पुणे: “मूल्यांची जपणूक आणि मूल्यवर्धनास नैतिकता, प्रामाणिकता, तथ्य आणि सत्याची दिली, तर त्यातून चांगल्या संपत्तीची निर्मिती होईल. विविध क्षेत्रांतील विदेशी कंपन्यांसाठी आपले बुद्धीवैभव खर्च होतेच; पण त्यासोबतच या बुद्धीचा वापर आपल्या देशासाठी अधिक प्रमाणात व्हायला हवा,” असा सल्ला माजी केंद्रीय मंत्री आणि भाजपचे ज्येष्ठ नेते प्रकाश जावडेकर यांनी तरुणाईला दिला. व्यवसाय करताना स्वतःचे छंद जोपासा, ते तुम्हाला ताणतणावांपासून मुक्त ठेवतील, तुमची एकाग्रता वाढेल. जिज्ञासा, सतत शिकण्याची वृत्ती जागी ठेवा, तुमच्यातील विद्यार्थी जागा ठेवा, असे आवाहनही जावडेकर यांनी केले.

दी इन्स्टिट्यूट ऑफ चार्टर्ड अकाउंटंट्स ऑफ इंडियाच्या (आयसीएआय) बोर्ड ऑफ स्टडीज, ‘आयसीएआय’ पुणे शाखा व ‘विकासा’ शाखेच्या वतीने सीए विद्यार्थ्यांसाठी आयोजित दोन दिवसीय राष्ट्रीय परिषदेच्या उद्घाटनावेळी प्रकाश जावडेकर बोलत होते. महालक्ष्मी लॉन्स येथे आयोजिलेल्या या दोन दिवसांच्या राष्ट्रीय परिषदेत देशभरातुन २००० पेक्षा अधिक विद्यार्थी सहभागी झाले आहेत.

प्रसंगी ‘आयसीएआय’च्या केंद्रीय समितीचे सदस्य सीए चंद्रशेखर चितळे व सीए संजीवकुमार सिंघल, ज्येष्ठ सनदी लेखापाल डॉ. एस. बी. झावरे, विभागीय समिती सदस्य सीए रेखा धामणकर व सीए अभिषेक धामणे, ‘आयसीएआय’ पुणे शाखेचे अध्यक्ष सीए सचिन मिणियार, परिषदेच्या समन्वयिका व ‘विकासा’ चेअरपर्सन सीए प्रज्ञा बंब, उपाध्यक्ष सीए प्रणव आपटे, सचिव सीए निलेश येवलेकर, खजिनदार सीए नेहा फडके, कार्यकारिणी सदस्य सीए सारिका दिंडोकर, सीए प्रितेश मुनोत, सीए नंदकुमार कदम, ‘विकासा’चे व्हाइस चेअरमन श्रीयस नवले, सचिव संयोगिता कुलकर्णी, खजिनदार वेदांत वेदुआ, सहसचिव प्रांजल देवकर, सहखजिनदार जय येडेपाटील, संपादक वैभव अंभोरे आदी उपस्थित होते.

प्रकाश जावडेकर म्हणाले, “तुम्ही नव्या काळाचे प्रतिनिधी आहात. तुमच्यापुढे अनेक संधी, कर्तृत्वाचे आभाळ खुले आहे. सनदी लेखापाल हा व्यवसाय अंगिकारताना विनम्रता, विश्वासार्हता, खरेपणा, नेमकेपणा आणि व्यावसायिक शिस्तीचे पालन करा. कामाचे क्षेत्र कुठलेही असले, तरी आपण भारताचे प्रतिनिधी आहोत, हे लक्षात ठेवा. नीतिमत्तेवर आधारित उत्तम प्रॅक्टिस ही काळाची गरज आहे.”

सीए चंद्रशेखर चितळे म्हणाले, “सनदी लेखापाल हे देशाचे आर्थिक क्षेत्रातले लढवय्ये आहेत. तुम्ही जगात कुठेही हा व्यवसाय करू शकता. उच्चतम ध्येय गाठण्याचे स्वप्न ठेवून जागतिक स्तरावरचे काम करण्याचा प्रयत्न करा.”

सीए संजीवकुमार सिंघल म्हणाले, “सीए हे देशाचे ग्रोथ इंजीन आहे, हे लक्षात घेऊन नोकरी मिळवण्यापेक्षा रोजगारनिर्मिती करा. ग्राहकांचा विश्वास मिळवा. तुमची प्रत्येक नवी कृती हे देशासाठी पुढचे पाऊल ठरावे.”

सीए एस. बी. झावरे म्हणाले, “स्वतःला नेहमी काळासोबत अपडेट ठेवा. व्यावसायिक मूल्यांशी तडजोड करू नका. सीए देशाचे आर्थिक विश्वातील वैद्यकीय, अभियांत्रिकी, आर्किटेक्ट अशा विविध भूमिका निभावू शकतात.”

सीए रेखा धामणकर, सीए अभिषेक धामणे यांनीही विद्यार्थ्यांचा प्रोत्साहित केले. सीए सचिन मिणियार यांनी भावी सनदी लेखापालांनी आपल्या युवा उर्जेसह नवकल्पनांचे, आत्मविश्वासाचे योगदान या क्षेत्राला द्यावे, मात्र मानवी चेहेरा जपावा, असे आवाहन केले. 

