.

माजी मुख्यमंत्री स्व. वसंतराव नाईक स्मारक, मॉडेल कॉलनी येथील बर्ड वॉचिंग सेंटरची दुरुस्ती, भोसलेनगर येथे महावितरणचे रिंग मेन युनिट बसविणे, नॉव्हेल्टी हेरिटेज को-ऑप. हौसिंग सोसायटी येथे भूमिगत केबल टाकणे, ही कामेही मार्गी मागील पाच वर्षांत मार्गी लागले आहेत. तसेच गणेश सोसायटी, खाऊ गल्ली लेन, हर्डीकर हॉस्पिटल परिसरात सीसीटीव्ही कॅमेरे बसविण्यात आले आहेत. आनंद यशोदा हौसिंग सोसायटी, मॉडेल कॉलनी येथील लकाकी तळे रोड व अन्य भागात ड्रेनेज लाईन टाकल्या असून या भागातील नागरिकांचे जीवन आणखी सुखकर करण्यासाठी आणखी खूप काही करायचे असल्याचेही शिरोळे म्हणाले.

या परिसरासाठी येत्या काळात शासकीय संस्थांची मैदाने नागरिकांसाठी खुली करणे व इतर मैदाने सुसज्ज करणे, मेट्रो स्थानकांपर्यंत येण्या-जाण्यासाठी फीडर बस आणि रिक्षासेवेची उपलब्धता, मॉडेल कॉलनी, औंध येथील ‘पीएमपीएल’च्या बसथांब्यांचे नूतनीकरण, औंध आयटीआयचे अद्ययावतीकरण, युपीएससी व एमपीएससी स्पर्धा परीक्षांसाठी प्रशिक्षण केंद्रे, ओपन जिम, जलतरण तलाव, तसेच मॉडेल कॉलनीमध्ये ‘एमएनजीएल’चे नेटवर्क पूर्ण करणे, ही कामे प्रस्तावित असून लवकरात लवकर ती पूर्ण होतील असे आश्वासन शिरोळे यांनी दिले.