सीए प्रज्ञा बंब यांनी राष्ट्रीय परिषदेसाठीच्या ‘अग्रिया’ या संकल्पनेचे स्पष्टीकरण केले. सामाजिक दायित्व, सामूहिक जबाबदारीचे भान असणारे आर्थिक नेतृत्व देशाचे भवितव्य घडवण्यात मोलाचे योगदान देणारे ठरावे, असे त्या म्हणाल्या.

ओम केसकर आणि ओवी टोकेकर यांनी सूत्रसंचालन केले. श्रीयश नवले यांनी आभार मानले.
————–
भारतीय ब्रँड उभारा: जावडेकर
आज जगामध्ये डेलाॅइट, अर्नेस्ट अँड यंग, केपीएमजी आणि पीडब्ल्यूसी हे इंटरनॅशनल ब्रँड मल्टी डिसिप्लिनरी सल्लागार संस्था म्हणून प्रसिद्ध आहेत. भारतामध्येही अलीकडे अशा मल्टीडिसिप्लिनरी संस्थेला परवानगी दिली आहे. त्यामुळे भारतीय चार्टर्ड अकाउंटंट, कॉस्ट अकाउंटंट, वित्तीय व कर सल्लागार, कायदे तज्ञ आणि अन्य लोकांनी एकत्र येऊन या क्षेत्रात भारताचा ब्रँड तयार करावा. जवळपास दोन लाख भारतीय सीए व अन्य प्रोफेशनल्स हे या चार संस्थांमध्ये काम करतात. पण त्याचा फायदा परदेशी कंपन्यांच्या मालकांना होतो. आपल्याला आता ओनरशिप घ्यायला हवी. सीए विश्वातील विदेशी मोठ्या कंपन्यांसाठी राबण्यापेक्षा स्वतःचा व्यवसाय उभारा आणि नव्याने रोजगारनिर्मिती करण्याचा प्रयत्न करा, असे प्रकाश जावडेकर यांनी सांगितले.

पुणे-पत्नी बेपत्ता झाल्याची फिर्याद देऊन त्याबाबत पाठपुरावा करणाऱ्या पतीनेच तिचा खून करून मृतदेह भट्टीत नष्ट केला नंतर राख आणि अस्थी मुठा नदीत फेकून दिल्याचा धक्कादायक प्रकार नुकताच उघडकीस आला. वारजे पोलिसांनी कौशल्याने तपास करून या खुनाचा छडा लावत एका गॅरेजचालकाला अटक केली. समीर पंजाबराव जाधव (४२, रा. शिवणे ) असे अटक करण्यात आलेल्या आरोपीचे नाव आहे. त्याने त्याचे पत्नी अंजली (४०) हिचा निर्घृण खून केल्याचे तपासात स्पष्ट झाले. तपासासाठी त्याला पोलिस कोठडीत ठेवण्याचा आदेश न्यायालयाने दिला आहे.

अनैतिक संबंधांच्या कारणावरून हा खून झाल्याची माहिती प्राथमिक तपासात निष्पन्न झाली. समीरने पुणे -सातारा रस्त्यावर वारूळवाडी परिसरात पत्र्याची एक शेड भाड्याने घेतली. तेथे त्याने एक लोखंडी बॉक्स नेऊन ठेवला. तसेच, वखारीतून जळणाची लाकडे तेथे नेऊन ठेवली. त्यानंतर, २६ ऑक्टोबर रोजी त्याने अंजलीला फिरायला नेण्याच्या बहाण्याने कारमधून खेड शिवापूर परिसरात नेले. तेथे घाटात फिरल्यानंतर त्याने भेळ विकत घेतली व नवीन शेड दाखवण्याच्या निमित्ताने अंजलीला शेडमध्ये नेले. तेथे उभयतांनी भेळ खाल्ली. ती पूर्ण बेसावध असताना समीरने अचानक गळा दाबून करुन तिचा मृतदेह शेडमध्ये जाळून टाकला. तिची राख व अस्थीही त्याने नदीत सोडल्या. नंतर, त्याने तो बॉक्सही जाळून टाकून पूर्ण पुरावा नष्ट केला. त्याचवेळी त्याने स्वतः:च पत्नी बेपत्ता असल्याची तक्रार पोलिसांकडे दिली.आरोपी समीर याचे वारजे परिसरात गॅरेज आहे. तो पत्नी अंजलीसोबत त्याच परिसरात वास्तव्याला होता. त्याने पत्नी बेपत्ता असल्याची फिर्याद २६ ऑक्टोबर २०२५ ला वारजे पोलिस ठाण्यात नोंदवली. त्याबाबत तो वारंवार पोलिस ठाण्यात जाऊन तक्रारीचा पाठपुरावा करत होता. अंजली ज्या दिवसापासून बेपत्ता झाली, तेव्हापासून तिच्या मोबाईल फोनचे तांत्रिक विश्लेषण पोलिसांनी केले. तसेच, त्या भागातील सीसीटीव्ही फुटेजची पडताळणी केली. त्याबाबत पोलिसांनी समीर याच्याकडे बारीकसारीक चौकशी केली. त्यामध्ये तो देत असलेल्या माहितीत तफावत आढळल्याने पोलिसांना संशय आला. त्यामुळे त्यांनी समीरची कसून चौकशी केली. पोलिसांच्या प्रश्नाच्या सरबत्तीपुढे समीरचा निभाव लागला नाही. त्याने आपणच पद्धतशीर कट रचून अंजलीचा खून केल्याची कबुली दिली.

‘एमआयटी एडीटी’ विद्यापीठाचा ८वा दीक्षांत समारंभ उत्साहात

पुणे : विद्यार्थी हा आत्मनिर्भर आणि विकसित भारताचा प्रमुख कणा आहे. त्यांना पूर्वीच्या गुरुकुल पद्धतीतील सर्वांगिण दृष्टीकोन विकसित करणारे, समाजाप्रती संवेदनशील बनविणारे, मानसिक व शारीरिक आरोग्य अबाधित राखत कायम सकारात्मक दृष्टीकोन देणारे, पुस्तकाबाहेरील शिक्षण द्यायला हवे. कारण, विद्येचे अंतिम उद्दिष्ट केवळ पदवी मिळवणे नव्हे; मिळालेल्या ज्ञानाचा उपयोग समाजाच्या उन्नतीसाठी करणे, स्वतःला देशाच्या प्रगतीसाठी समर्पित करणे — हेच खऱ्या शिक्षणाचे यश आहे.

अपयश हे शेवट नसते, तर नव्या प्रवासाची सुरुवात असते. त्यामुळे, अपयशाला यशाची शिडी बनवून तुमच्या ज्ञान, कर्तृत्व आणि संवेदनशीलतेच्या बळावर भारताला जागतिक महासत्ता बनवा, असे आवाहन राजस्थानचे राज्यपाल हरिभाऊ बागडे यांनी केले.

ते येथे आयोजित एमआयटी आर्ट, डिझाईन अँड टेक्नॉलॉजी विद्यापीठ (एमआयटी-एडीटी), विश्वराजबाग, पुणेच्या ८व्या दीक्षांत समारंभप्रसंगी बोलत होते. या प्रसंगी भारतीय तंत्रज्ञान संस्था (आयआयटी) मंडीचे संचालक प्रा. डॉ. लक्ष्मीधर बेहरा, एमआयटी एडीटी विद्यापीठाचे कार्याध्यक्ष व प्र-कुलपती प्रा. डॉ. मंगेश तु. कराड, भारत सरकारच्या तंत्रज्ञान, नवोन्मेष, उष्मायन व उद्यमशीलता क्षेत्रातील राष्ट्रीय तज्ज्ञ सल्लागार परिषदेचे अध्यक्ष श्री. रामानन रामनाथन, ‘ग्लास मॅन ऑफ इंडिया’ म्हणून परिचित ‘गोल्ड प्लस ग्लास इंडस्ट्रीज’चे चेअरमन श्री. सुभाष त्यागी, एसएसपीएल ग्रुपच्या व्यवस्थापकीय संचालक तथा राष्ट्रीय रिअल इस्टेट विकास परिषदेच्या (नारेडको) राष्ट्रीय अध्यक्षा स्मिता पाटील, कार्यकारी संचालक प्रा. डॉ. सुनीता कराड, सौ. ज्योती ढाकणे-कराड, डॉ. विनायक घैसास, कुलगुरू प्रा. डॉ. राजेश एस., प्रोवोस्ट डॉ. सायली गणकर, प्र-कुलगुरू डॉ. रामचंद्र पुजेरी, डॉ. मोहित दुबे, कुलसचिव डॉ. महेश चोपडे, परीक्षा नियंत्रक डॉ. ज्ञानदेव नीलवर्ण आदी मान्यवर उपस्थित होते.

डॉ. लक्ष्मीधर बेहरा यावेळी म्हणाले की, भारतीय परंपरेत आनंद स्वतःत शोधला जातो. भगवद्गीता आपल्याला समाधानी राहायला शिकवते, असे सांगताना त्यांनी अनुभवाधारित शिक्षणाद्वारेच भारत आत्मनिर्भर होऊ शकतो, असे मत व्यक्त केले.

रामानन रामनाथन यांनी विज्ञान व तंत्रज्ञान क्षेत्रात भारताने निर्माण केलेले जागतिक स्थान आणि भविष्यातील संशोधनाची गरज यावर प्रकाश टाकत विद्यार्थ्यांना संशोधनासाठी प्रोत्साहित केले. स्मिता पाटील यांनी राष्ट्रीय रिअल इस्टेट विकास परिषदेच्या कार्याची माहिती देताना एमआयटी एडीटी विद्यापीठाच्या शैक्षणिक कार्याचा गौरव केला आणि पदवीप्राप्त विद्यार्थ्यांना उज्वल भविष्यासाठी शुभेच्छा दिल्या.

काच उत्पादनात प्रचंड रोजगार निर्मितीची क्षमता – सुभाष त्यागी

मी विद्यार्थी दशेत अभ्यासात हुशार नव्हतो, मात्र माझ्यात मेहनत करण्याची प्रचंड इच्छाशक्ती होती. त्याच इच्छाशक्तीच्या बळावर आज गोल्ड प्लस ग्लास इंडस्ट्रीजची वार्षिक उलाढाल १० हजार कोटींपेक्षा अधिक झाली असून ४ हजारांहून अधिक लोकांना रोजगार देऊ शकलो. भारतात सध्या दररोज १ लाख टन काचेची गरज भासते, मात्र उत्पादन फक्त २० हजार टन आहे. त्यामुळे काच उत्पादन क्षेत्रात संशोधन आणि रोजगार निर्मितीसाठी प्रचंड वाव आहे, असे मत ‘ग्लास मॅन ऑफ इंडिया’ सुभाष त्यागी यांनी व्यक्त केले. त्यांनी आज मिळालेल्या डी.लिट पदवीमुळे आत्मविश्वास अधिक दृढ झाल्याचेही सांगितले.

“एमआयटी एडीटी विद्यापीठाने कायमच विद्यार्थ्यांना मूल्याधिष्ठित शिक्षण पुरवित कला, विज्ञान आणि तंत्रज्ञान क्षेत्रात स्वतःला विविध आघाड्यांवर सिद्ध केले आहे. त्याचमुळे विद्यापीठाने नॅक मानांकन, एनआयआरएफ आणि क्यूएस रँकिंगमध्ये ठसा उमटवत जागतिक पातळीवर नाव कमावले आहे. संस्थापक अध्यक्ष प्रा.डाॅ.विश्वनाथ दा.कराड यांच्या मार्गदर्शनाखाली एमआयटी एडीटी विद्यापीठ आता आपल्या ‘२.०’ मोहिमेवर असून, त्यातून देशात अव्वल स्थान मिळवत भारताला आत्मनिर्भर करणारे विद्यार्थी घडविण्याचा प्रयत्न करणार आहे. आज पदवी मिळविणाऱ्या सर्व विद्यार्थ्यांनी आपल्या क्षेत्रात नेतृत्व करत भारताला आत्मनिर्भर बनवावे.”
— प्रा. डॉ. मंगेश तु. कराड,
कार्याध्यक्ष तथा प्र-कुलपती,
एमआयटी एडीटी विद्यापीठ, पुणे

मान्यवरांसह डॉ. मंगेश कराडांचा सन्मान

एमआयटी एडीटी विद्यापीठाकडून श्री. रामानन रामनाथन यांना विज्ञान व तंत्रज्ञान क्षेत्रातील योगदानाबद्दल ‘डॉक्टर ऑफ सायन्स’ (D.Sc.) ही मानद पदवी प्रदान करण्यात आली. तसेच ‘ग्लास मॅन ऑफ इंडिया’ म्हणून परिचित श्री. सुभाष त्यागी यांना औद्योगिक नेतृत्वाबद्दल ‘डॉक्टर ऑफ लेटर्स’ (D.Litt.) या मानद पदवीने सन्मानित करण्यात आले. यासह, डॉ. मंगेश कराड यांना माजी विद्यार्थी संघटनेच्या वतीने ‘उत्कृष्टतेचे शिल्पकार’ या पुरस्काराने गौरविण्यात आले.

एकूण ३३३४ विद्यार्थ्यांना पदवी प्रदान

राष्ट्रगीत आणि विश्वशांती प्रार्थनेद्वारे सुरू झालेल्या या कार्यक्रमात २१ पीएचडी, २१ सुवर्णपदके आणि १९५ विद्यार्थ्यांना रँक होल्डर प्रमाणपत्र राज्यपाल हरिभाऊ बागडे यांच्या हस्ते प्रदान करण्यात आले. तसेच विविध मान्यवरांच्या हस्ते एकूण ३३३४ विद्यार्थ्यांना पदवी बहाल करण्यात आली.

या कार्यक्रमासाठी पालक आणि विद्यार्थ्यांसह देशभरातून ८ हजारांहून अधिक लोकांनी हजेरी लावली. यावेळी राजदंडासह काढण्यात आलेल्या आकर्षक मिरवणुकीने सर्वांचे लक्ष वेधून घेतले. ‘पसायदान’ने सांगता झालेल्या या कार्यक्रमाचे आभार प्रोवोस्ट डॉ. सायली गणकर यांनी मानले, तर सूत्रसंचालन प्रा. स्नेहा वाघटकर, प्रा. स्वप्निल शिरसाठ आणि डॉ. अशोक घुगे यांनी केले.

ससून मध्ये पेट स्कॅन प्रकल्प रखडला वर्षाहून अधिक काळ

पुणे- कर्करोगाचा शरीरात किती व कोठे प्रसार झाला आहे याची तपासणी करण्‍यासाठी दीड वर्षापूर्वी आलेली ससून रुग्णालयातील ‘पॉझिट्रॉन एमिशन टोमोग्राफी’ (पेट स्कॅन) तपासणी मशीन दिरंगाई च्या कारभारातून आता मुक्त होते आहे तर पुणे महापालिकेचा देखील पेट स्कॅन मशिन, रेडिओ डायग्नोस्टिक व प्रयोगशाळा प्रकल्प याच डिसेम्बर महिन्यात सुरु होणार आहे. सुमारे १५ हजार रुपये या तपासणी साठी खाजगी रुग्णालयात खर्च येतो रुबी हॉल, दिनानाथ मंगेशकर हॉस्पिटल आणि अन्य काही मोजक्या ठिकाणी पेट स्कॅन मशिन आहेत . ससून मध्ये हि मशीन दीड वर्षापूर्वी आणली गेली मात्र पहिले सहा महिने या रुग्णालयात ती धूळ खात पडली नंतर ती बसविली गेली. रोज खाजगी रुग्णालयात ३० ते ४० रुग्णांच्या तपासण्या होतात तर ससून मध्ये मात्र अवघ्या ४ ते ५ तपासण्या सुरु झाल्या होत्या नंतर त्याही बंद झाल्या आणि आता पुन्हा त्या सुरु होत असल्याचे सांगण्यात येते आहे.

दरम्यान पुणे शहरामध्ये कोणत्याही महापालिकेच्या किंवा सरकारी रूग्णालयामध्ये पेट स्कॅनची सुविधा उपलब्ध नाही आणि यामुळे कर्करोग ग्रस्त गरीब रूग्णांना खाजगी रूग्णांलयांवर अवलंबुन रहावे लागते व खाजगी रूग्णालयाचे दर गरीब व गरजू रूग्णांना परवडणारे नसतात. यावर उपाययोजना म्हणुन पुणे महापालिके मार्फत पीपीपी तत्वावर पेट स्कॅन व रेडियो डायग्नोस्टिक प्रकल्प पुणे मनपा मार्फत कार्यान्वित करण्यात येत आहे.
दि.०४/११/२०२५ रोजी महापालिका आयुक्त नवल किशोर राम , आरोग्य अधिकारी डॉ. निना बोराडे,सहा. आरोग्य अधिकारी डॉ. संजीव बावरे, यांनी स्वारगेट हिराबाग आरोग्य कोठी लगत सुरू असलेल्या स्व. वंसतदादा पाटील प्रशिक्षण केंद्राच्या इमारती येथे पेट स्कॅन व रेडियो डायग्नोस्टिक प्रयोगशाळा प्रकल्पाची पाहाणी केली .सध्याच्या काळामध्ये कर्करोगाच्या रूग्णांमध्ये दिवसेंदिवस मोठयाप्रमाणावर वाढ होत आहे. कर्करोगाचे निदान करण्यासाठी सध्या उपलब्ध असलेले पेटस्कॅनची सुविधा कोणत्याही पुणे मनपाच्या रुग्णालयामध्ये उपलब्ध नाही. पुणे महानगरपालिका ही पहिली महानगरपालिका असू शकेल ज्यामध्ये पेटस्कॅनची सुविधा उपलब्ध होणार असून गरीब व गरजू रूग्णांना परवडेल अशा सीजीएचएस दरामध्ये उपलब्ध होणार आहे.पुणे महानगरपालिका ही देशातील पहिली महानगरपालिका पेट स्कॅन व रेडियो डायग्नोस्टिक प्रयोगशाळा सुविधा देणारी ठरेल. यामध्ये पॅथॉलॉजी, बायोकेमीस्ट्री लॅब, एमआरआय, सीटी स्कॅन या सर्व सुविधा उपलब्ध होणार आहे.महापालिका आयुक्त यांनी सदरच्या प्रकल्पाबाचत कामाचा आढावा घेतला व योग्य त्या सुचना दिल्या आहेत आणि हा प्रकल्प माहे डिसेंबर २०२५ अखेर पर्यंत पुर्ण करून सुरु करण्याचे आदेश देखील दिले आहेत .

माधव जगतापांना दिले आकाशचिन्ह व परवाना विभाग आणि अग्निशमन विभाग, तर अरविंद माळी यांच्याकडे आपत्ती व्यवस्थापन तर आशा राऊत यांच्याकडे मध्यवर्ती भांडार विभाग 

पुणे- कर आकारणी आणि कर संकलन प्रमुख पदावरील जोरदार रस्सीखेच होती यात अखेरीस कर आकारणी आणि कर संकलन विभाग प्रमुखपदी रवी पवार यांची नियुक्ती झाली आहे तर माधव जगतापांना आकाशचिन्ह व परवाना विभाग आणि अग्निशमन विभाग देण्यात आले आहे.कर आकारणी बरोबर रवी पवार यांच्याकडे महात्मा फुले वाडा आरक्षित क्षेत्राचे संपादनचे कामकाज आणि क्रीडा विभागही सुपूर्त करण्यात आला आहे. काल महापालिका अधिकाऱ्यांच्या खाते वाटपात काही बदल करण्यात आले यापूर्वी ३१ ऑक्टोबर ला महापालिका आयुक्तांनी खाते वाटप केले होते आता यापुढे पहा कोणत्या बदल झालेल्या अधिकाऱ्याकडे कोणती खाती

प्रसाद काटकर – १) परिमंडळ क्र. ३ विभाग २) निवडणूक विभाग (३) महापालिका आयुक्त यांचे विशेष कार्यकारी अधिकारी (OSD)

२) सोमनाथ बनकर – १) अतिक्रमण/अनधिकृत बांधकाम निर्मूलन विभाग

३) प्रशांत ठोंबरे – १) मालमत्ता व व्यवस्थापन विभाग २) दक्षता विभाग

४) विजय लांडगे – १) स्थानिक संस्था कर विभाग २) जनगणना विभाग ३) जनरल रेकॉर्ड

५) किशोरी शिंदे – १) परिमंडळ १ २) उपायुक्त प्रशासन अटल बिहारी वाजपेयी वैद्यकीय महाविद्यालय ) उप आयुक्त (विशेष) विभाग ४) मुद्रणालय विभाग

६) रवि पवार – १) कर आकारणी व कर संकलन विभाग २) महात्मा फुले वाडा आरक्षित क्षेत्राचे संपादनचे कामकाज ३) क्रीडा विभाग

७) माधव जगताप – १) आकाशचिन्ह व परवाना विभाग २) अग्निशमन विभाग

८) जयंत भोसेकर – १) समाज कल्याण विभाग २) समाज विकास विभाग ३) मागासवर्ग विभाग ४) तक्रार निवारण अधिकारी (दिव्यांग)

९) संदीप खलाटे – १) झोपडपट्टी निर्मूलन व पुनर्वसन २) पुणे मनपा वसाहती ( चाळ विभाग)

१०) संदीप कदम – घनकचरा व्यवस्थापन विभाग

११) वसुंधरा बारवे – १) प्राथमिक शिक्षण विभाग २) माध्यमिक व तांत्रिक शिक्षण विभाग संनियंत्रण (३) प्रशिक्षण प्रबोधिनी

१२) विजयकुमार थोरात – १) सामान्य प्रशासन विभाग २) तांत्रिक विभाग ३) बीओटी सेल

१३) संतोष वारुळे – १) परिमंडळ क्र. २ विभाग २) सांस्कृतिक केंद्र विभाग

१४) अरविंद माळी – १) परिमंडळ क्र. ४ विभाग २) आपत्ती व्यवस्थापन विभाग

१५) अविनाश सकपाळ- १) मोटार वाहन विभाग २) पर्यावरण विभाग

१६) निखील मोरे – भूसंपादन व व्यवस्थापन विभाग, परिमंडळ क्र ५

१७) राहुल जगताप, ई- प्रशासक ( प्रभारी पदभार ) – माहिती तंत्रज्ञान विभाग

१८) श्री. रमेश शेलार (मुख्य सुरक्षा अधिकारी) – सहाय्यक अतिक्रमण/अनधिकृत बांधकाम निर्मुलन विभाग प्रमुख, उप आयुक्त यांच्या अधिनिस्त कामकाज करणे.

१९) आशा राऊत – १) मध्यवर्ती भांडार विभाग २) सुरक्षा विभाग सनियंत्रण

२०) तुषार बाबर – १) माहिती व जनसंपर्क विभाग २) सोशल मीडिया कक्ष ३) मंडई विभाग

डेअरीच्या जागेवर डल्ला…! पुण्यात आणखी एक १५०० कोटींचा गैरव्यवहार, बोपोडी जमीन प्रकरणात एकनाथ खडसेंचा मोठा खुलासा….

पुणे : कोरेगाव पार्क येथील जमीन गैरव्यवहार प्रकरण सध्या चांगलेच चर्चेत आहे. यादरम्यान पुण्यातील बोपोडी येथे बनावट कागदपत्रांच्या आधारे सरकारी जमीन बळकावल्याचा आणखी एक प्रकार उजेडात आला आहे. याप्रकरणी गुन्हा देखील दाखल करण्यात आला आहे. या प्रकरणामध्ये पुणे शहराचे तहसीलदार सूर्यकांत येवले यांचे निलंबन करण्यात आहे. येवले यांच्यावर शासकीय जमिनींचा अपहार केल्याचा ठपका ठेवत राज्य सरकारने त्यांना निलंबित केले आहे.

दरम्यान राष्ट्रवादी काँग्रेस (शरद पवार) पक्षाचे नेते एकनाथ खडसे यांनी आज पत्रकार परिषद घेत या घोटाळ्यासंबंधी सविस्तर माहिती दिली आहे. पुणे शहरातील मध्यवर्ती ठिकाणी असलेली ही सुमारे १ हजार ५०० कोटीची जमीन कशी नावावर करण्यात आली याबद्दल खडसे यांनी मोठे खुलासे केले आहेत.

खडसे म्हणाले की, काल पुणे येथील खडक पोलीस ठाण्यात एक एफआयआर दाखल झाला. हा एफआयआर हेमंत गावंडे, राजेंद्र विद्वांस, ऋषिकेश विद्वांस, मंगल विद्वांस तसेच विद्यानंद पुराणिक, जयश्री संजय एकबोटे, शीतल तेजवानी, दिग्विजय अमरसिंह पाटील यांच्याविरोधात झाला. सर्वे नं. ६२, फायनल प्लॉट नं. १४ बोपोडी १४ या गट नंबरसंबंधी आहे. हा गट नंबर १५ एकरचा आहे. या सर्वांनी बनवट कागदपत्रे तयार करून त्यांनी ही जमीन आपल्या नावावर करून घेतल्याचा गुन्हा आहे, अशी माहिती एकनाथ खडसे यांनी दिली आहे.

२०१४ च्या सुमारास याच्यावर टीडीआर मिळावा म्हणून त्यांनी पुणे महापालिकेकडे अर्ज केला. फाइल अंतिमतः टीडीआरचा पैसा देण्याच्या संदर्भात मंजूरीपर्यंत आली, यादरम्यान २०१४ च्या काळात जेव्हा मी विरोधपक्षनेता होतो, तेव्हा हा विषय माझ्या लक्षात आणून देण्यात आला. त्यानंतर मी सरकार आणि आयुक्तांना पत्र लिहिले. ज्यामध्ये या जागेचा टीडीआर मंजूर करू नये अशी सूचना मी सरकारला केली. पण तरीही त्यावर पुढे कारवाई झाली नाही, असे एकनाथ खडसे म्हणाले.

दरम्यानच्या काळात हा टीडीआरचा प्रस्ताव माझ्याकडे प्रलंबित होती. यावर मी आदेश दिला होता की, ही जमीन आपली आहे आणि ही कोणालाही देता कामा नये. मधल्या काळात त्यांनी ही जमीन आपल्या नावावर लावण्याचा आणि टीडीआर मिळवण्याचा प्रयत्न केला आणि त्यांनी तो मिळवला. ही जमीन त्यांनी २०१५ च्या काळात मिळवली. कृषीमंत्री या नात्याने ही फाइल माझ्याकडे होती, यावर कारवाई होत नव्हती म्हणून मी कृषी महाविद्यालयाच्या डीनला सूचना केल्या की हेमंत गावंडे आणि इतरांविरोधात फौजदारी गुन्हा दाखल करावा. तेव्हा माझ्या सूचनेनुसार शिवाजीनगर पोलीस ठाण्यात गुन्हा दाखल झाला, असेही एकनाथ खडसे म्हणाले.

१ फेब्रुवारी २०१५ रोजी हा गुन्हा दाखल करण्यात आला. आत्ता काल जो गुन्हा दाखल झाला त्यामध्ये योगायोगाने हेच आरोपी आहेत. हेमंत गावंडे हा क्रिमीनल आहे. याने अनेकांना फसवलं आहे. ही जमीन त्याला न मिळू न दिल्याने त्याने भोसरी प्रकरणात माझ्या विरोधात खोटा गुन्हा दाखल केला. या लोकांना मी पाठीशी घातलं नाही म्हणून या सर्वांनी भोसरी प्रकरणात माझ्याविरोधात गुन्हा दाखल केला, असेही एकनाथ खडसे म्हणाले.

ही जमीन फार पूर्वी पेशव्यांची जमीन होती, त्या काळात भट म्हणून एक कुटुंब होतं. त्या कुटुंबाला पेशव्यांनी उदर निर्वाहासाठी ही जमीन दिली होती. त्यामध्ये एक अट होती की, कुटुंबामध्ये जोपर्यंत मुलगा होत राहिल तोपर्यंत राहिल मुलगी जन्माला आली तर हा अधिकार राहाणार नाही. त्या कुटुंबात जोपर्यंत मुलगा होता तोपर्यंत हा अधिकार त्यांच्याकडे राहिला नंतर मुलगी जन्माला आल्यानंतर हा अधिकार संपला. ही जमीन सरकारजमा झाली. नंतर १८८३ पासून ही सरकारी जमीन आहे. १९२० साली ही जमीन कृषी महाविद्यालयासाठी देण्यात आली. तेव्हापासून ही कृषी विभागाकडे आहे. ही जमीन अत्यंत महत्त्वाच्या ठिकाणी आहे.

शिवाजीनगर परिसरातील या जमीनीला मोठा भाव आहे. आजचा बाजारभावाप्रमाणे याची किंमत पाहिली तर पंधराशे कोटीं रूपयांच्या आसपासची ही जमीन आहे. १५०० कोटी रूपयांची ही जमीन विद्वांस कुटुंबाला हाताशी धरून हेमंत गावंडे, तेजवानी या कंपीनीने आम्ही कूळ आहोत असे कागदपत्रे तयार केले. ही जमीन कृषी महाविद्यालयाच्या अखत्यारीत असताना त्यांनी हा प्रकार २००९ पासून सुरू केला. तेव्हापासून या जमीनीचा पाठपुरावा केला जात होता, असा आरोप एकनाथ खडसे म्हणाले.

पुण्याच्या डीपी प्लॅनमध्ये ही मोकळी जमीन पुणे ट्रान्सपोर्ट विभागाला रिझर्वेशनसाठी दाखवण्यात आली, त्यामुळे ही पडून राहिली. पण तरीही ही जमीन आमची आहे असे दाखवून त्यांनी कागदपत्रे तयार करून सरकारकडे अपील केलं. हेमंत गावंडे यांनी तेथील जिल्हाधिकाऱ्यांकडे जमीन परत देण्याची मागणी केली. जिल्हाधिकाऱ्यांनी ते नाकारलं. त्यानंतर ते आयुक्तांकडे गेले. आयुक्तांनी देखील ही सरकारी जमीन असल्याचा निर्णय दिला. त्या निर्णयाविरोधात त्यांनी मंत्र्यांकडे अपील केलं, त्यांनीही नाकारल्यानंतर ते उच्च न्यायालयात गेले. न्यायालयाने सरकारला चार आठवड्यात निर्णय घेण्यास सांगितल्यानंतर ती फाइल सरकारकडे आली आणि परत सरकारने ती नाकारली.

पुणे: वंदे मातरम् संघटनेच्या टीमकडून जम्मू-काश्मीरमधील जवानांना फराळ वाटप करण्यात आला. काश्मीरच्या श्रीनगरमधील लाल चौक, हरिसिंग स्ट्रीट, पंचमुखी हनुमान मंदिर यासह सीमेवर तैनात जवानांना दिवाळी फराळ देऊन वंदे मातरम् संघटनेने देशाचे रक्षण करणाऱ्या जवानांप्रती कृतज्ञता व्यक्त केली.
तसेच कार्तिक पौर्णिमा आणि वैकुंठ चतुर्दशीच्या शुभमुहूर्तावर येथे कायमस्वरूपी बसवलेल्या गणपतीची विधिवत पूजा व भंडारा संपन्न झाला. यावेळी ‘गणपती बाप्पा मोरया, मंगलमूर्ती मोरया’, भारतमाता की जय, वंदे मातरम् अशा घोषणांनी परिसर दणाणून गेला.
यावेळी वंदे मातरम् संघटनेचे प्रदेश अध्यक्ष सचिन जामगे, आयटी व माहिती अधिकार अध्यक्ष विशाल शिंदे, संपर्क प्रमुख अमोल भुरेवार, मोठ्या संख्येने स्थानिक नागरिक व जवान तसेच इतर पदाधिकारी व कार्यकर्ते उपस्थित होते.

पुणे, :
महाराष्ट्र लघु उद्योग विकास महामंडळ आणि इंडिया एस एम इ फोरम (सूक्ष्म उद्योग मंच )यांच्या संयुक्त विद्यमाने, केंद्र सरकारच्या सूक्ष्म, लघु व मध्यम उद्योग मंत्रालयाच्या ‘रॅम्प’ (सूक्ष्म उद्योग कार्यक्षमता वृद्धी व गती योजना) या उपक्रमांतर्गत राज्यातील द्वितीय आंतरराष्ट्रिय खरेदीदार-विक्रेता परिषद मोठ्या उत्साहात पार पडली.
सदर परिषद विमाननगर, पुणे येथील फोर पॉइंट्स बाय शेरेटन हॉटेलमध्ये ६ व ७ नोव्हेंबर २०२५ या दोन दिवसांदरम्यान आयोजित करण्यात आली होती. या परिषदेच्या उद्घाटन सत्राला महाराष्ट्र लघु उद्योग विकास महामंडळाचे व्यवस्थापकीय संचालक श्री. विकास पानसरे (भा.प्र.से.), इंडिया सूक्ष्म उद्योग मंचाचे अध्यक्ष श्री. विनोद कुमार, महामंडळाच्या सहव्यवस्थापकीय संचालिका श्रीमती प्रशाली दिघावकर, तसेच मंचाच्या महासंचालिका श्रीमती सुषमा मोरथानिया उपस्थित होत्या.
या परिषदेत १६ देशांतील ४१ परदेशी खरेदीदार तसेच महाराष्ट्रातील ३०० हून अधिक सूक्ष्म व लघु उद्योगांचे प्रतिनिधी सहभागी झाले. परिषदेदरम्यान ५०० हून अधिक व्यावसायिक बैठका घेण्यात आल्या. या बैठकींत उद्योगांमधील सहकार्य, निर्यातवृद्धी, उत्पादन गुणवत्ता, तंत्रज्ञान देवाणघेवाण व नव्या व्यावसायिक संधींवर सखोल विचारविनिमय झाला.
महाराष्ट्रातील उद्योजक आणि परदेशी खरेदीदार यांच्यात एकूण ३२ सामंजस्य करार करण्यात आले. या करारांमुळे राज्यातील सूक्ष्म व लघु उद्योगांना थेट जागतिक बाजारपेठेशी जोडले जाण्याचा मार्ग मोकळा झाला आहे.
या परिषदेत निर्यातविषयक मार्गदर्शन सत्रांचे आयोजन करण्यात आले होते. आंतरराष्ट्रीय व्यापारातील संधी, निर्यात प्रक्रियेतील अडथळे, गुणवत्तेचे जागतिक निकष, व्यापार प्रोत्साहन धोरणे आणि तांत्रिक सक्षमीकरण या विषयांवर तज्ज्ञांनी सविस्तर मार्गदर्शन केले.
समारोप सत्रास भारत सरकारच्या सूक्ष्म, लघु व मध्यम उद्योग मंत्रालय रॅम्प विभागाचे उपसंचालक श्री. नरेंद्र जीना प्रमुख पाहुणे म्हणून उपस्थित राहिले. त्यांनी सहभागी उद्योजकांचे अभिनंदन करताना सूक्ष्म उद्योगांनी जागतिक स्पर्धेत टिकून राहण्यासाठी नवकल्पना, गुणवत्ता आणि प्रामाणिकता या तिन्ही अंगांनी सज्ज राहावे, असे आवाहन केले.
या द्वितीय आंतरराष्ट्रिय खरेदीदार-विक्रेता परिषदेच्या यशस्वी आयोजनातून महाराष्ट्रातील उद्योग क्षेत्राने आंतरराष्ट्रीय बाजारपेठेकडे वाटचाल करण्याचा, निर्यात क्षमतेला चालना देण्याचा आणि राज्याच्या औद्योगिक प्रगतीला गती देण्याचा नवा टप्पा गाठला आहे.